মালিক আছঘৰ হাচমী / নতুন দিল্লী
বিশ্বৰ সৰ্ববৃহৎ পপ তাৰকা মাইকেল জেকচনে পুনৰবাৰ পৰ্দাত "জীৱন্ত" হৈ উঠিছে! হয়, আপুনি ঠিকেই শুনিছে! "কিং অৱ পপ"ৰ জীৱন আৰু উত্তৰাধিকাৰৰ আধাৰত নিৰ্মিত তেওঁৰ বহু প্ৰত্যাশিত বায়'পিক "মাইকেল"ৰ টিজাৰে বিশ্বজুৰি চাঞ্চল্যৰ সৃষ্টি কৰিছে। মাত্ৰ এক মিনিট ১৩ ছেকেণ্ডৰ এই টিজাৰে ছ’চিয়েল মিডিয়াত ইমানেই চৰ্চা লাভ কৰিছে যে সংগীতপ্ৰেমীৰ হৃদয়ত যেন সেই একে পুৰণি উৎসাহ পুনৰ জাগি উঠিছে।
টিজাৰটোৰ আৰম্ভণিত গভীৰ চিনেমাৰ দৰে আৰু আৱেগিক সুৰ আছে। মাইকেল তেওঁৰ হেডফোনত সংগীতৰ মাজত হেৰাই গৈছে, আৰু তাৰ পিছত আমি কিংবদন্তি সংগীতজ্ঞ কুইন্সি জোনছৰ কণ্ঠ শুনিবলৈ পাওঁ: "মই জানো যে আপুনি এইটোৰ বাবে অপেক্ষা কৰি আছিল..."
তাৰ পিছত, দৃশ্যবোৰ বিজুলীৰ গতিৰে সলনি হয়। ৰিল টেপ ঘূৰি থাকে, চাউণ্ড কনছ’লৰ ফেডাৰবোৰ লৰচৰ কৰে, "বিলি জিন", "বিট ইট", "থ্ৰিলাৰ"ৰ দৰে গীতৰ হাতেৰে লিখা তালিকাবোৰ ওলাই পৰে, আৰু তাৰ পিছত লাখ লাখ অনুৰাগীৰ চিঞৰ-বাখৰৰ মাজত মঞ্চত জিলিকি থাকে মাইকেল জেকছন। ইয়াৰ লগে লগে যেন উভতি আহিছে অনুৰাগীৰ সেই উন্মাদনা আৰু উৎসাহ।
মাইকেল জেকচনৰ চৰিত্ৰত অভিনয় কৰা জাফৰ জেকচন
আটাইতকৈ ডাঙৰ আচৰিত আৰু আকৰ্ষণীয় কথাটো হ’ল মাইকেল জেকচনৰ চৰিত্ৰত অভিনয় কৰিছে তেওঁৰ ভতিজা জাফৰ জেকচনে। টিজাৰত জাফৰে উচ্চাৰণ কৰে, "তেজে কথা কয়।" তেওঁৰ শৰীৰৰ ভাষা, মুখৰ বৈশিষ্ট্য, কাপোৰ-কানি, নৃত্যৰ গতি ইমানেই নিখুঁত যে দৰ্শকে ক্ষন্তেক সময়ৰ বাবে পাহৰি যায় যে তেওঁলোকে মাইকেল জেকছনৰ ভতিজাকক চাই আছে, আৰু সেয়া প্ৰকৃত মাইকেল জেকছন নহয়।
বিশেষকৈ "থ্ৰিলাৰ"ৰ আইকনিক ৰঙা জেকেট আৰু বিখ্যাত মুনৱাকটোৱে যেন সময় পিছুৱাই লৈ গৈছে। এণ্টোৱান ফুকুৱাৰ পৰিচালনা আৰু তিনিবাৰৰ অস্কাৰৰ মনোনীত জন লগানে লিখা এই ছবিখনে মাইকেল জেকচনৰ জীৱনৰ উত্তাল কাহিনীক এক নতুন দৃষ্টিকোণৰ পৰা প্ৰদৰ্শন কৰিব। ছবিখনে তেওঁৰ সংগীত কেৰিয়াৰ আৰু জেকচন ফাইভৰ পৰা গোলকীয় তাৰকালৈ যাত্ৰাৰ সন্ধান কৰাই নহয়, তেওঁৰ ব্যক্তিগত সংগ্ৰাম, আৱেগ আৰু উত্তৰাধিকাৰৰ বিষয়েও প্ৰকাশ কৰিব।
ছবিখনৰ ট্ৰেইলাৰৰ এটা দৃশ্য
ছবিখনৰ নিৰ্মাতাসকলে কয় যে “মাইকেল” কেৱল বায়’পিক নহয়, বৰঞ্চ এক আৱেগিক চিনেমাৰ অভিজ্ঞতা যিয়ে দেখুৱাব যে কেনেকৈ এজন উদীয়মান যুৱকে নিজৰ অসাধাৰণ সৃষ্টিশীলতা আৰু আবেগেৰে সমগ্ৰ বিশ্বক নাচিবলৈ বাধ্য কৰাইছিল। অৱশ্যে টিজাৰত মাইকেলৰ বিতৰ্কিত আইনী যুঁজ বা তেওঁৰ বিৰুদ্ধে উত্থাপিত যৌন নিৰ্যাতনৰ অভিযোগৰ কোনো উল্লেখ কৰা হোৱা নাই। এইবোৰ আছিল তেওঁৰ কেৰিয়াৰৰ শেষৰ বছৰবোৰত গভীৰ ছাঁ পেলোৱা বিষয়।
উল্লেখ্য যে, ২০০৬ চনত কেলিফৰ্ণিয়াৰ আদালতে তেওঁক শিশু নিৰ্যাতনৰ অভিযোগৰ পৰা মুক্ত কৰে আৰু তেওঁৰ মৃত্যুৰ পিছতো পৰিয়ালে এই অভিযোগসমূহ তীব্ৰভাৱে অস্বীকাৰ কৰে। এই বিষয়ত ছবিখনে কি স্থিতি গ্ৰহণ কৰিব সেয়া বৰ্তমান স্পষ্ট হোৱা নাই। মাইকেলৰ পিতৃ জো জেকচনৰ চৰিত্ৰত অভিনয় কৰিব কলমেন ডমিংগো আৰু মাতৃ কেথেৰিন জেকচনৰ চৰিত্ৰত অভিনয় কৰিব নিয়া লঙে। ল’ৰা হেৰিয়াৰ, কেট গ্ৰেহাম, ডেৰেক লুক, লাৰেন্স টেট, আৰু মাইলছ টেলাৰে আন মূল চৰিত্সমূহতত অভিনয় কৰিছে। লায়ন্সগেট মুভিজে মুকলি কৰা এই অফিচিয়েল টিজাৰটোৱে ইতিমধ্যে কেইঘণ্টামানৰ ভিতৰতে ইউটিউবত ৫ লাখৰো অধিক ভিউ লাভ কৰিবলৈ সক্ষম হৈছে।
অনুৰাগীৰ উন্মাদনা স্পষ্ট, তেওঁলোকে ছ’চিয়েল মিডিয়াত লিখিছে, “মাইকেল জেকচন ঘূৰি অহাৰ দৰে অনুভৱ হৈছে।” সংগীত সমালোচকসকলে ইয়াক আগন্তুক বছৰৰ আটাইতকৈ চৰ্চিত বায়’পিক বুলি অভিহিত কৰিছে। আমোদজনক কথাটো হ’ল, চিত্ৰনাট্যৰ জটিলতাৰ বাবে ছবিখনৰ প্ৰডাকচন কেইবাবাৰো স্থবিৰ হৈ পৰিছিল। মূল চিত্ৰনাট্যখনে ১৯৯৩ চনৰ বিতৰ্কিত খণ্ডটোৰ উল্লেখ কৰা বুলি কোৱা হৈছে যদিও আইনী কাৰণত পুনৰ লিখা হৈছিল। ইয়াৰ পিছতো পৰিচালক এণ্টোৱান ফুকুৱা আৰু তেওঁৰ দলটোৱে ছবিখন এনেদৰে ৰচনা কৰিছে যে যাতে মাইকেলৰ শিল্পকলা, মানৱতা আৰু সংগীত শক্তি উজলি উঠে।
২০২৬ চনৰ ২৪ এপ্ৰিলত বিশ্বজুৰি মুক্তি পাব "মাইকেল"। এইখন কেৱল এখন ছবি নহয়; ই এটা যুগৰ পুনৰ্জন্ম, সংগীতক যাদুলৈ ৰূপান্তৰিত কৰা শিল্পীজনৰ উভতি অহাৰ অনুভৱ। অনুৰাগীসকলে এতিয়া আগ্ৰহেৰে অপেক্ষা কৰি আছে সেই দিনটোৰ বাবে যেতিয়া চিনেমা হলবোৰত আকৌ এবাৰ বাজি উঠিব—"মাইকেল জেকছন ঘূৰি আহিছে!"
