নতুন দিল্লী
সমাজবাদী পাৰ্টীৰ নেতা আজম খানৰ সৈতে সম্পৰ্কিত উত্তৰ প্ৰদেশ আৰু দিল্লীৰ ১০টা স্থানত বুধবাৰে বলৱৎকাৰী সঞ্চালকালয়ে (এনফ’ৰ্চমেণ্ট ডাইৰেক্টৰেট) তালাচী অভিযান চলায়। মৌলানা মহম্মদ আলী জৌহৰ ট্ৰাষ্ট আৰু মহম্মদ আলী জৌহৰ বিশ্ববিদ্যালয়ক কেন্দ্ৰ কৰি চলি থকা ধন সৰবৰাহৰ এটা গোচৰৰ তদন্তৰ অংশ হিচাপে এই অভিযান চলোৱা হৈছে।
বুধবাৰে পুৱাই আৰম্ভ হোৱা এই তালাচী অভিযান এতিয়াও অব্যাহত আছে। উত্তৰ প্ৰদেশৰ ৰামপুৰ আৰু ছাহাৰানপুৰৰ লগতে দিল্লীতো এই অভিযান চলোৱা হৈছে।
ইডিৰ কেইবাটাও দলে উত্তৰ প্ৰদেশ আৰু দিল্লীৰ সংশ্লিষ্ট আৰক্ষী বাহিনীৰ সৈতে সমন্বয় ৰাখি এই তালাচী অভিযান চলাইছে। অভিযান চলোৱা স্থানসমূহৰ ভিতৰত আজম খানৰ সৈতে সম্পৰ্কিত মৌলানা মহম্মদ আলী জৌহৰ ট্ৰাষ্ট আৰু মহম্মদ আলী জৌহৰ বিশ্ববিদ্যালয়ো আছে। ২০০৬ চনত আজম খানে প্ৰতিষ্ঠা কৰা মহম্মদ আলী জৌহৰ বিশ্ববিদ্যালয়খন ৰামপুৰত অৱস্থিত এখন ব্যক্তিগত বিশ্ববিদ্যালয় হয়।
ইডিৰ লক্ষ্ণৌ জোনেল কাৰ্যালয়ে ২০০২ চনৰ ধন সৰবৰাহ প্ৰতিৰোধ আইন (PMLA)ৰ ১৭ নং ধাৰাৰ অধীনত এই তালাচী অভিযান চলাইছে। বিষয়াসকলে জনোৱা অনুসৰি, এই তদন্তৰ মূল বিষয় হৈছে চৰকাৰী ঠিকাৰ ধন ব্যক্তিগত ঠিকাদাৰৰ জৰিয়তে অন্য দিশলৈ স্থানান্তৰ কৰাৰ অভিযোগ আৰু পিছত সেই ধন বিশ্ববিদ্যালয় আৰু ট্ৰাষ্টৰ সম্পত্তি সৃষ্টি কৰাকে ধৰি বিভিন্ন কামত ব্যৱহাৰ কৰা।
বিষয়াসকলে কয়, "তদন্তত কিছুমান ঠিকাদাৰ আৰু ট্ৰাষ্টৰ মাজত হোৱা বিত্তীয় লেনদেনৰ তথ্যও পোহৰলৈ আহিছে। অভিযোগ অনুসৰি, চৰকাৰী ঠিকাৰ পৰা লাভ কৰা ধনৰ এটা অংশ ট্ৰাষ্ট আৰু বিশ্ববিদ্যালয়লৈ স্থানান্তৰ কৰা হৈছিল। ইয়াৰ ভিতৰত বৃহৎ পৰিমাণৰ অনুদান আৰু নিৰ্মাণকাৰ্যৰ বাবদ ব্যয়ো অন্তৰ্ভুক্ত আছে।"
বিষয়াসকলৰ মতে, এই তালাচী অভিযানৰ মূল উদ্দেশ্য হৈছে অভিযোগযুক্ত অপৰাধমূলক ধনৰ উৎস অনুসৰণ কৰাৰ লগতে চৰকাৰী ধন অন্য দিশলৈ স্থানান্তৰ আৰু ইয়াৰ ব্যৱহাৰৰ সৈতে জড়িত বিত্তীয় নথি, গুৰুত্বপূৰ্ণ কাগজ-পত্ৰ আৰু ডিজিটেল প্ৰমাণ সংগ্ৰহ কৰা।
