নতুন দিল্লী / পহলগাম / লক্ষ্ণৌ / জয়পুৰ
লিড্ডাৰ নদীৰ ঢৌবোৰ আজিও একেই গতিত বৈ আছে- যেন সময় তাত থমকি ৰোৱা নাই। কিন্তু নদীৰ পাৰত নীৰৱে থিয় দি থকা সেই স্মাৰকটোৱে প্ৰতিজন পথচাৰীক ক্ষন্তেকৰ বাবে হ'লেও ৰৈ যাবলৈ বাধ্য কৰে। ২০২৫ চনৰ ২২ এপ্ৰিলত বৈছাৰন উপত্যকাৰ সেই সেউজীয়া ঘাঁহনিডৰাত যি ঘটিছিল, সেয়া কেৱল ২৬টা নিৰাপৰাধ জীৱনৰ অকাল মৃত্যুৱেই নাছিল, বৰঞ্চ সমগ্ৰ দেশৰ বুকুত দকৈ বহি যোৱা এক মচিব নোৱৰা দাগ আছিল।
আজি সেই স্থান শোক, স্মৃতি আৰু এক অটল সংকল্পৰ প্ৰতীক হৈ পৰিছে। এতিয়া তালৈ মানুহ কেৱল প্ৰাকৃতিক সৌন্দৰ্য উপভোগ কৰিবলৈ নাযায়, যায় নীৰৱে থিয় দি কিছু সময় ভাবিবলৈ। সেই অব্যক্ত নীৰৱতা যিকোনো ভাষণতকৈ হাজাৰ গুণে বেছি শক্তিশালী। পহলগাম আক্ৰমণৰ এই বৰ্ষপূৰ্তি কেৱল এক শোকৰ দিন হৈ থকা নাই; ই এক স্পষ্ট বাৰ্তা কঢ়িয়াই আনিছে- সন্ত্ৰাসবাদক এতিয়া আৰু কোনো কাৰণতে সহ্য কৰা নহ'ব।
প্ৰতিনিধিত্বমূলক ছবি
সমগ্ৰ দেশজুৰি মুছলিম ৰাষ্ট্ৰীয় মঞ্চই আয়োজন কৰা সভা, প্ৰতিবাদ আৰু সমদলসমূহে এই দিনটোক এক গণ-আন্দোলনলৈ ৰূপান্তৰিত কৰিছে। ৰাজপথত মানুহৰ ক্ষোভ, চকুত চকুপানী, কিন্তু সকলোৰে ওপৰত আছিল- এক দৃঢ় সংকল্প। পুত্তলিকা দাহ কৰা হ'ল, শ্ল’গান দিয়া হ'ল আৰু প্ৰতিটো কণ্ঠত অনুৰণিত হ'ল একেটাই কথা- এতিয়া কেৱল প্ৰত্যুত্তৰ দিয়া হ'ব, আৰু সেয়া হ'ব চূড়ান্ত তথা নিৰ্ণায়ক।
ইন্দ্ৰেশ কুমাৰঃ এখন নিৰ্ণায়ক যুঁজ
ইন্দ্ৰেশ কুমাৰে অত্যন্ত কঠোৰ ভাষাৰে কয় যে 'অপাৰেচন সেন্দূৰ' কোনো সাময়িক পদক্ষেপ নহয়, বৰং সন্ত্ৰাসবাদৰ সম্পূৰ্ণ নিৰ্মূল নোহোৱালৈকে চলিবলগীয়া এক অভিযান। তেওঁৰ কথাত এক স্পষ্ট সকীয়নি আছিল- ভাৰত এতিয়া আৰু সকলো নীৰৱে সহ্য কৰি থকা দেশ হৈ থকা নাই। পাকিস্তান সমৰ্থিত সন্ত্ৰাসবাদে যদি পুনৰ মূৰ দাঙি উঠিবলৈ চেষ্টা কৰে, তেন্তে ইয়াৰ উত্তৰ পূৰ্বতকৈ বহু গুণে কঠোৰ আৰু নিৰ্ণায়ক হ'ব। তেওঁ লগতে কয় যে এই কঠোৰ কাৰ্যব্যৱস্থা হৈছে পহলগামৰ প্ৰতিগৰাকী ভুক্তভোগীৰ চকুপানীৰ প্ৰত্যুত্তৰ।
পাকিস্তানক প্ৰত্যক্ষ সকীয়নি- নীতিৰ ওপৰত প্ৰশ্ন
ইন্দ্ৰেশ কুমাৰে পাকিস্তানৰ নীতিৰ তীব্ৰ সমালোচনা কৰে। তেওঁ কয় যে সন্ত্ৰাসবাদক আশ্ৰয় দিয়া নীতিৰ পতন নিশ্চিত। তেওঁৰ মতে, পাকিস্তান বৰ্তমান তীব্ৰ আভ্যন্তৰীণ অস্থিৰতাত ভুগিছে আৰু অনাগত সময়ত ইয়াৰ ভয়ংকৰ পৰিণাম তেওঁলোকে ভুগিব লাগিব। তেওঁ এই কথাও দৃঢ়তাৰে কয় যে পাক অধীকৃত জম্মু আৰু কাশ্মীৰ (PoJK) এদিন ভাৰতৰ অংশ হ'ব- এয়া কেৱল এক দাবী নহয়, ভৱিষ্যতৰ এক নিশ্চিত দিশ।
ড০ শ্বাহিদ আখতাৰঃ এয়া সমগ্ৰ দেশৰ যুঁজ
ড০ শ্বাহিদ আখতাৰে কয় যে পহলগামৰ দৰে ঘটনাসমূহ কেৱল নিৰাপত্তাৰক্ষীৰ বাবে প্ৰত্যাহ্বান নহয়, সমগ্ৰ সমাজৰ বাবে এক সতৰ্কবাণী। সন্ত্ৰাসবাদৰ বিৰুদ্ধে যুঁজত প্ৰতিগৰাকী নাগৰিকৰ অংশগ্ৰহণ যে অত্যন্ত জৰুৰী, সেই কথা তেওঁ বিশেষভাৱে উল্লেখ কৰে। এনেধৰণৰ ঘটনা যাতে পুনৰাবৃত্তি নহয়, তাৰ বাবে চৰকাৰে আৰু অধিক কঠোৰ পদক্ষেপ গ্ৰহণ কৰিব লাগে বুলিও তেওঁ মত পোষণ কৰে।
ড০ শালিনী আলীঃ ভাৰতীয় সেনাই যোগ্য প্ৰত্যুত্তৰ দিছে
ড০ শালিনী আলীয়ে আৱেগিক হৈ কয় যে পহলগামত যিসকল পৰিয়ালে নিজৰ আপোনজনক হেৰুৱালে, তেওঁলোকৰ বেদনা সমগ্ৰ দেশে অনুভৱ কৰিছে। তেওঁ কয় যে ভাৰতীয় সেনাই ইয়াৰ যোগ্য প্ৰত্যুত্তৰ দিছে, কিন্তু প্ৰয়োজন হ'লে ইয়াতকৈয়ো কঠোৰ ব্যৱস্থা গ্ৰহণ কৰা হ'ব। দেশৰ মহিলাসকলকো এই যুঁজত দৃঢ়তাৰে থিয় দিবলৈ তেওঁ আহ্বান জনায়।
প্ৰতিনিধিত্বমূলক ছবি
মহম্মদ আফজলঃ এতিয়া আৰু আলোচনা নহয়, লোৱা হ'ব কাৰ্যব্যৱস্থা
মঞ্চৰ ৰাষ্ট্ৰীয় আহ্বায়ক মহম্মদ আফজলে স্পষ্টকৈ কয় যে এতিয়া কেৱল বিবৃতি দিয়াৰ সময় নাই। সন্ত্ৰাসবাদৰ বিৰুদ্ধে চলি থকা অভিযানসমূহ অবিৰতভাৱে আৰু অধিক তীব্ৰতৰ কৰিবলৈ তেওঁ দাবী জনায়। তেওঁৰ মতে, সন্ত্ৰাসবাদৰ শিপা সম্পূৰ্ণৰূপে উভালি পেলাব পাৰিলেহে শ্বহীদসকলৰ প্ৰতি প্ৰকৃত শ্ৰদ্ধাঞ্জলি জনোৱা হ'ব।
সমগ্ৰ দেশজুৰি ক্ষোভৰ দাবানলঃ এক কণ্ঠ, এক দাবী
পহলগামৰ বৰ্ষপূৰ্তিয়ে সমগ্ৰ দেশবাসীক পুনৰবাৰ সোঁৱৰাই দিলে যে সন্ত্ৰাসবাদ কেৱল এক সাধাৰণ অপৰাধ নহয়, ই এখন দেশৰ আত্মাৰ ওপৰত চলা এক নিৰ্মম প্ৰহাৰ। এইবাৰ দেশে কেৱল চকুপানী টুকিয়েই ক্ষান্ত থকা নাই, বুকুৰ ভিতৰত উমি উমি জ্বলি থকা ক্ষোভৰ জুইকুৰাক এক স্পষ্ট সংকল্পলৈ ৰূপান্তৰিত কৰিছে। বাৰ্তা একেবাৰেই স্পষ্টঃ 'আমি নাপাহৰোঁ আৰু কেতিয়াও এৰি নিদিওঁ।' যেতিয়ালৈকে সন্ত্ৰাসবাদৰ শেষৰটো শিপা উভালি পেলোৱা নহ'ব, তেতিয়ালৈকে এই যুঁজ থমকি নৰয়।
সেয়েহে মুছলিম ৰাষ্ট্ৰীয় মঞ্চৰ নেতৃত্বত সমগ্ৰ দেশৰ ৰাজপথত জনতাৰ এই স্বতঃস্ফূৰ্ত ক্ষোভৰ বহিঃপ্ৰকাশ ঘটিছে। ক'ৰবাত যদি সমদল ওলাইছে, ক'ৰবাত আকৌ সন্ত্ৰাসবাদৰ প্ৰতীকৰ পুত্তলিকা দাহ কৰা হৈছে। প্ৰতিখন চহৰ, প্ৰতিখন সভাতে কেৱল একেটাই ধ্বনি- এতিয়া আৰু কোনো নৰম স্থিতি নহয়, হ'ব কেৱল পোনপটীয়া আৰু নিৰ্ণায়ক কাৰ্যব্যৱস্থা।
এয়া মাত্ৰ এক প্ৰতিবাদ নাছিল, আছিল জনসাধাৰণৰ অন্তৰৰ পৰা নিগৰি অহা এক আৱেগ, যিয়ে স্পষ্টকৈ কৈ দিছে যে দেশে এতিয়া আৰু অপেক্ষা নকৰে। জনতাই একমুখে চৰকাৰ আৰু সেনাক আহ্বান জনাইছে- সন্ত্ৰাসবাদৰ বিৰুদ্ধে এই অভিযান যাতে কেতিয়াও স্তব্ধ নহয়, কাৰো ওচৰত শিৰনত নকৰে, বৰং ইয়াৰ গতি আৰু অধিক তীব্ৰতৰ হ’ব লাগে।
