নতুন দিল্লী
উচ্চতম ন্যায়ালয়ে মুছলমান পুৰুষৰ দ্বাৰা পত্নীক অধিবক্তাৰ জৰিয়তে তিনি তালাকৰ জাননী প্ৰেৰণ কৰা প্ৰথা সন্দৰ্ভত গুৰুতৰ প্ৰশ্ন উত্থাপন কৰিছে। স্বামীৰ স্বাক্ষৰ নথকা তালাকৰ জাননী প্ৰেৰণেৰে দিয়া তালাকক বৈধ বুলি গণ্য কৰা নহ’ব বুলি আদালতে উল্লেখ কৰে।
"যদি তালাক নামাত স্বামীয়ে স্বাক্ষৰ নকৰে আৰু কোনো অধিবক্তা বা তৃতীয় পক্ষই জাননী প্ৰেৰণ কৰে, তেন্তে মহিলাগৰাকী গুৰুতৰ ক্ষতিৰ সন্মুখীন হ'ব পাৰে। যদি তেওঁ ভৱিষ্যতে পুনৰ বিবাহ কৰিবলৈ বিচাৰে, তেনেহ'লে নতুন স্বামীয়ে তেওঁৰ তালাকক অবৈধ বুলি ঘোষণা কৰি তেওঁক বাধা দিব পাৰে।"- উচ্চতম ন্যায়ালয়৷
অধিবক্তা-স্বামীৰ প্ৰথাত আপত্তি
এগৰাকী টিভি সাংবাদিকৰ আবেদনৰ শুনানি গ্ৰহণ কৰি জ্যেষ্ঠ অধিবক্তা ৰিজৱান আহমেদে কয় যে তেওঁৰ স্বামী-অধিবক্তাই তালাকৰ জাননী প্ৰেৰণ কৰিছিল, তালাক চূড়ান্ত কৰিছিল আৰু পিছত পুনৰ বিবাহপাশত আৱদ্ধ হৈছিল। আদালতে কয়, '‘কোনো তৃতীয় পক্ষৰ মহিলাক তালাকৰ জাননী প্ৰদান কৰাৰ অধিকাৰ নাই। এয়া মুছলমান নাৰীৰ মৰ্যাদাৰ পৰিপন্থী।’’
শ্বৰীয়ত আইন মানি চলাটো জৰুৰী
আদালতে অধিবক্তা-স্বামীক শ্বৰীয়ত আইন অনুসৰি বৈধ বিবাহ বিচ্ছেদ কৰিবলৈ কয়। বেনজিৰ হীনা নামৰ মহিলাগৰাকীক নিজৰ লগতে তেওঁৰ সন্তানৰ কল্যাণ আৰু শিক্ষাৰ বাবে আবেদন দাখিল কৰিবলৈ নিৰ্দেশ দিয়া হয়।
উচ্চতম ন্যায়ালয়ৰ বাৰ্তা
উচ্চতম ন্যায়ালয়ে মুছলিম সমাজত প্ৰচলিত একপক্ষীয় তালাক-এ-হছান প্ৰক্ৰিয়াৰ বৈধতা বিবেচনা কৰাৰ ইংগিত দি কয় যে এই সিদ্ধান্ত কেৱল শিক্ষিত বা আদালতলৈ যাব পৰা মহিলাসকলৰ মাজতে সীমাবদ্ধ থাকিব নালাগে, গ্ৰাম্য আৰু অশিক্ষিত মহিলাসকলৰ বাবেও ন্যায় সুনিশ্চিত কৰিব লাগিব।
