নতুন দিল্লী
নাগৰিকত্ব আৰু বিদেশী হিচাপে কোনো ব্যক্তিৰ মৰ্যাদা নিৰ্ধাৰণৰ ক্ষেত্ৰত ন্যায়সংগত, আইনী আৰু যুক্তিসংগত প্ৰক্ৰিয়া অনুসৰণ কৰাটো বাধ্যতামূলক বুলি সোমবাৰে গুৰুত্বপূৰ্ণ মন্তব্য কৰিছে উচ্চতম ন্যায়ালয়ে। এই মন্তব্যৰ লগতে অসমৰ ২৭ জন ব্যক্তিক বিদেশী বুলি ঘোষণা কৰা গুৱাহাটী উচ্চ ন্যায়ালয়ৰ ৰায়সমূহ বাতিল কৰি পুনৰ বিচাৰৰ বাবে সংশ্লিষ্ট বিদেশী ন্যায়াধিকৰণ (Foreigners Tribunal)লৈ প্ৰেৰণ কৰে উচ্চতম ন্যায়ালয়ে।
ন্যায়াধীশ বিক্ৰম নাথ আৰু সন্দীপ মেহতাৰ বিচাৰপীঠে ২৭খন আবেদনৰ অনুমতি প্ৰদান কৰি গোচৰসমূহ নতুনকৈ বিচাৰৰ বাবে নিজ নিজ বিদেশী ন্যায়াধিকৰণলৈ প্ৰেৰণ কৰে। আদালতে কয় যে, নাগৰিকত্ব আৰু বিদেশী মৰ্যাদা এক উল্লেখযোগ্য সাংবিধানিক আৰু আইনী গুৰুত্বপূৰ্ণ বিষয়। সেয়েহে এনে গোচৰৰ নিষ্পত্তিৰ ক্ষেত্ৰত ন্যায়পৰায়ণতাৰ নীতি কঠোৰভাৱে পালন কৰাটো প্ৰয়োজনীয়।
আদালতে কয় যে, যিসকল ব্যক্তি ভাৰতীয় নাগৰিকত্ব লাভৰ আইনী অধিকাৰী নহয়, তেওঁলোকে যাতে মিছা তথ্য, জাল নথি বা আইনী প্ৰক্ৰিয়াৰ অপব্যৱহাৰৰ জৰিয়তে নাগৰিকত্ব লাভ কৰিব নোৱাৰে, সেইটো নিশ্চিত কৰাটো চৰকাৰৰ বৈধ আৰু যুক্তিসংগত দায়িত্ব। কিন্তু এই লক্ষ্য পূৰণৰ নামত আইনী প্ৰক্ৰিয়া আৰু ন্যায়সংগত শুনানিৰ অধিকাৰ অৱহেলা কৰিব নোৱাৰি।
উচ্চতম ন্যায়ালয়ে স্পষ্ট কৰি দিয়ে যে, বিদেশী আইন, ১৯৪৬ৰ ধাৰা ৯ অনুসৰি নিজৰ নাগৰিকত্ব প্ৰমাণ কৰাৰ দায়িত্ব আবেদনকাৰীৰ ওপৰতে থাকিব। অৱশ্যে সেই প্ৰমাণ মূল্যায়নৰ প্ৰক্ৰিয়াটো ন্যায়সংগত, আইনী আৰু যুক্তিসংগত হোৱাটো নিশ্চিত কৰিব লাগিব।
আদালতে লগতে উল্লেখ কৰে যে, এই ৰায়ৰ জৰিয়তে আবেদনকাৰীসকলৰ নাগৰিকত্বৰ দাবীৰ সাৰ্থকতা বা তেওঁলোকে দাখিল কৰা নথি-পত্ৰৰ সত্যতা সম্পৰ্কে কোনো মতামত প্ৰকাশ কৰা হোৱা নাই। এই সকলো বিষয় সংশ্লিষ্ট বিদেশী ন্যায়াধিকৰণে স্বাধীনভাৱে পুনৰ পৰ্যালোচনা কৰি সিদ্ধান্ত ল'ব।
শীৰ্ষ আদালতে এইটোও স্পষ্ট কৰি দিয়ে যে, গোচৰসমূহ পুনৰ ন্যায়াধিকৰণলৈ ঘূৰাই পঠিওৱাৰ অৰ্থ আবেদনকাৰীসকলক কোনো বিশেষ সুবিধা বা আইনী ৰেহাই দিয়া নহয়। যদি কোনো ব্যক্তিয়ে নিজৰ ভাৰতীয় নাগৰিকত্ব প্ৰমাণ কৰিব নোৱাৰে, তেন্তে তেওঁ আইন অনুসৰি বিদেশী হিচাপেই বিবেচিত হ'ব। এই পুনৰ শুনানিৰ উদ্দেশ্য কেৱল এইটোৱেই যে, বিদেশী ঘোষণা কৰাৰ দৰে গুৰুত্বপূৰ্ণ সিদ্ধান্ত ন্যায়সংগত আৰু আইনী প্ৰক্ৰিয়া অনুসৰি গ্ৰহণ কৰা হওক।
এই ৰায়ৰ ফলত গুৱাহাটী উচ্চ ন্যায়ালয়ৰ পূৰ্বৰ ৰায়ৰ লগতে সংশ্লিষ্ট বিদেশী ন্যায়াধিকৰণসমূহে জাৰি কৰা মতামত আৰু আদেশসমূহো বাতিল কৰা হৈছে। আদালতে ন্যায়াধিকৰণসমূহক পূৰ্বৰ কোনো পৰ্যবেক্ষণ বা মন্তব্যৰ প্ৰভাৱ নপৰাকৈ স্বাধীনভাৱে নতুনকৈ গোচৰসমূহ নিষ্পত্তি কৰিবলৈ নিৰ্দেশ দিছে।
উল্লেখ্য যে, ২৭ জন আবেদনকাৰীৰ ভিতৰত সবিত্ৰী দে, আজবাহাৰ আলী, মহম্মদ আকবৰ আলী, আবেদা খাতুন আৰু আনোৱাৰা খাতুনে উচ্চতম ন্যায়ালয়ত অভিযোগ কৰিছিল যে, পুৰণি ভোটাৰ তালিকাত নামৰ বানানৰ সৰু-সুৰা ভুল বা টাইপগত ত্ৰুটিৰ দৰে অতি সামান্য কাৰণ দেখুৱাই তেওঁলোকক বিদেশী ঘোষণা কৰা হৈছিল।
এই আবেদনকাৰীসকলে প্ৰথমে অসমৰ বিভিন্ন বিদেশী ন্যায়াধিকৰণৰ আদেশক গুৱাহাটী উচ্চ ন্যায়ালয়ত প্ৰত্যাহ্বান জনাইছিল। পিছত সেই ৰায়ৰ বিৰুদ্ধে কেন্দ্ৰীয় চৰকাৰক পক্ষ কৰি উচ্চতম ন্যায়ালয়ৰ কাষ চাপিছিল।
