গুৱাহাটী
হিয়াৰ আমঠু জুবিন গাৰ্গৰ সৈতে জড়িত সেই অভিশপ্ত দিনটোৰ গোচৰটোৱে বৰ্তমান ন্যায়িক প্ৰক্ৰিয়াত এক নতুন আৰু নিৰ্ণায়ক মোৰ লৈছে। সেই বিশেষ দিনটোত এখন য়টত উঠি এটা নিৰ্দিষ্ট দ্বীপলৈ যাত্ৰা কৰা সময়ত শিল্পীগৰাকীৰ নিচেই কাষতে উপস্থিত আছিল পৰীক্ষিত শৰ্মা নামৰ ব্যক্তিগৰাকী। বগা চাৰ্ট পৰিধান কৰি য়টত জুবিন গাৰ্গৰ কাষতে থিয় হৈ থকা পৰীক্ষিত আছিল সমগ্ৰ ঘটনাপ্ৰৱাহৰ এক অন্যতম প্ৰত্যক্ষদৰ্শী।
এই স্পৰ্শকাতৰ গোচৰটোৰ তদন্তৰ স্বাৰ্থত বুধবাৰে পুৱাৰ ভাগতে আদালতৰ মজিয়াত উপস্থিত হয়হি পৰীক্ষিত শৰ্মা। জুবিন গাৰ্গৰ এই গোচৰটোত আদালতত থিয় হৈ সাক্ষ্য প্ৰদান কৰা তেওঁ হৈছে প্ৰথমজন প্ৰবাসী অসমীয়া সাক্ষী। পুৱাই আদালতত উপস্থিত হৈ তেওঁ ইতিমধ্যে নিজৰ ভাষ্য প্ৰদান কৰিছে।
উল্লেখযোগ্য যে, সমগ্ৰ গোচৰটোৰ ন্যায়িক প্ৰক্ৰিয়া তথা নিস্পত্তিৰ ক্ষেত্ৰত পৰীক্ষিত শৰ্মাৰ এই সাক্ষ্যদান আটাইতকৈ গুৰুত্বপূৰ্ণ হিচাপে বিবেচিত হৈছে। যিহেতু তেওঁ সেই দিনাৰ য়ট পাৰ্টিত শিল্পীগৰাকীৰ একেবাৰে সান্নিধ্যত আছিল, সেয়েহে তেওঁৰ ভাষ্যই ঘটনাৰ প্ৰকৃত সত্য উদ্ঘাটন কৰাত এক বিশেষ ভূমিকা পালন কৰিব।
