কোকৰাঝাৰ
অসম কেবিনেটে ৰাজ্যৰ আন ছটা জনগোষ্ঠীক এছ টি মৰ্যাদা প্ৰদানৰ প্ৰতিবেদনত অনুমোদন জনোৱাৰ প্ৰতিবাদত শনিবাৰে বড়োলেণ্ড বিশ্ববিদ্যালয়ৰ ছাত্ৰ-ছাত্ৰীসকলে বিটিচি সচিবালয়ৰ বিধানসভা হলত প্ৰতিবাদৰ লগতে বিধানসভাৰ সম্পত্তি ভাঙি লণ্ডভণ্ড কৰে।
বিশ্ববিদ্যালয় চৌহদৰ পৰা বড়োলেণ্ড টেৰিটৰিয়েল কাউন্সিলৰ সচিবালয়লৈ ছয় কিলোমিটাৰ দৈৰ্ঘ্যৰ পদযাত্ৰা কৰি জনজাতীয় ছাত্ৰ-ছাত্ৰীসকলে বেৰিকেড ভাঙি বিধানসভা হলত প্ৰৱেশ কৰে। বিধানসভা হলঘৰটোৰ চকী আৰু অন্যান্য আচবাব ভাঙি পেলোৱা বুলিও তেওঁলোকে জনায়।
ততাতৈয়াকৈ সেই স্থানলৈ অতিৰিক্ত নিৰাপত্তা বাহিনীক প্ৰেৰণ কৰা হৈছে, যদিও অঞ্চলটোত উত্তেজনাময় পৰিবেশে বিৰাজ কৰিছে আৰু পৰিস্থিতি এতিয়াও নিয়ন্ত্ৰণলৈ আনিব পৰা নাই বুলি বিষয়াসকলে জানিবলৈ দিয়ে।
অসমৰ ছটা প্ৰধান জনগোষ্ঠী -- টাই আহোম, চুতীয়া, মৰাণ, মট'ক, কোচ-ৰাজবংশী আৰু চাহ জনজাতি (আদিবাসী)ক এছ টি মৰ্যাদা প্ৰদানৰ প্ৰস্তাৱ সন্দৰ্ভত মন্ত্ৰী গোটৰ প্ৰতিবেদনত অনুমোদন জনায় ৰাজ্যিক কেবিনেটে।
মন্ত্ৰীসভাৰ সিদ্ধান্তৰ বিৰোধিতা কৰি বৃহস্পতিবাৰে বড়োলেণ্ড বিশ্ববিদ্যালয়ৰ ছাত্ৰ-ছাত্ৰীসকলে কেম্পাছত প্ৰতিবাদ সাব্যস্ত কৰি তৃতীয় ষান্মাসিকৰ চূড়ান্ত পৰীক্ষা বৰ্জন কৰিছিল।
কেবিনেটৰ এই সিদ্ধান্তৰ প্ৰতিবাদত বৃহস্পতিবাৰে কোকৰাঝাৰ চহৰত সদৌ বড়ো ছাত্ৰ সন্থাৰ লগতে কেইবাটাও মিত্ৰ জনজাতীয় সংগঠনে হাত জোৰ লৈ প্ৰতিবাদ সাব্যস্ত কৰে।
প্ৰতিবাদকাৰীসকলে যুক্তি আগবঢ়ায় যে, এছ টিৰ মৰ্যাদা অতিৰিক্ত সম্প্ৰদায়লৈ সম্প্ৰসাৰণ কৰিলে বৰ্তমানৰ জনজাতীয় গোটসমূহৰ অধিকাৰ আৰু সাংবিধানিক সুৰক্ষা শিথিল কৰা হ’ব, যাৰ ফলত শিক্ষা আৰু কৰ্মসংস্থাপনৰ সুযোগত প্ৰভাৱ পৰিব।
