এই প্ৰকল্পটোৰ আটাইতকৈ চৰ্চিত বিষয়টো হৈছে ইয়াৰ মুকলিৰ প্ৰথম দিনটোতেই সকলো পেণ্টহাউচ বিক্ৰী হৈ যোৱাৰ দাবী। প্ৰকাশিত তথ্য অনুসৰি, ইয়াৰ প্ৰতিটো পেণ্টহাউচৰ মূল্য প্ৰায় ৫০ কোটি টকা। অৰ্থাৎ শ্বাহৰুখৰ নাম জড়িত হোৱাৰ লগে লগেই প্ৰকল্পটোৱে ৰিয়েল এষ্টেট জগতত এক ধুমুহাৰ সৃষ্টি কৰিলে। অৱশ্যে এই বিক্ৰীৰ সম্পূৰ্ণ স্বতন্ত্ৰ প্ৰমাণ উপলব্ধ নহ'লেও, কোম্পানীয়ে প্ৰদান কৰা তথ্য আৰু অনুষ্ঠানৰ ছবিসমূহে ইয়াৰ জনপ্ৰিয়তা আৰু চৰ্চা স্পষ্ট কৰি দিছে।
ডুবাই মেৰিটাইম চিটিত এক ৬০ মহলীয়া সপোনৰ কাৰেং
এই প্ৰকল্পটো ডুবাইৰ মেৰিটাইম চিটিত নিৰ্মাণ কৰা হৈছে, যিটো এটা ৬০ মহলীয়া ৱাটাৰফ্ৰণ্ট আৱাসিক টাৱাৰ হিচাপে গঢ় লৈ উঠিব। সাগৰৰ মনোমোহা দৃশ্য উপভোগ কৰিব পৰা এই বিলাসী প্ৰকল্পটোত ডেনিয়ুব প্ৰপাৰ্টিজৰ মতে মুঠ ১,১২৬ টা আৱাসিক গোট থাকিব। ইয়াৰ ভিতৰত ১ ৰ পৰা ৩ বেডৰুমৰ ফ্লেট, বিশেষ অ'চেন ৰেচিডেন্স আৰু বিলাসী পেণ্টহাউচ অন্তৰ্ভুক্ত। কোম্পানীটোৱে জনোৱা মতে, মুকলিৰ সময়লৈকে প্ৰায় ৫০০ জন আগ্ৰহী ক্ৰেতাই 'এক্সপ্ৰেচন অফ ইণ্টাৰেষ্ট' (EOI) দাখিল কৰিছিল, অৱশ্যে ইয়াক পোনচাটেই ৫০০ টা নিশ্চিত বুকিং বুলি ধৰা টান।
এই প্ৰকল্পৰ অন্যতম বিশেষত্ব হৈছে ইয়াৰ পেণ্টহাউচসমূহৰ ইণ্টিৰিয়ৰ ডিজাইন, যিটো স্বয়ং গৌৰী খানে প্ৰস্তুত কৰিছে। গৌৰী খান কেৱল শ্বাহৰুখৰ পত্নীয়েই নহয়, ইণ্টিৰিয়ৰ ডিজাইনৰ জগতখনত তেওঁৰ এক সুকীয়া আৰু সন্মানীয় স্থান আছে। তেওঁ ইয়াত এনে কিছুমান ঘৰৰ আৰ্হি প্ৰস্তুত কৰাৰ প্ৰয়াস কৰিছে য'ত এখন বিলাসী হাভেলিৰ আভিজাত্যৰ লগতে আধুনিক এপাৰ্টমেণ্টৰ সকলো সুবিধা আৰু ব্যৱহাৰিকতা উপলব্ধ হয়। অনুষ্ঠানত গৌৰী খানে কয় যে এই প্ৰকল্পটোৰ সৈতে তেওঁৰ এক আৱেগিক সম্পৰ্ক আছে আৰু তেওঁৰ দলে ইয়াত যথেষ্ট পৰিশ্ৰম কৰিছে। ডেনিয়ুব গ্ৰুপৰ পৰিচালন সঞ্চালক এডেল সাজনেও হাজাৰ হাজাৰ দৰ্শকৰ আগত শ্বাহৰুখ আৰু গৌৰী খানৰ এই অৱদান আৰু একাগ্ৰতাক মুকলিকৈ প্ৰশংসা কৰে।
এই টাৱাৰটোত কেৱল সাগৰৰ দৃশ্য বা বিলাসী ঘৰেই নহয়, ৪০ টাতকৈও অধিক বিলাসী সা-সুবিধা প্ৰদানৰ পৰিকল্পনা কৰা হৈছে। অত্যাধুনিক ফিটনেছ চেণ্টাৰ, ছুইমিং পুল, শিশুৰ খেলপথাৰ, ক্ৰীড়াংগন, চাইক্লিং আৰু জগিং ট্ৰেক, ৰুফটপ কিংছ ক্লাব আৰু ব্যক্তিগত য়াটৰ সুবিধাও ইয়াত উপলব্ধ হ'ব। ইয়াৰ উপৰি স্বাস্থ্য আৰু ৱেলনেছৰ বাবে ক্ৰায়'থেৰাপী, হাইপাৰবেৰিক অক্সিজেন থেৰাপী, ৰেড লাইট থেৰাপী আৰু ইনফাৰেড ছ'নাৰ দৰে অত্যাধুনিক ব্যৱস্থাও প্ৰস্তাৱ কৰা হৈছে। অৰ্থাৎ ডেনিয়ুবে ইয়াক কেৱল থকা ঠাই হিচাপে নহয়, এক সম্পূৰ্ণ বিলাসী জীৱনশৈলী হিচাপে গঢ়ি তুলিছে।
প্ৰকল্পটোত কেৱল ৫০ কোটি টকীয়া পেণ্টহাউচেই নহয়, সাধাৰণ ক্ৰেতাৰ বাবেও বিকল্প আছে। কোম্পানীৰ মতে, এপাৰ্টমেণ্টৰ আৰম্ভণি মূল্য হৈছে ১৬.৫ লাখ ডিৰহাম (ভাৰতীয় মুদ্ৰাত প্ৰায় ৪.২ কোটি টকা)। ক্ৰেতাসকলৰ সুবিধাৰ্থে ৩০:৭০ পেমেণ্ট প্লেন ৰখা হৈছে, য'ত নিৰ্মাণৰ সময়ত ৩০% আৰু ঘৰ চমজি পোৱাৰ সময়ত বাকী ৭০% ধন আদায় দিব লাগিব। ২০২৯ চনৰ শেষৰ ফালে এই প্ৰকল্প সম্পূৰ্ণ কৰি ক্ৰেতাক হস্তান্তৰ কৰাৰ লক্ষ্য নিৰ্ধাৰণ কৰা হৈছে।
ব্যৱসায়িক ৰণনীতিত শ্বাহৰুখ: "বনিয়াৰ মগজু আৰু মিঞা ভাইৰ সাহস"
শ্বাহৰুখ খানৰ ষ্টাৰডম কেৱল চিনেমাৰ সফলতাৰ মাজত সীমাবদ্ধ নহয়। তেওঁৰ জনপ্ৰিয়তা তেওঁৰ ৰাজহুৱা ভাৱমূৰ্তি, জীৱনশৈলী আৰু বিশ্বজুৰি থকা অনুৰাগীৰ সৈতে গভীৰভাৱে জড়িত। সেয়েহে তেওঁ আজি এক প্ৰভাৱশালী আন্তঃৰাষ্ট্ৰীয় ব্যৱসায়িক ব্ৰেণ্ড।
অনুষ্ঠানত ডেনিয়ুব গ্ৰুপৰ চেয়াৰমেন ৰিজৱান সাজনে তেওঁক জীৱন আৰু ব্যৱসায়িক চিন্তাৰ সৈতে খাপ খোৱা এটা প্ৰিয় চলচ্চিত্ৰীয় সংলাপৰ বিষয়ে সোধাত শ্বাহৰুখ খানে তেওঁৰ চিনাকি শৈলীত উত্তৰ দিয়ে- "বনিয়ে কা দিমাগ ঔৰ মিঞা ভাই কি ডেয়াৰিং" (বনিয়াৰ মগজু আৰু মিঞা ভাইৰ সাহস)।
তেওঁ জনায় যে তেওঁ ৰিস্ক ল'বলৈ ভয় নকৰে আৰু ভগৱানৰ কৃপাত তেওঁৰ ১০ টাৰ ভিতৰত ৮ টা সিদ্ধান্তই সফল হয়। তেওঁৰ মাতৃয়ে কোৱা "কোনো কামেই সৰু বা ডাঙৰ নহয়" কথাষাৰে তেওঁৰ ব্যৱসায়িক সমৰ্পণক প্ৰতিফলিত কৰে। ৰিজৱান সাজনেও শ্বাহৰুখৰ সৈতে তেওঁলোকৰ তিনি দশক পুৰণি পাৰিবাৰিক আৰু ব্যৱসায়িক সম্পৰ্কৰ কথা ব্যক্ত কৰে।
ডেনিয়ুব আৰু শ্বাহৰুখৰ দ্বিতীয় বৃহৎ অংশীদাৰিত্ব
উল্লেখ্য যে ডেনিয়ুব গ্ৰুপ আৰু শ্বাহৰুখৰ মাজত এয়া প্ৰথম ব্যৱসায়িক চুক্তি নহয়। ইয়াৰ পূৰ্বে ২০২৫ চনৰ নৱেম্বৰত কোম্পানীটোৱে শ্বাহৰুখৰ নামত 'শ্বাহৰুখছ বাই ডেনিয়ুব' নামৰ এটা কমাৰ্চিয়েল (বাণিজ্যিক) টাৱাৰ মুকলি কৰিছিল। ২.১ বিলিয়ন ডিৰহাম মূল্যৰ সেই প্ৰকল্পটোও মুকলিৰ দিনাই সম্পূৰ্ণৰূপে বিক্ৰী হৈ যোৱা বুলি দাবী কৰা হৈছিল। এতিয়া একেটা ব্ৰেণ্ডকে আৱাসিক খণ্ডতো ব্যৱহাৰ কৰা হৈছে, যিয়ে প্ৰমাণ কৰে যে এয়া কেৱল মাত্ৰ এটা প্ৰচাৰ অভিযান নহয়, বৰং এক সুচিন্তিত ব্যৱসায়িক ব্ৰেণ্ড।
ছ’চিয়েল মিডিয়াত এই অনুষ্ঠানৰ ভিডিঅ'সমূহ ব্যাপকভাৱে শ্বেয়াৰ কৰা হৈছে। কোকা-কোলা এৰিনাত উপস্থিত থকা বিশাল জনসমুদ্ৰ দেখি বহুতে মন্তব্য কৰিছে যে এয়া কোনো ৰিয়েল এষ্টেট প্ৰকল্পৰ মুকলি অনুষ্ঠান যেন লগা নাই, বৰং কোনো চিনেমাৰ প্ৰিমিয়াৰ বা মেগা মিউজিক কনচাৰ্টৰ দৰেহে লাগিছে। বহু অনুৰাগীয়ে তেওঁক এজন অভিনেতাতকৈও সফল ব্যৱসায়িক ৰণনীতিবিদ হিচাপে আখ্যা দিছে।
একাংশ ছ’চিয়েল মিডিয়া ব্যৱহাৰকাৰীয়ে যুক্তি আগবঢ়ায় যে শ্বাহৰুখ খানৰ প্ৰকৃত ব্যৱসায়িক শক্তি তেওঁৰ ছবিৰ বক্স অফিচৰ প্ৰদৰ্শনৰ দ্বাৰা জুখিব নালাগে। তেওঁ নিজৰ অভিনয় আৰু জনপ্ৰিয়তাক বিভিন্ন ব্যৱসায়িক খণ্ডত কেনেকৈ লাভৱান কৰিব জানে।
কিন্তু এই ডুবাই প্ৰজেক্টটোৱে আকৌ এবাৰ প্ৰশ্ন উত্থাপন কৰিছে যে এজন আন্তঃৰাষ্ট্ৰীয় চেলিব্ৰিটিৰ নামে ৰিয়েল এষ্টেট প্ৰজেক্টৰ বিক্ৰীত কিমানখিনি প্ৰভাৱ পেলাব পাৰে।
অৱশ্যে মন কৰিবলগীয়া কথাটো হ'ল, পেণ্টহাউচ বিক্ৰী হোৱা আৰু সমগ্ৰ আৱাসিক প্ৰকল্পটো বিক্ৰী হোৱা- দুয়োটা বেলেগ কথা। কোম্পানীয়ে কেৱল পেণ্টহাউচসমূহ বিক্ৰী হোৱাৰ কথাহে নিশ্চিত কৰিছে, সমগ্ৰ বিল্ডিংটোৰ নহয়। গতিকে এই কৃতিত্বক কোম্পানীয়ে যি প্ৰেক্ষাপটত ৰিপৰ্ট কৰিছে সেই প্ৰেক্ষাপটত চোৱা উচিত।
এই সফলতা শ্বাহৰুখ খানৰ ক্ষেত্ৰতো তাৎপৰ্যপূৰ্ণ কাৰণ তেওঁৰ কেৰিয়াৰ কেইবাটাও দশকত বিভিন্ন পৰ্যায়ৰ মাজেৰে পাৰ হৈ আহিছে। ৰোমাণ্টিক ছবি, একচন ছবি, গুৰুতৰ চৰিত্ৰত তেওঁ নিজৰ নাম অৰ্জন কৰিছে। তেওঁৰ ছবিৰ সংলাপ আজিও জনপ্ৰিয় হৈয়ে আছে। ভাৰতৰ বাহিৰতো তেওঁৰ নামত ডাঙৰ ডাঙৰ অনুষ্ঠান আৰু বাণিজ্যিক প্ৰকল্পৰ আয়োজন কৰা হৈছে, তাৰ পৰাই তেওঁৰ আন্তঃৰাষ্ট্ৰীয় জনপ্ৰিয়তা অনুমান কৰিব পাৰি।
ডুবাইৰ এই নতুন প্ৰকল্পটোৱে প্ৰমাণ কৰিছে যে শ্বাহৰুখ খানৰ যাদু কেৱল চিনেমাৰ পৰ্দাতেই আৱদ্ধ নহয়। এয়া হৈছে চেলিব্ৰিটি ব্ৰেণ্ডিং, ৰিয়েল এষ্টেট মাৰ্কেটিং, বিলাসী জীৱনশৈলী আৰু আন্তঃৰাষ্ট্ৰীয় বিনিয়োগৰ এক অনন্য নিদৰ্শন। গৌৰী খানৰ নান্দনিক ডিজাইন, ৰিজৱান সাজনৰ ব্যৱসায়িক দক্ষতা আৰু শ্বাহৰুখৰ গ্ল'বেল ব্ৰেণ্ড ভেল্যু- এই ত্ৰিৱেণী সংগমে ৰিয়েল এষ্টেট জগতত এক নতুন মাত্ৰা প্ৰদান কৰিছে। অৱশ্যে প্ৰকল্পটো সম্পূৰ্ণ হোৱাৰ পিছত গ্ৰাহকৰ অভিজ্ঞতাইহে ইয়াৰ প্ৰকৃত সফলতা নিৰ্ধাৰণ কৰিব। কিন্তু বৰ্তমানৰ বাবে, মুকলিৰ প্ৰথম দিনাই ৫০ কোটি টকীয়া পেণ্টহাউচৰ অভাৱনীয় বিক্ৰীয়ে পুনৰবাৰ সোঁৱৰাই দিছে- সঠিক ৰণনীতি আৰু ব্ৰেণ্ডিং থাকিলে বলীউডৰ দৰেই ব্যৱসায়িক জগতখনতো 'বাদশ্বাহ'ৰ ৰাজত্ব সদায় অটুট থাকিব!