গুৱাহাটী
অসম চৰকাৰে ঘোষণা কৰিছে যে, কিংবদন্তি কণ্ঠশিল্পী তথা সাংস্কৃতিক আইকন জুবিন গাৰ্গৰ চিতাভষ্ম সাধাৰন ৰাইজৰ বাবে উপলদ্ধ কৰা হয়। যদি কোনো সংগঠন আৰু কোনো ব্যক্তিয়ে বিচাৰে অনলাইন আবেদন ব্যৱস্থাৰ জৰিয়তে এই চিতাভষ্ম লাভ কৰিব পাৰিব। শিক্ষা আৰু সাংস্কৃতিক পৰিক্ৰমা মন্ত্ৰী ৰানোজ পেগুৱে কয় যে, ৰাজ্যৰ সাংস্কৃতিক বিভাগে এই প্ৰক্ৰিয়াৰ তদাৰক কৰিব।
মঙলবাৰে গাৰ্গক সম্পূৰ্ণ ৰাজ্যিক সন্মানেৰে দাহ কৰা সোনাপুৰৰ কামাৰকুছিত সাংবাদিকক সম্বোধন কৰি মন্ত্ৰী পেগুৱে কয় যে, চৰকাৰে অনুৰোধসমূহ সুশৃংখলিত কৰাৰ বাবে এটা সহজ পৰ্টেল তৈয়াৰ কৰিব। যাতে সংগঠন আৰু প্ৰতিষ্ঠানসমূহে নিজৰ প্ৰিয় শিল্পীৰ চিতাভষ্ম লাভ কৰাৰ বাবে আবেদন কৰিব পাৰে। যদিহে প্ৰতিষ্ঠানিক অনুৰোধ পূৰণ কৰাৰ পিছতো অৱশিষ্ট উপলব্ধ হয়, তেন্তে ব্যক্তিগত আবেদনকাৰীৰো অনুৰোধ বিবেচনা কৰা হ’ব।
যোৱা ১৯ ছেপ্টেম্বৰত ছিংগাপুৰত সাগৰত সাঁতুৰি থকা অৱস্থাত শেষ নিশ্বাস ত্যাগ কৰে ৫২ বছৰীয়া গাৰ্গে। সোমবাৰে তেওঁৰ মৃতদেহ অসমত উপস্থিত হয়, গুৱাহাটীত শিল্পী গৰাকীৰ কফিন আহি পোৱাৰ লগে লগে লাখ লাখ শোকগ্ৰস্ত অনুৰাগীয়ে ৰাজপথত ভিৰ কৰি শ্ৰদ্ধাঞ্জলি জনায়। সোনাপুৰৰ কমাৰকুছিত তেওঁৰ শেষকৃত্য সম্পন্ন কৰা হয়, য’ত চৰকাৰে স্থায়ী স্মৃতিসৌধ নিৰ্মাণৰ প্ৰস্তুতি চলাইছে।
আজি নিশাৰ পৰা চিতা নিৰ্মাণ কৰা ঠাইখন সুৰক্ষিত কৰা হ’ব। স্থায়ী সীমা নিৰ্ধাৰণ আৰু সীমা দেৱাল নিৰ্মাণৰ কাম তৎক্ষণাত আৰম্ভ হ’ব বুলি পেগুৱে কয়। তেওঁ লগতে কয় যে, কামাৰকুছি স্মৃতিসৌধত নিৰাপত্তা সুনিশ্চিত কৰাৰ লগতে শ্ৰদ্ধাঞ্জলিৰ বাবে জনসাধাৰণৰ বাবে মুকলি কৰি ৰখাৰ বাবে ৰাজ্যিক আৰক্ষী শিবিৰও স্থাপন কৰা হ’ব।
পূৰ্বে মুখ্যমন্ত্ৰী হিমন্ত বিশ্ব শৰ্মাই ঘোষণা কৰা মতে, গাৰ্গৰ চিতাভষ্মৰ এটা অংশ যোৰহাটলৈ লৈ যোৱা হ’ব। মন্ত্ৰীগৰাকীয়ে নিশ্চিত কৰে যে, তাত তেৰদিনীয়া দিনৰ লগত জড়িত অনুষ্ঠানসমূহ পালন কৰা হ’ব আৰু যোৰহাটত গাৰ্গৰ নামত এখন স্মৃতিসৌধো নিৰ্মাণ কৰা হ’ব আৰু স্থান নিৰ্বাচনৰ কাম চলি আছে।
অসমৰ ৰাইজৰ বাবে জুবিন গাৰ্গ কেৱল এজন গায়ক বা সুৰকাৰ নাছিল, বৰঞ্চ তেওঁ আছিল এক সাংস্কৃতিক সেতু যাৰ সংগীতে প্ৰজন্মক একত্ৰিত কৰিছিল। তেনেক্ষেত্ৰত সংগঠন আৰু ব্যক্তিক তেওঁৰ চিতাভষ্মৰ অংশ সংৰক্ষণ কৰিবলৈ দিয়া চৰকাৰৰ এই পদক্ষেপে জনসাধাৰণে নিজৰ অসম পুত্ৰৰ সৈতে ভাগ কৰা গভীৰ ব্যক্তিগত আৰু সামূহিক বন্ধনক সন্মান জনোৱাৰ চেষ্টা কৰিছে।
.webp "অন্তেষ্টিক্ৰিয়াৰ পিছত জুবিন গাৰ্গৰ চিতাভষ্ম সংগ্ৰহ কৰাৰ এক দৃশ্য")
_(1).webp "জুবিন গাৰ্গৰ অন্ত্যেষ্টিক্ৰিয়াৰ সমাৱেশ")
