কোকৰাঝাৰ
বোড়োলেণ্ড টেৰিটৰিয়েল কাউন্সিল (BTC)ৰ সচিবালয়ত ছাত্ৰ সংগঠনৰ হিংসাত্মক প্ৰতিবাদৰ পিছত প্ৰশাসনে সচিবালয় চৌহদত কঠোৰ নিৰাপত্তা ব্যৱস্থা বলৱৎ কৰিছে। সচিবালয় চৌহদত জনসাধাৰণৰ প্ৰৱেশ সম্পূৰ্ণৰূপে নিষিদ্ধ কৰিছে প্ৰশাসনে।
১ ডিচেম্বৰত আৰম্ভ হ'বলগীয়া বিটিচিৰ বাজেট অধিৱেশনৰ পূৰ্বে এই ঘটনা সংঘটিত হয়। এটা ছাত্ৰ সংগঠনৰ প্ৰতিবাদকাৰীসকলে সচিবালয়ত প্ৰৱেশ কৰি সচিবালয়টোৰ ক্ষতিসাধন কৰে। এই ঘটনাত জড়িতসকলৰ বিৰুদ্ধে আইনী ব্যৱস্থা গ্ৰহণ কৰা হ'ব বুলি বিটিচিৰ বিষয়ববীয়াসকলে ইংগিত দিছে। সমগ্ৰ ঘটনাৰ তদন্ত অব্যাহত থকাৰ লগতে নিৰাপত্তাৰক্ষীয়ে সচিবালয়টোত নিৰাপত্তা ব্যৱস্থা কটকটীয়া কৰিছে।
২৯ নৱেম্বৰত ছাত্ৰ সংগঠনৰ প্ৰতিবাদত কোকৰাঝাৰত উত্তপ্ত পৰিৱেশৰ সৃষ্টি হৈছিল। দেৱৰগাঁৱৰ ৰাঙালীকাটাস্থিত বড়োলেণ্ড বিশ্ববিদ্যালয়ৰ হাজাৰ হাজাৰ প্ৰতিবাদী বড়ো ছাত্ৰই অসম চৰকাৰে ছয় জনগোষ্ঠীক অনুসূচীত জনজাতিৰ মৰ্যাদা প্ৰদানৰ সিদ্ধান্তৰ বিৰোধিতা কৰি বড়োফা নগৰৰ বিটিচি সচিবালয়ৰ দিশে সমদল উলিয়াইছিল। প্ৰতিবাদকাৰী ছাত্ৰ সংগঠনটোৱে চৰকাৰে বৰ্তমানৰ জনজাতীয় জনগোষ্ঠীসমূহৰ অধিকাৰ আৰু ৰাজনৈতিক সুৰক্ষাক ভেঙুচালি কৰাৰ অভিযোগ উত্থাপন কৰে।
দেৱৰগাঁও আৰু জে ডি ৰোডৰ মাজেৰে সমদল উলিয়াই ছাত্ৰ সংগঠনটোৱে বিটিআৰ নেতৃত্ব আৰু ৰাজ্যিক কৰ্তৃপক্ষৰ বিৰুদ্ধে তীব্ৰ শ্ল'গান দিয়ে। প্ৰতিবাদকাৰীসকলে বিটিআৰৰ মুখ্য কাৰ্যবাহী সদস্য প্ৰমোদ বড়ো, প্ৰাক্তন চিই এম হাগ্ৰামা মোহিলাৰী, উপ-চি ইএম গোবিন্দ বসুমতাৰী, মুখ্যমন্ত্ৰী হিমন্ত বিশ্ব শৰ্মা, শিক্ষা মন্ত্ৰী ৰণোজ পেগু আৰু বিধায়ক ৰংজগত নাৰ্জাৰীৰ বিৰুদ্ধে প্ৰতিবাদ সাব্যস্ত কৰে। 'হাগ্ৰামা মোহিলাৰী গ' বেক', 'প্ৰমোদ বড়ো গ' বেক', 'অসম চৰকাৰ হায় হায়', 'ছয় জনগোষ্ঠীৰ ST মৰ্যাদা বাতিল কৰক', 'ন্যায় আমাক লাগিবই' আদি শ্ল'গান দি চহৰখনৰ পৰিৱেশ উত্তাল কৰি তোলে।
মূল প্ৰৱেশদ্বাৰ ওফৰাই প্ৰতিবাদকাৰীসকলে বিটিচি সচিবালয়ত প্ৰৱেশ কৰে। কমাণ্ডো আৰু অসম আৰক্ষীকে ধৰি নিৰাপত্তাৰক্ষীসকলে প্ৰতিবাদী জনতাক নিয়ন্ত্ৰণ কৰাত ব্যৰ্থ হয়। প্ৰতিবাদত অধিক সংখ্যক ছাত্ৰ-ছাত্ৰীয়ে যোগদান কৰাৰ লগে লগে সচিবালয়ৰ চৌহদটো এক বৃহৎ প্ৰতিবাদৰ স্থলীলৈ ৰূপান্তৰিত হয়। প্ৰতিবাদকাৰীসকলে চৰকাৰক ST প্ৰস্তাৱ তৎকালীনভাৱে প্ৰত্যাহাৰ কৰিবলৈ দাবী জনায়।
