নতুন দিল্লী
উত্তৰাখণ্ডৰ প্ৰাক্তন মুখ্যমন্ত্রী তথা কংগ্ৰেছৰ জ্যেষ্ঠ নেতা হৰিশ ৰাৱটে নিজৰ সকলো পদৰ পৰা পদত্যাগ কৰিছে। হৰীশ ৰাৱটে ছ’চিয়েল মিডিয়া প’ষ্টৰ জৰিয়তে এই তথ্য প্ৰকাশ কৰিছে। নিজৰ প্ৰাক্তন ওএছডি আৰু পিএ চন্দন সিং জীনাৰ বিৰুদ্ধে ইডিৰ ব্যৱস্থা গ্ৰহণৰ পিছতেই হৰিশ ৰাৱটে এই পদত্যাগৰ সিদ্ধান্ত লৈছে।
হৰিশ ৰাৱটে ছ’চিয়েল মিডিয়া প’ষ্টত উল্লেখ কৰে যে জীনাৰ বিৰুদ্ধে যি ব্যৱস্থা লোৱা হৈছে, তাৰ সত্যতা অনাগত সময়ত পোহৰলৈ আহিব। তেওঁ কয় যে জীনা এজন ভদ্র, বিনম্ৰ আৰু কৰ্মঠ ব্যক্তি। তেওঁ লগতে কয় যে যদি গ্ৰাম সেৱক নিযুক্তিৰ ওএমআৰ শ্বীটৰ সৈতে সালসলনি কৰা হৈছে আৰু যদি তেওঁ এনেধৰণৰ কিবা ভুল কৰিছে আৰু তাৰ প্ৰমাণ আছে, তেন্তে তেওঁৰ এই তথাকথিত দুঃসাহসিক কাৰ্যৰ বাবে মই লজ্জিত। তেওঁ কয় যে এই অভিযোগৰ ওপৰত মোৰ অলপো বিশ্বাস নাই।
হৰিশ ৰাৱটে লিখিছে যে উত্তৰাখণ্ডৰ নিৰ্বাচনত বহুত কথা বাজি ধৰা হৈছে। যেতিয়াই মোক কোনোবাই সোধে যে নিৰ্বাচন কেতিয়া হ’ব, মই হাঁহি হাঁহি কওঁ যে যেতিয়া চিবিআইএ মোৰ ঘৰৰ দুৱাৰত টোকা দিব, তেতিয়াহে নিৰ্বাচন হ’ব। যদি এতিয়ালৈকে অহা নাই, তাৰ মানে নিৰ্বাচন অহা বছৰৰ মাৰ্চ-এপ্ৰিল মাহতহে হ’ব।
তেওঁ কয় যে এইবাৰ মোৰ ঘৰত নহয়, মোৰ এজন সহযোগীৰ ঘৰত টোকা দি এটা ধাৰণা সৃষ্টি কৰাৰ চেষ্টা কৰা হৈছে। কংগ্ৰেছ দল আৰু কংগ্ৰেছ কৰ্মীসকলে দুৰ্নীতিৰ বিৰুদ্ধে ঐক্যবদ্ধ হৈ যুঁজ দিছে। তেওঁ কয় যে এনে সময়ত হৰিশ ৰাৱটৰ কোনো কাৰ্যৰ বাবে যদি দলৰ সংগ্ৰামত কিবা দুৰ্বলতা আহে, মই সেয়া কেতিয়াও নিবিচাৰোঁ। সেইবাবেই মই উত্তৰাখণ্ড প্ৰদেশ কংগ্ৰেছ কমিটীৰ কাৰ্যনিৰ্বাহক সদস্য আৰু ৰাষ্ট্ৰীয় পৰ্যায়ত কংগ্ৰেছ কাৰ্যকাৰী সমিতিৰ স্থায়ী আমন্ত্ৰিত সদস্য পদৰ পৰা পদত্যাগ কৰিছোঁ।
