গুৱাহাটী
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই জনোৱা মতে, অসমৰ ছয়খন জিলাৰ ২২ হাজাৰৰো অধিক লোক সম্প্ৰতি বানপানীত ক্ষতিগ্ৰস্ত হৈছে। এ এছ ডি এম এৰ শেহতীয়া বুলেটিনত প্ৰকাশ পোৱা মতে, গোলাঘাট, বিশ্বনাথ, শোণিতপুৰ, কাৰ্বি আংলং, নগাঁও, আৰু কাছাৰ জিলাৰ ২৭৪ খন গাঁও আৰু ৪,১৯০ হেক্টৰ কৃষিভূমি বানপানীয়ে প্লাৱিত কৰিছে।
বানপানীৰ ফলত দুজন লোকৰ মৃত্যু হোৱাৰ লগতে ৫০ হাজাৰৰো অধিক পশুধনৰ ক্ষতি হৈছে। কেৱল শোণিতপুৰ জিলাতে ৩৩ হাজাৰতকৈ অধিক পশুৰ মৃত্যু হৈছে। এই বানপানীয়ে অসমৰ মুঠ ২২,০১৬ জন লোকক প্ৰভাৱিত কৰিছে। ইয়াৰে ৮,৯৮০ জন পুৰুষ, ৮,১৯৯ জন মহিলা, আৰু ৪,৮৩৭ জন শিশু। বৰ্তমানলৈকে ১১৩টা সাহায্য শিবিৰত ৬,৮৩৮ জন লোকক আশ্ৰয় দিয়া হৈছে, আনহাতে প্ৰায় ৪৭,৬৪৪জনক শিবিৰৰ বাহিৰত সাহায্য বিতৰণৰ জৰিয়তে সহায় কৰা হৈছে।
বানপানীত আটাইতকৈ বেছি ক্ষতিগ্ৰস্ত জিলা গোলাঘাটত ১২,০০৪ জন লোক আক্ৰান্ত হৈছে আৰু ইয়াৰে দুজন মৃত্যুমুখত পৰিছে। এন ডি আৰ এফ আৰু এছ ডি আৰ এফে ২৭খন নাও নিয়োগ কৰি ১৮০০ৰো অধিক লোক আৰু পশুধন উদ্ধাৰ কৰিবলৈ সক্ষম হৈছে। ইফালে, বিশ্বনাথ জিলাত প্ৰায় ৫,৯৩১ জন লোক ক্ষতিগ্ৰস্ত হৈছে। বালিজানত মথাউৰি ভঙাত টেঙাবাৰী আৰু আমাগুৰিত ভয়াৱহ প্ৰভাৱ পৰিছে।
ইয়াৰ বিপৰীতে গুৱাহাটীত বানপানীৰ ক্ষয়-ক্ষতি অতি সীমিত। জুৰিপাৰ, সাতগাঁও, হাতীগাওঁ, ছিজুবাৰীৰ দৰে একাংশ অঞ্চলত ক্ষন্তেকীয়া বানপানী আৰু পানী জমা হোৱাৰ ফলত জনজীৱন বিঘ্নিত হৈছে। ৰাস্তা-ঘাট ডুব গৈছিল যদিও চহৰখনত কোনো লোকৰ মৃত্যু, স্থানচ্যুতি বা সাহায্য শিবিৰৰ খবৰ পোৱা নাই।
