নতুন দিল্লী
ভাৰতীয় জনতা পাৰ্টি (বিজেপি)-ৰ ৰাষ্ট্ৰীয় সংখ্যালঘু মৰ্চাই ২০২৬ চনৰ ছেপ্টেম্বৰ মাহত ‘ড° এপিজে আব্দুল কালাম একতা মাৰ্চ’ আয়োজন কৰিব। অক্টোবৰ মাহত এই যাত্ৰাৰ সামৰণি পৰিব বুলি সূত্ৰই জনাইছে।
সূত্ৰ অনুসৰি, এই মাৰ্চৰ মূল আধাৰ হৈছে প্ৰাক্তন ৰাষ্ট্ৰপতি তথা বিশিষ্ট বিজ্ঞানী ড° এপিজে আব্দুল কালামৰ আদৰ্শ আৰু প্ৰধানমন্ত্ৰী নৰেন্দ্ৰ মোদীৰ ‘এক ভাৰত, শ্ৰেষ্ঠ ভাৰত’ দৃষ্টিভংগী। এই যাত্ৰাৰ মূল উদ্দেশ্য হৈছে ‘জেন-জি’ (Generation Z) আৰু দেশৰ যুৱ প্ৰজন্মক ড° কালামৰ আদৰ্শ, ‘এক ভাৰত, শ্ৰেষ্ঠ ভাৰত’ৰ ধাৰণা আৰু জনসেৱাৰ মনোভাৱৰ সৈতে সংযুক্ত কৰা।
দেশত প্ৰশ্নকাকত ফাদিল কাণ্ডক কেন্দ্ৰ কৰি যুৱ সমাজে প্ৰতিবাদ সাব্যস্ত কৰাৰ পিছতে এই মাৰ্চ আয়োজন কৰা হৈছে। এই যাত্ৰা কাশ্মীৰৰ পৰা আৰম্ভ হৈ তামিলনাডুৰ ৰামেশ্বৰমস্থিত ড° কালাম স্মাৰকত সমাপ্ত হ’ব। যাত্ৰাত অংশগ্ৰহণকাৰীসকলে ভাৰতৰ উত্তৰৰ পৰা দক্ষিণলৈ বিস্তৃত পথ অতিক্ৰম কৰিব আৰু পঞ্জাব, উত্তৰাখণ্ড, উত্তৰ প্ৰদেশ আদি ৰাজ্যৰ মাজেৰে অগ্ৰসৰ হ’ব।
‘একত্ৰিত ভাৰত, শক্তিশালী ভাৰত’ (United India, Empowered India) দৃষ্টিভংগীক কেন্দ্ৰ কৰি এই যাত্ৰাৰ মূল বাৰ্তা সাধাৰণ জনতাৰ ওচৰলৈ লৈ যোৱা হ’ব। যাত্ৰাপথত মন্দিৰ, মছজিদ, গীৰ্জা আৰু দৰগাহ পৰিদৰ্শনৰ ব্যৱস্থা থাকিব, য’ত মত-বিনিময়ৰ লগতে জনসাধাৰণৰ মাজত এই বাৰ্তা প্ৰচাৰ কৰা হ’ব। কাশ্মীৰৰ পৰা আৰম্ভ হোৱা এই যাত্ৰাৰ অন্তিম গন্তব্য হ’ব ৰামেশ্বৰমস্থিত কালাম স্মাৰক। এই অভিযানত পথিমধ্যে লক্ষাধিক যুৱক-যুৱতীয়ে অংশগ্ৰহণ কৰিব বুলি আশা প্ৰকাশ কৰা হৈছে।
ইয়াৰ সমান্তৰালভাৱে বিজেপি সংখ্যালঘু মৰ্চাই ‘ছালাম-এ-কালাম’ (Salaam-e-Kalam) শীৰ্ষক এক দেশজোৰা শ্ৰদ্ধাঞ্জলি কাৰ্যসূচীও আয়োজন কৰিছে।
ভাৰতৰত্ন, প্ৰাক্তন ৰাষ্ট্ৰপতি আৰু বিশিষ্ট বিজ্ঞানী ড° এপিজে আব্দুল কালামৰ স্মৃতিত বিজেপি সংখ্যালঘু মৰ্চাই ২৭ জুলাইৰ পৰা ‘ছালাম-এ-কালাম’ অভিযান আৰম্ভ কৰিছে। মৰ্চাৰ ৰাষ্ট্ৰীয় সভাপতি জামাল ছিদ্দিকীৰ নেতৃত্বত এই অভিযানৰ অংশ হিচাপে দেশজুৰি জিলা সদৰসমূহত বিভিন্ন কাৰ্যসূচী অনুষ্ঠিত হ’ব।
মৰ্চাৰ ৰাষ্ট্ৰীয় দলৰ সৈতে আলোচনা কৰি জামাল ছিদ্দিকীয়ে কাৰ্যসূচীৰ ৰূপৰেখা চূড়ান্ত কৰে। তেওঁৰ মতে, ‘ছালাম-এ-কালাম’ অভিযানৰ উদ্দেশ্য হৈছে ভাৰতৰ উন্নয়ন, বিজ্ঞান, শিক্ষা আৰু ৰাষ্ট্ৰ গঠনত ড° কালামৰ অতুলনীয় অৱদান জনসাধাৰণৰ মাজলৈ লৈ যোৱা আৰু তেওঁক যথোচিত শ্ৰদ্ধাঞ্জলি জনোৱা।
তেওঁ কয়, "ড° কালামৰ জীৱন দেশৰ সমগ্ৰ জনসাধাৰণৰ বাবে, বিশেষকৈ যুৱ সমাজ আৰু পাছমান্দা (Pasmanda) সম্প্ৰদায়ৰ বাবে এক অনুপ্ৰেৰণাৰ উৎস। ৰাষ্ট্ৰীয় স্বাৰ্থ আৰু ৰাষ্ট্ৰ গঠনত অসামান্য অৱদান আগবঢ়োৱা ব্যক্তিসকলক ধৰ্ম আৰু জাতিৰ ঊৰ্ধ্বত উঠি সন্মান জনোৱাৰ পৰম্পৰা বিজেপিয়ে সদায় বজাই ৰাখিছে।"
জামাল ছিদ্দিকীয়ে ঘোষণা কৰে যে, ড° আব্দুল কালামৰ বাসগৃহৰ পৰা তেওঁৰ স্মাৰকলৈ এটা ‘একতা যাত্ৰা’ (unity march) আয়োজন কৰা হ’ব। এই যাত্ৰা ৰাষ্ট্ৰীয় ঐক্য, দেশপ্ৰেম আৰু উন্নত ভাৰত গঢ়াৰ সংকল্পক উৎসৰ্গিত। ইয়াৰ লক্ষ্য হৈছে ড° কালামৰ উন্নত ভাৰতৰ সপোন সাধাৰণ জনতাৰ মাজত প্ৰচাৰ কৰা আৰু ‘জেন-জি’কে ধৰি যুৱ সমাজক ৰাষ্ট্ৰ গঠনৰ অভিযানৰ সৈতে সংযুক্ত কৰা।
এই অভিযানৰ জৰিয়তে প্ৰধানমন্ত্ৰী নৰেন্দ্ৰ মোদীৰ নেতৃত্বত উন্নত ভাৰত গঢ়াৰ লক্ষ্য পূৰণৰ বাবে ৰাষ্ট্ৰীয় প্ৰচেষ্টাত সক্ৰিয়ভাৱে অংশগ্ৰহণ কৰিবলৈ যুৱ সমাজক উৎসাহিত কৰা হ’ব, যাতে ড° কালামৰ দৃষ্টিভংগী বাস্তৱায়নৰ দিশত দেশৰ অগ্ৰগতি অধিক ত্বৰান্বিত হয়।
এই উপলক্ষে ড° কালামৰ এটি মূৰ্তি স্থাপন কৰাৰ লগতে জামাল ছিদ্দিকীৰ নেতৃত্বত ড° কালামৰ অনুপ্ৰেৰণাদায়ক জীৱন আৰু অৱদানক আলোকপাত কৰা এক বিশেষ অনুষ্ঠান অনুষ্ঠিত হ’ব।
এই অনুষ্ঠানত উত্তৰাখণ্ড ৱাক্ফ ব’ৰ্ডৰ অধ্যক্ষ শাদাব শামছ, তামিলনাডু বিজেপি সংখ্যালঘু মৰ্চাৰ ৰাজ্যিক সভাপতিৰ লগতে কেইবাজনো বিশিষ্ট ব্যক্তি উপস্থিত থাকিব।
জিলা পৰ্যায়ত অনুষ্ঠিত হ’বলগীয়া কাৰ্যসূচীৰ ভিতৰত ড° কালামৰ মূৰ্তি বা প্ৰতিচ্ছবিত পুষ্পাঞ্জলি অৰ্পণ, আলোচনা চক্ৰ আৰু চিকিৎসা শিবিৰ আয়োজন অন্তৰ্ভুক্ত থাকিব।
ইয়াৰ উপৰিও সামাজিক মাধ্যমৰ জৰিয়তে এক বিশেষ গণসচেতনতা অভিযান চলোৱা হ’ব। এই সকলো কাৰ্যসূচীৰ জৰিয়তে ড° কালামৰ আদৰ্শ, তেওঁৰ বৈজ্ঞানিক দৃষ্টিভংগী আৰু উন্নত ভাৰতৰ সপোন সমাজৰ সকলো শ্ৰেণীৰ লোকৰ মাজত প্ৰচাৰ কৰা হ’ব।
