নতুন দিল্লী
আৰাৱলী পৰ্বতমালাক সম্পূৰ্ণৰূপে সুৰক্ষিত কৰাৰ বাবে কেন্দ্ৰীয় চৰকাৰে এক বৃহৎ পদক্ষেপ গ্ৰহণ কৰিছে। পৰিৱেশ, বন আৰু জলবায়ু পৰিৱৰ্তন মন্ত্ৰালয়ে সংশ্লিষ্ট সকলো ৰাজ্যকে নিৰ্দেশ দিছে যে আৰাৱলী অঞ্চলত কোনো নতুন খননৰ অনুমতি প্ৰদান কৰা নহ’ব। এই নিষেধাজ্ঞা গুজৰাটৰ পৰা দিল্লীলৈকে সমগ্ৰ আৰাৱলী ৰেঞ্জত সমানে প্ৰযোজ্য হ’ব। অবৈধ আৰু অনিয়ন্ত্ৰিত খনন সম্পূৰ্ণৰূপে বন্ধ কৰি আৰাৱলীক বহনক্ষম ভূ-ৰূপ হিচাপে সংৰক্ষণ কৰাৰ লক্ষ্য লৈছে চৰকাৰে। শেহতীয়া বিতৰ্কৰ মাজতে কেন্দ্ৰীয় চৰকাৰে গ্ৰহণ কৰিছে এই সিদ্ধান্ত।
দিল্লী-এন চি আৰৰ বায়ু পৰিষ্কাৰ কৰি ৰখা, মৰুভূমি সম্প্ৰসাৰণ ৰোধ কৰা, ভূগৰ্ভস্থ পানী সংৰক্ষণ কৰা, জৈৱ বৈচিত্ৰ্য সংৰক্ষণৰ ক্ষেত্ৰত আৰাৱলী পৰ্বতমালাই গুৰুত্বপূৰ্ণ ভূমিকা পালন কৰে। কেন্দ্ৰীয় চৰকাৰে এইসমূহৰ দীৰ্ঘম্যাদী সুৰক্ষাৰ প্ৰতি দৃঢ় দায়বদ্ধতা প্ৰদৰ্শন কৰিছে।
সমগ্ৰ আৰাৱলী অঞ্চলত কোনো নতুন খনন অনুমতি প্ৰদান কৰা নহ’ব। অবৈধ খননৰ ক্ৰমবৰ্ধমান সমস্যাৰ প্ৰতি লক্ষ্য ৰাখি এই সিদ্ধান্ত লোৱা হৈছে। ইয়াৰ দ্বাৰা আৰাৱলী অঞ্চলৰ প্ৰাকৃতিক গঠন সংৰক্ষণ আৰু পৰিৱেশৰ ক্ষতি ৰোধ কৰা হ’ব।
কেন্দ্ৰীয় চৰকাৰে ইণ্ডিয়ান কাউন্সিল অফ ফৰেষ্ট্ৰি ৰিচাৰ্ছ এণ্ড এডুকেশ্যন(ICFRE)এ সমগ্ৰ আৰাৱলী অঞ্চলৰ অতিৰিক্ত অঞ্চল চিনাক্ত কৰিবলৈ নিৰ্দেশ দিছে য’ত খনন সম্পূৰ্ণ নিষিদ্ধ হ’ব। ইতিমধ্যে নিষিদ্ধ কৰা অঞ্চলসমূহৰ উপৰিও ই পৰিৱেশ, ভূতাত্ত্বিক আৰু ভূ-প্ৰকৃতিৰ বিবেচনাৰ ওপৰত ভিত্তি কৰি হ’ব।
ICFREয়ে সমগ্ৰ আৰাৱলী অঞ্চলৰ বাবে বৈজ্ঞানিক আৰু ব্যাপক বহনক্ষম খনি ব্যৱস্থাপনা পৰিকল্পনা প্ৰস্তুত কৰিব। এই পৰিকল্পনাত পৰিৱেশ প্ৰভাৱৰ বিস্তৃত মূল্যায়ন, স্পৰ্শকাতৰ অঞ্চল চিনাক্তকৰণ, পুনৰুদ্ধাৰৰ ব্যৱস্থা আৰু খনন বহন ক্ষমতাৰ অধ্যয়ন অন্তৰ্ভুক্ত কৰা হ’ব। পৰিকল্পনা সম্পূৰ্ণ হ’লে সকলো অংশীদাৰৰ পৰা পৰামৰ্শ লাভৰ বাবে ইয়াক ৰাজহুৱা কৰা হ’ব। বিশেষকৈ স্থানীয় ভূ-প্ৰকৃতি, পৰিৱেশ বিজ্ঞান আৰু জৈৱ বৈচিত্ৰ্যৰ কথা বিবেচনা কৰিলে ইয়াৰ ফলত আৰাৱলী অঞ্চলৰ সংৰক্ষিত অঞ্চলটো আৰু অধিক সম্প্ৰসাৰিত হ’ব।
ইতিমধ্যে কাৰ্যক্ষম খনিসমূহৰ বাবে ৰাজ্য চৰকাৰসমূহক পৰিৱেশ সম্পৰ্কীয় সকলো নিয়ম কঠোৰভাৱে বলবৎ কৰিবলৈ নিৰ্দেশ দিয়া হৈছে। উচ্চতম ন্যায়ালয়ৰ নিৰ্দেশ অনুসৰি চলি থকা খনন কাৰ্যকলাপত অতিৰিক্ত বাধা আৰোপ কৰা হ’ব। পৰিৱেশৰ যাতে কোনো ক্ষতি নহয় তাৰ বাবে বহনক্ষম খনন নিয়ম কঠোৰভাৱে পালন কৰিব লাগিব।
