গুৱাহাটী
অসম ডন বস্কো বিশ্ববিদ্যালয়ৰ আজাৰা প্ৰাংগনত মঙ্গলবাৰে ৰাষ্ট্ৰীয় শিক্ষানীতিৰ ওপৰত এখনি এদিনীয়া কৰ্মশালাৰ আয়োজন কৰা হয়। পুৱা ৯ বজাৰ পৰা বিয়লি ৫ বজালৈ অনুষ্ঠিত হোৱা এই কৰ্মশালাখনত ডন বস্কোৰ অৰ্ন্তগত অসমৰ বিভিন্ন প্ৰান্তৰ শিক্ষানুষ্ঠানসমূহৰ শিক্ষকসকলক ৰাষ্ট্ৰীয় শিক্ষানীতিৰ বিভিন্ন বিষয়ৰ ওপৰত প্ৰশিক্ষণ দিয়া হয়। বিশ্ববিদ্যালয়ৰ আজাৰা প্ৰাংগণৰ ৰেক্টৰ ফাডাৰ কে জে থমাছৰ প্ৰাৰ্থনাৰে আৰম্ভ হোৱা কৰ্মশালাখনত উদ্বোধনী ভাষণ প্ৰদান কৰে অসম ডন বস্কো উপাচাৰ্য্য ফাডাৰ ড০ জোছ পেলেলিয়ে।
ইয়াৰ পিছতে বিশ্ববিদ্যালয়ৰ শিক্ষাৰ্থীসকলে নৃত্য পৰিবেশন কৰে আৰু বিশ্ববিদ্যালয়ৰ অধ্যাপক সকলে উপস্থাপন কৰা আদৰণি সংগীতেৰে সকলোকে আদৰণি জনোৱা হয়। গুৱাহাটী প্ৰভিন্সৰ প্ৰভিন্সিয়েল ফাডাৰ চেবাষ্টিয়ান মেথিউৱে কৰ্মশালাখনিৰ উদ্বোধনী অনুষ্ঠানটিত মূখ্য অতিথি হিচাপে উপস্থিত থাকি মূল ভাষণ প্ৰদান কৰে। আধুনিক শিক্ষাৰ প্ৰেক্ষাপটত ডন বস্কোৰ দৃষ্টিভংগীৰ ওপৰত গুৰুত্বৰ ওপৰত আলোকপাত কৰি তেখেতে ভাষণ আগবঢ়ায়। ইয়াৰ পিছতে বিশ্ববিদ্যালয়ৰ ইলেক্ট্ৰনিকছ আৰু কমিউনিকেছন ইঞ্জিনীয়াৰিং বিভাগ আৰু মেকানিকেল ইঞ্জিনীয়াৰিং বিভাগৰ সৃষ্টিশীল আৰু শৈক্ষিক অৱদানক চিহ্নিত কৰি বিভাগীয় বাতৰি কাকত আনুষ্ঠানিকভাৱে প্ৰকাশ কৰা হয়।
ইয়াৰ পিছতে অধ্যাপক মনোৰঞ্জন কলিতাই বিশ্ববিদ্যালয়খনৰ শৈক্ষিক শক্তি আৰু ভৱিষ্যত পৰিকল্পনাৰ বিষয়ে আলোকপাত কৰি “এডিবিইউ – দ্য প্ৰিফাৰেণ্ড ইউনিভাৰ্চিটি” শীৰ্ষক এক অন্তৰ্দৃষ্টিসম্পন্ন উপস্থাপন আগবঢ়ায়। কৰ্মশালাখনৰ কাৰিকৰী অধিবেশনসমূহত ড° বিক্ৰমজিৎ গোস্বামীয়ে ৰাষ্ট্ৰীয় শিক্ষা নীতিৰ উল্লেখযোগ্য বৈশিষ্ট্যসমূহৰ ওপৰত, ড° বিজয় প্ৰসাদে শিক্ষকতাত ডিজিটেল আৰু কৃত্ৰিম বুদ্ধিমত্তাৰ প্ৰয়োগৰ ওপৰত, বিশ্ববিদ্যালয়ৰ সম উপাচাৰ্য্য ফাডাৰ যোচেফ নেল্লানাটে শিক্ষক আৰু ছাত্ৰ-ছাত্ৰীৰ বাবে ডিজিটেল সম্পদৰ ওপৰত এক অধিবেশন উপস্থাপন কৰি শিক্ষা খণ্ডত ডিজিটেল ৰূপান্তৰৰ ওপৰত আলোকপাত কৰে।
গাইডযুক্ত কেম্পাছ ভ্ৰমণে অংশগ্ৰহণকাৰীসকলক বিশ্ববিদ্যালয়খনৰ অত্যাধুনিক সুবিধাসমূহ অন্বেষণ কৰিবলৈ সুযোগ প্ৰদান কৰে। ইয়াৰ পিছত গুৱাহাটী প্ৰভিন্সৰ উপ প্ৰভিন্সিয়েল ফাডাৰ বিভান ৰড্ৰিকেছ মুখিমে ডন বস্কোৰ শিক্ষাপ্ৰণালীৰ ওপৰত ফাডাৰ লুকোজ চেৰুভেলেলে অনগ্ৰসৰসকলৰ শিক্ষা আৰু সামাজিক দায়বদ্ধতাৰ ওপৰত আলোকপাত কৰে। অধ্যাপক বিক্ৰমজিৎ কাকতি আৰু অধ্যাপক ববি শৰ্মাই অংশগ্ৰহণকাৰীসকলক ডিজাইন থিংকিং এণ্ড ইনোভেচনৰ সৈতে পৰিচয় কৰাই দিয়ে, তাৰ পিছত ড° বামদেৱ দেয়ে বিজ্ঞান আৰু গণিত পাঠদানৰ সৃষ্টিশীল পদ্ধতিৰ ওপৰত ভাষণ প্ৰদান কৰে । অধ্যাপক দীনেশ বৈশ্যই ভাৰতীয় আৰু খিলঞ্জীয়া জ্ঞান ব্যৱস্থাৰ ওপৰত ভাষণ প্ৰদান কৰে।
অতিথিসকলক সম্বৰ্ধনা, স্মৃতিগ্ৰন্থ উপস্থাপন, অংশগ্ৰহণকাৰীসকলৰ পৰা মতামত, আৰু অংশগ্ৰহণৰ প্ৰমাণপত্ৰ বিতৰণৰ সৈতে কাৰ্যসূচীৰ সামৰণি পৰে।
এই কৰ্মশালাখনে ডন বস্কোৰ শিক্ষাবিদসকলৰ পাঠদান, সামগ্ৰিক বিকাশ, আৰু সমাজ পৰিৱৰ্তনৰ ক্ষেত্ৰত উৎকৃষ্টতাৰ প্ৰতি থকা দায়বদ্ধতাক উদযাপন আৰু শক্তিশালী কৰাৰ এক মঞ্চ হিচাপে কাম কৰিব বুলি আশা প্ৰকাশ কৰা হয়। ইয়াত উদ্ভাৱনীমূলক শিক্ষাবিজ্ঞানৰ সঁজুলি, ডিজিটেল সংহতি, আৰু চেলেছিয়ান শৈক্ষিক পৰম্পৰাৰ মূল্যবোধৰ দ্বাৰা শিক্ষকসকলক শক্তিশালী কৰাৰ ওপৰত গুৰুত্ব প্ৰদান কৰা হয়।
