গুৱাহাটী
বিশিষ্ট চলচ্চিত্ৰ নিৰ্মাতা জাহ্নু বৰুৱাৰ পত্নী গায়ত্ৰী বৰুৱাৰ বৃহস্পতিবাৰে পুনেত মৃত্যু হয়। চহৰখনৰ এখন ৰেস্ত্ৰোঁতত আহাৰ গ্ৰহণ কৰি থকা অৱস্থাত হৃদ্যন্ত্ৰৰ ক্ৰিয়া হঠাৎ বন্ধ হৈ পৰাৰ ফলত তেওঁৰ মৃত্যু হোৱা বুলি সন্দেহ কৰা হৈছে।
প্ৰাথমিক তথ্য অনুসৰি, পুনেৰ এখন ৰেস্ত্ৰোঁতত দুপৰীয়াৰ আহাৰ কিছু পলমকৈ গ্ৰহণ কৰি থকা সময়তে গায়ত্ৰী বৰুৱা হঠাৎ ঢলি পৰে। তেওঁক ততাতৈয়াকৈ ওচৰৰ এখন চিকিৎসালয়লৈ নিয়া হয়। তাত চিকিৎসকে পৰীক্ষা কৰি তেওঁক মৃত বুলি ঘোষণা কৰে।
জাহ্নু বৰুৱাৰ আত্মীয় তথা চলচ্চিত্ৰ নিৰ্মাতা মঞ্জুল বৰুৱাই সংবাদ মাধ্যমক জনোৱা অনুসৰি, গায়ত্ৰী বৰুৱা সম্ভৱতঃ পুনেৰ নেচনেল ফিল্ম আৰ্কাইভ অৱ ইণ্ডিয়া (এন এফ এ আই)ৰ কেণ্টিনত আছিল। তেওঁ তাত অসমীয়া চলচ্চিত্ৰ ‘হালধীয়া চৰায়ে বাওধান খায়’ৰ পুনৰুদ্ধাৰৰ কামত জড়িত হৈ আছিল।
মঞ্জুল বৰুৱাই কয়, “তেওঁ সম্ভৱতঃ পুনেৰ আৰ্কাইভৰ কেণ্টিনত আছিল। নেচনেল ফিল্ম আৰ্কাইভ অৱ ইণ্ডিয়াত তেওঁ অসমীয়া ছবি ‘হালধীয়া চৰায়ে বাওধান খায়’ৰ পুনৰুদ্ধাৰৰ কাম কৰি আছিল। দুপৰীয়াৰ আহাৰ কিছু পলমকৈ গ্ৰহণ কৰি থকা অৱস্থাতে তেওঁ হঠাৎ ঢলি পৰে। তেওঁক ততাতৈয়াকৈ চিকিৎসালয়লৈ নিয়া হয়, য’ত চিকিৎসকে তেওঁক পুনৰুজ্জীৱিত কৰাৰ চেষ্টা কৰে। অৱশ্যে তেওঁৰ মৃত্যুৰ প্ৰকৃত কাৰণ এতিয়াও নিৰ্ণয় হোৱা নাই।”
তেওঁ লগতে জনায় যে ঘটনাৰ পূৰ্বে গায়ত্ৰী বৰুৱাৰ কোনো জ্ঞাত অসুস্থতা, জ্বৰ বা অন্য লক্ষণ নাছিল। মৰণোত্তৰ পৰীক্ষাৰ পাছত মৃত্যুৰ প্ৰকৃত কাৰণ নিৰ্ণয় হ’ব বুলি তেওঁ আশা কৰে।
চলচ্চিত্ৰৰ প্ৰতি থকা উমৈহতীয়া অনুৰাগৰ সূত্ৰে গায়ত্ৰীৰ সৈতে জাহ্নু বৰুৱাৰ চিনাকি হৈছিল। ১৯৮৯ চনত তেওঁলোক বিবাহপাশত আবদ্ধ হয়। নিজেও এগৰাকী চলচ্চিত্ৰ নিৰ্মাতা হিচাপে পৰিচিত গায়ত্ৰীয়ে জাহ্নু বৰুৱাৰ সমগ্ৰ সৃষ্টিশীল যাত্ৰাত তেওঁক উৎসাহ আৰু প্ৰেৰণা যোগাই অহাৰ বাবে বহুলভাৱে স্বীকৃতি লাভ কৰিছিল।
ৰাষ্ট্ৰীয় বঁটাপ্ৰাপ্ত ছবি ‘বান্ধোন’ (ৱেভছ অৱ ছাইলেন্স)কে ধৰি জাহ্নু বৰুৱাৰ কেইবাখনো বহুল প্ৰশংসিত সৃষ্টিত গায়ত্ৰীৰ প্ৰত্যক্ষ প্ৰভাৱ আছিল। বাজেটৰ সীমাবদ্ধতাৰ বাবে মুম্বাইৰ ২৬/১১ৰ সন্ত্ৰাসবাদী আক্ৰমণক লৈ ছবি নিৰ্মাণ কৰিবলৈ জাহ্নু বৰুৱাই দ্বিধাবোধ কৰাৰ সময়ত গায়ত্ৰীয়ে তেওঁক স্বতন্ত্ৰভাৱে সীমিত বাজেটেৰে আগবাঢ়িবলৈ উৎসাহিত কৰিছিল।
