গুৱাহাটী
অসমত এক ঐতিহাসিক আইনী সংস্কাৰৰ দিশে গুৰুত্বপূৰ্ণ পদক্ষেপ গ্ৰহণ কৰা হৈছে। ৰাজ্যখনত বহু চৰ্চিত ‘অসম সম নাগৰিক সংহিতা বিধেয়ক, ২০২৬’ এ অৱশেষত ৰাষ্ট্ৰপতি দ্ৰৌপদী মুৰ্মুৰ আনুষ্ঠানিক অনুমোদন লাভ কৰিছে। যোৱা ২৯ ছেপ্টেম্বৰত ৰাষ্ট্ৰপতিগৰাকীয়ে এই বিধেয়কত সন্মতি প্ৰদান কৰাৰ লগে লগেই অসমত সম নাগৰিক সংহিতা ৰূপায়ণৰ পথ সম্পূৰ্ণৰূপে মুকলি হৈ পৰিছে। উল্লেখযোগ্য যে, চলিত বৰ্ষৰ ২৭ মে’ত অসম বিধানসভাত এই বিধেয়কখন গৃহীত কৰা হৈছিল।
এই বিধেয়কখনৰ মূল লক্ষ্য হৈছে ৰাজ্যবাসীৰ বাবে ব্যক্তিগত আইনৰ ক্ষেত্ৰত এক সমতা স্থাপন কৰা। সম নাগৰিক সংহিতাৰ জৰিয়তে বিবাহ, বিবাহ-বিচ্ছেদ, সা-সম্পত্তিৰ উত্তৰাধিকাৰ আৰু লিভ-ইন সম্পৰ্কৰ দৰে স্পৰ্শকাতৰ ব্যক্তিগত বিষয়সমূহ নিয়ন্ত্ৰণৰ বাবে এক উমৈহতীয়া আইনী কাঠামো প্ৰৱৰ্তন কৰা হ'ব।
বিধেয়কখনত সমাজৰ পৰা বহুবিবাহ প্ৰথা নিৰ্মূল কৰাৰ বাবে ইয়াক কঠোৰভাৱে নিষিদ্ধ কৰা হৈছে। কেৱল সেয়াই নহয়, বহুবিবাহৰ অপৰাধত সৰ্বাধিক ৭ বছৰ পৰ্যন্ত কাৰাদণ্ডৰ কঠোৰ প্ৰস্তাৱো ৰখা হৈছে। ইয়াৰ লগতে সকলো বিবাহ আৰু বিবাহ-বিচ্ছেদৰ আনুষ্ঠানিক পঞ্জীয়ন বাধ্যতামূলক কৰা হৈছে।
অসমৰ UCC-ৰ অন্যতম এক উল্লেখযোগ্য আৰু ব্যতিক্ৰমী দিশ হৈছে লিভ-ইন সম্পৰ্কৰ বাধ্যতামূলক পঞ্জীয়ন। কোনো ব্যক্তিয়ে এনে সম্পৰ্কত থাকিলে পঞ্জীয়ন কৰাটো অপৰিহাৰ্য হ'ব। পঞ্জীয়ন নকৰিলে আইন অনুসৰি শাস্তিৰ সন্মুখীন হ'বলগীয়া হোৱাৰ ব্যৱস্থাও বিধেয়কখনত স্পষ্টকৈ উল্লেখ কৰা হৈছে।
আইনখন সকলোৰে বাবে সমান হ'লেও, চৰকাৰে অসমৰ খিলঞ্জীয়া জনজাতীয় লোকসকলৰ আৱেগ আৰু অধিকাৰৰ প্ৰতি বিশেষ সন্মান জনাইছে। অসমত বসবাস কৰা অনুসূচিত জনজাতি শ্ৰেণীৰ লোকসকলক এই সম নাগৰিক সংহিতাৰ পৰিসৰৰ পৰা সম্পূৰ্ণৰূপে ৰেহাই দিয়া হৈছে। ৰাজ্য চৰকাৰে বিধেয়কখন প্ৰস্তুত কৰাৰ সময়তেই জনজাতীয় সমাজৰ সুকীয়া পৰম্পৰা, ৰীতি-নীতি আৰু প্ৰাচীন প্ৰথাসমূহ সুৰক্ষিত কৰাৰ স্বাৰ্থত এই গুৰুত্বপূৰ্ণ ব্যৱস্থা গ্ৰহণ কৰিছিল।
স্মৰ্তব্য যে, যোৱা ২৭ মে’ত বিধানসভাত এই বিধেয়কখন উত্থাপন কৰাৰ সময়ত সদনৰ মজিয়াত তীব্ৰ বিতৰ্কৰ সৃষ্টি হৈছিল। বিৰোধী দলৰ বিধায়কসকলে বিধেয়কখনৰ বিভিন্ন দিশৰ ওপৰত অধিক পৰ্যালোচনা আৰু বিস্তৃত আলোচনাৰ প্ৰয়োজনীয়তা দৰ্শাই ইয়াক 'চিলেক্ট কমিটী'লৈ প্ৰেৰণ কৰাৰ বাবে দাবী উত্থাপন কৰিছিল। কেইবা ঘণ্টাজোৰা আলোচনাৰ অন্তত যেতিয়া বিৰোধীৰ এই দাবী নাকচ কৰা হয়, তেতিয়া তেওঁলোকে সদনত তীব্ৰ প্ৰতিবাদ সাৱ্যস্ত কৰে। বিৰোধীৰ এই প্ৰতিবাদৰ মাজতেই অৱশেষত ‘ভইচ ভোট’ বা ধ্বনিভোটৰ জৰিয়তে বিধেয়কখন সদনত গৃহীত হৈছিল।
ৰাষ্ট্ৰপতিৰ অনুমোদন লাভ কৰাৰ পাছত এতিয়া ৰাজ্য চৰকাৰে আইনখন কাৰ্যকৰী কৰিবলৈ পৰৱৰ্তী পদক্ষেপ গ্ৰহণ কৰিব। চৰকাৰে অতি সোনকালেই প্ৰয়োজনীয় নীতি-নিয়মাৱলী প্ৰস্তুত কৰাৰ লগতে আনুষ্ঠানিক অধিসূচনা জাৰি কৰিব পাৰিব। এই নিয়মসমূহ জাৰি হোৱাৰ পাছতেই সমগ্ৰ ৰাজ্যজুৰি আইনখন আনুষ্ঠানিকভাৱে বলৱৎ হোৱাৰ পথ সুগম হ’ব। ইতিমধ্যে সকলোৰে জ্ঞাতাৰ্থে অসম বিধানসভাৰ চৰকাৰী ৱেবছাইটতো ‘The Uniform Civil Code, Assam, 2026’ বিধেয়কখন তালিকাভুক্ত কৰা হৈছে।
প্ৰসংগক্ৰমে উল্লেখযোগ্য যে, কেৱল অসমেই নহয়, গুজৰাট চৰকাৰৰ সম নাগৰিক সংহিতা বিধেয়কখনতো ৰাষ্ট্ৰপতিয়ে নিজৰ সন্মতি প্ৰদান কৰিছে। অসমৰ বিধেয়কখনত অনুমোদন জনোৱাৰ পূৰ্বে, যোৱা ১৭ ছেপ্টেম্বৰত গুজৰাটৰ UCC বিধেয়কখনতো ৰাষ্ট্ৰপতিয়ে অনুমোদন জনাইছিল।
