নতুন দিল্লী
আন্তঃৰাষ্ট্ৰীয় বজাৰত মূল্য বৃদ্ধিৰ প্ৰভাৱত মঙলবাৰে বিমানৰ ইন্ধন এভিয়েশ্যন টাৰ্বাইন ফিউৱেল (এটিএফ)ৰ মূল্য ৫.৪৬ শতাংশ বৃদ্ধি কৰা হৈছে। একেদৰে হোটেল, ৰেষ্টুৰেণ্ট আদি ব্যৱসায়িক প্ৰতিষ্ঠানত ব্যৱহৃত ১৯ কিলোগ্ৰাম ওজনৰ বাণিজ্যিক এলপিজি চিলিণ্ডাৰৰ মূল্য ৯.৫০ টকাকৈ বৃদ্ধি কৰা হৈছে।
ৰাজহুৱা খণ্ডৰ তেল বিপণন কোম্পানীসমূহৰ তথ্য অনুসৰি, ঘৰুৱা বিমান সংস্থাসমূহৰ বাবে জেট ফিউৱেল বা এটিএফৰ মূল্য প্ৰতি লিটাৰত ৬.২৮ টকাকৈ বৃদ্ধি কৰি ১২১.২৮ টকা কৰা হৈছে। ইয়াৰ পূৰ্বে ১ আগষ্টতো এটিএফৰ মূল্য প্ৰতি লিটাৰত ৫ টকাকৈ বৃদ্ধি কৰা হৈছিল।
এটিএফৰ এই ধাৰাবাহিক মূল্যবৃদ্ধিয়ে বিমান সংস্থাসমূহৰ ওপৰত অতিৰিক্ত আৰ্থিক বোজা সৃষ্টি কৰিব। বিমান সংস্থাসমূহৰ মুঠ পৰিচালন ব্যয়ৰ প্ৰায় ৪০ শতাংশ পৰ্যন্ত এটিএফৰ নামত ব্যয় হয়।
ইফালে, ১৯ কিলোগ্ৰাম ওজনৰ বাণিজ্যিক এলপিজি চিলিণ্ডাৰৰ মূল্য ২,৭৩৮ টকাৰ পৰা বৃদ্ধি কৰি ২,৭৪৭.৫০ টকা কৰা হৈছে। ৫ কিলোগ্ৰাম ওজনৰ বজাৰভিত্তিক ৰন্ধন গেছৰ চিলিণ্ডাৰ, যাক ৫ কিলোগ্ৰাম এফটিএল বুলি কোৱা হয়, তাৰ মূল্যও ৭৬২ টকাৰ পৰা ৭৬৪ টকালৈ বৃদ্ধি কৰা হৈছে।
উল্লেখযোগ্য যে, ইয়াৰ পূৰ্বে বাণিজ্যিক এলপিজিৰ মূল্য দুমাহ ধৰি একেৰাহে হ্ৰাস পাইছিল। ১ আগষ্টত ১৯ কিলোগ্ৰামৰ চিলিণ্ডাৰ এটাত ১৯২ টকা আৰু ১ জুলাইত ১৮৩.৫০ টকাকৈ মূল্য হ্ৰাস কৰা হৈছিল। পশ্চিম এছিয়াৰ সংকটৰ ফলত জুন মাহত আন্তঃৰাষ্ট্ৰীয় বজাৰত গেছৰ মূল্য অভাৱনীয়ভাৱে বৃদ্ধি পোৱাৰ পাছতেই জুলাই আৰু আগষ্ট মাহত বাণিজ্যিক এলপিজিৰ মূল্য হ্ৰাস কৰা হৈছিল।
ফেব্ৰুৱাৰী মাহৰ শেষৰ ফালে সংঘাত আৰম্ভ হোৱাৰ পাছত বাণিজ্যিক এলপিজিৰ মূল্যত ব্যাপক বৃদ্ধি ঘটিছিল। ১৯ কিলোগ্ৰামৰ এটা চিলিণ্ডাৰৰ মূল্য ফেব্ৰুৱাৰীত ১,৭৪০.৫০ টকা থকাৰ বিপৰীতে জুন মাহত ৩,১১৩.৫০ টকালৈ বৃদ্ধি পাইছিল। অৰ্থাৎ এই সময়ছোৱাত প্ৰতিটো চিলিণ্ডাৰত মুঠ ১,৩৭৩ টকাকৈ মূল্য বৃদ্ধি পাইছিল।
এটিএফ আৰু এলপিজিৰ মূল্য প্ৰতি মাহৰ প্ৰথম দিনটোত আন্তঃৰাষ্ট্ৰীয় বজাৰৰ বেঞ্চমাৰ্ক মূল্য আৰু বৈদেশিক মুদ্ৰাৰ বিনিময় হাৰৰ ওপৰত ভিত্তি কৰি সংশোধন কৰা হয়। অৱশ্যে স্থানীয় কৰ, যেনে মূল্য সংযোজিত কৰ (ভেট) আদিৰ বাবে ৰাজ্যভেদে এই মূল্যৰ কিছু তাৰতম্য থাকে।
আনহাতে, ঘৰুৱা ৰন্ধনশালাত ব্যৱহৃত ১৪.২ কিলোগ্ৰাম ওজনৰ এলপিজি চিলিণ্ডাৰৰ মূল্য অপৰিৱৰ্তিত ৰখা হৈছে। বৰ্তমান ঘৰুৱা এলপিজি চিলিণ্ডাৰৰ মূল্য ৯৪২ টকা। যোৱা ৭ জুনত ঘৰুৱা এলপিজিৰ মূল্য প্ৰতিটো চিলিণ্ডাৰত ২৯ টকাকৈ বৃদ্ধি কৰা হৈছিল। ইয়াৰ পূৰ্বে পশ্চিম এছিয়াৰ সংকটৰ ফলত যোগান ব্যৱস্থাত দেখা দিয়া বাধা আৰু আন্তঃৰাষ্ট্ৰীয় শক্তিৰ মূল্য বৃদ্ধিৰ পৰিপ্ৰেক্ষিতত মাৰ্চ মাহত ঘৰুৱা এলপিজিৰ মূল্য ৬০ টকাকৈ বৃদ্ধি কৰা হৈছিল।
ইফালে, মে' মাহত পেট্ৰ'ল আৰু ডিজেলৰ মূল্য প্ৰতি লিটাৰত প্ৰায় ৭.৫০ টকাকৈ বৃদ্ধি কৰাৰ পাছত এতিয়াও দুয়োটা ইন্ধনৰ মূল্য অপৰিৱৰ্তিত হৈ আছে।
