নতুন দিল্লী
এটা সম্প্ৰদায়ক অপমান কৰা গোচৰত ৰাহুল গান্ধীক গুজৰাটৰ এখন আদালতে দোষী সাব্যস্ত কৰাৰ প্ৰতিবাদত কংগ্ৰেছে ৰাজপথলৈ ওলাই অহাৰ সিদ্ধান্ত লৈছে। দেশৰ প্ৰধান বিৰোধী দলটোৱে অন্যান্য দলৰ সৈতে ৰাষ্ট্ৰপতি দ্ৰৌপদী মুৰ্মুকো সাক্ষাৎ কৰাৰ পৰিকল্পনা কৰিছে।
উল্লেখ্য যে, ৰাহুল গান্ধীক চুৰাটৰ আদালতে মানহানিৰ গোচৰত দোষী সাব্যস্ত কৰাৰ লগে লগে বৃহস্পতিবাৰে গণ আন্দোলনৰ কথা ঘোষণা কৰি কংগ্ৰেছে কেৱল আইনীভাৱে নহয় ৰাজনৈতিকভাৱেও এই গোচৰৰ বিৰুদ্ধে যুঁজ দিব বুলি প্ৰকাশ কৰে৷ আদালতৰ ৰায়দানৰ পিছতে কংগ্ৰেছৰ সভাপতি মল্লিকাৰ্জুন খাৰ্গে নিজৰ বাসগৃহত দলৰ জ্যেষ্ঠ নেতা আৰু সাংসদসকলৰ সৈতে এখন বৈঠকত মিলিত হয়। এই বৈঠকত তেওঁলোকে সিদ্ধান্ত লয় যে শুকুৰবাৰে বিজয় চ’কত কংগ্ৰেছে প্ৰতিবাদ সাব্যস্ত কৰিব।
কংগ্ৰেছৰ সাধাৰণ সম্পাদক জয়ৰাম ৰমেশে আজি পুৱা আন বিৰোধী নেতাৰ সৈতে বৈঠকত মিলিত হয় আৰু সংসদ ভৱনৰ পৰা বিজয় চ’কলৈ প্ৰতিবাদী সমদল উলিয়াব বুলি জানিবলৈ দিয়ে। বিৰোধী দলসমূহেও শুকুৰবাৰে বিয়লি ৰাষ্ট্ৰপতি দ্ৰৌপদী মুৰ্মুৰ ওচৰত এই বিষয়টো উত্থাপন কৰিবলৈ সময় বিচাৰিছে।
খাৰ্গেৰ বাসগৃহত অনুষ্ঠিত হোৱা বৈঠক প্ৰায় দুঘণ্টা ধৰি চলি থকা বুলি উল্লেখ কৰি ৰমেশে কয় যে দলৰ সভাপতিগৰাকীয়ে সকলো ৰাজ্যিক শাখাৰ মুৰব্বী আৰু কংগ্ৰেছ বিধানসভাৰ দলৰ নেতাৰ সৈতে বৈঠকত মিলিত হ’ব আৰু ৰাজ্যসমূহত আন্দোলনৰ পৰিকল্পনা কৰিব। ৰমেশে কয় যে আমি সোমবাৰে সমগ্ৰ দিল্লী আৰু অন্যান্য ৰাজ্যত এই বিষয়ত প্ৰতিবাদ সাব্যস্ত কৰিম। ই কেৱল আইনী বিষয় নহয়, দেশৰ গণতন্ত্ৰৰ ভৱিষ্যতৰ সৈতে জড়িত এক গুৰুতৰ ৰাজনৈতিক বিষয়ও বুলিও তেওঁ কয়।
"মোডী চৰকাৰৰ প্ৰতিশোধ, ভাবুকি আৰু ভয় দেখুৱাই কৰা ৰাজনীতিৰ এয়া আন এক ডাঙৰ উদাহৰণ। আমি ইয়াৰ বিৰুদ্ধে আইনী আৰু ৰাজনৈতিকভাৱেও যুঁজ দিম। আমি এনে ৰাজনীতিক ভয় নকৰো। এইটো এটা ডাঙৰ ৰাজনৈতিক বিষয়লৈ ৰূপান্তৰিত কৰিম।" ৰমেশে কয়।
