গুৱাহাটী
অসমত ৰে'ল যোগাযোগ ব্যৱস্থা অধিক শক্তিশালী কৰাৰ লক্ষ্যৰে গুৱাহাটী আৰু দিল্লীৰ মাজৰ ৰে'লপথ চাৰিটা ট্ৰেকলৈ সম্প্ৰসাৰণ কৰা হ'ব বুলি মুখ্যমন্ত্ৰী হিমন্ত বিশ্ব শৰ্মাই জানিবলৈ দিছে। এই সম্প্ৰসাৰণ সম্পূৰ্ণ হ’লে অঞ্চলটোৰ যাত্ৰী আৰু সামগ্ৰী পৰিবহণ ব্যৱস্থা অধিক উন্নত হোৱাৰ সম্ভাৱনা আছে।
মুখ্যমন্ত্ৰীগৰাকীয়ে কয় যে, দেশৰ ৭টা ৰে'লপথক চাৰিটা ট্ৰেকযুক্ত কৰিড'ৰলৈ ৰূপান্তৰ কৰাৰ কাম ইতিমধ্যে দ্ৰুতগতিত আগবাঢ়ি আছে। ইয়াৰোপৰি মুখ্যমন্ত্ৰী শৰ্মাই কয় যে, ব্ৰহ্মপুত্ৰৰ ওপৰত শৰাইঘাটত দ্বিতীয়খন ৰে'ল দলং নিৰ্মাণৰ কামো শীঘ্ৰেই আৰম্ভ হোৱাৰ সম্ভাৱনা আছে।
মুখ্যমন্ত্ৰীগৰাকীৰ মতে, ৰে’লপথৰ এই সম্প্ৰসাৰণৰ ফলত উক্ত পথেৰে চলাচল কৰা যাত্ৰী আৰু মালবাহী ৰে’লৰ সংখ্যা বৃদ্ধি কৰিব পৰা যাব। তেওঁ কয় যে প্ৰয়োজনীয় কিছু আনুষ্ঠানিকতা সম্পূৰ্ণ হোৱাৰ পিছতে ৰে’ল সেৱাৰ সংখ্যা বৃদ্ধি কৰাৰ কাম আগবঢ়োৱা হ’ব।
মুখ্যমন্ত্ৰী হিমন্ত বিশ্ব শৰ্মাই এই উন্নয়নক অসমৰ ৰে’ল যোগাযোগৰ ক্ষেত্ৰত এক গুৰুত্বপূৰ্ণ পদক্ষেপ হিচাপে অভিহিত কৰিছে। বিশেষকৈ নতুন দিল্লী আৰু দেশৰ অন্যান্য প্ৰান্তৰ সৈতে অসমৰ যোগাযোগ অধিক শক্তিশালী কৰাৰ ক্ষেত্ৰত এই ৰে’লপথ সম্প্ৰসাৰণে গুৰুত্বপূৰ্ণ ভূমিকা পালন কৰিব বুলি তেওঁ উল্লেখ কৰিছে।
