ইছলামে সন্ত্ৰাসবাদক সমৰ্থন নকৰেঃ গুৱাহাটীৰ বুঢ়া জামে মছজিদত পহলগাম নৰসংহাৰৰ প্ৰতিবাদ
আতিৰ খান
পহলগাম সন্ত্ৰাসবাদী আক্ৰমণৰ পিছত ভাৰতীয় মুছলমানসকলৰ প্ৰতিবাদ এক ইতিবাচক আৰু চিন্তা-উদ্দীপক পৰিঘটনা হিচাপে চিহ্নিত হৈছে। এই প্ৰতিবাদবোৰ স্বতঃস্ফূৰ্ত আৰু আধ্যাত্মিকভাৱে শক্তিশালী আছিল আৰু ই দেশৰ প্ৰতি মুছলমানসকলৰ গভীৰ প্ৰেমৰ পৰিচয় দিছে। দেশৰ সকলো প্ৰান্তত ভাৰতীয় মুছলমানসকলে প্ৰদৰ্শন কৰা এই প্ৰতিবাদৰ পৰিসৰ, আন্তৰিকতা আৰু প্ৰভাৱ সঁচাকৈয়ে অভূতপূৰ্ব আছিল।
আক্ৰমণৰ মাত্ৰ কেইদিনমান পূৰ্বে ভাৰতীয় মুছলমানসকলে ৱাকফ সংশোধনী আইনৰ বিৰুদ্ধে সক্ৰিয়ভাৱে প্ৰতিবাদ সাব্যস্ত কৰি আছিল। কিন্তু পহলগাম কাণ্ডৰ ভয়াবহ স্বৰূপে মুছলমান সমাজক গভীৰভাৱে বিচলিত কৰে আৰু তেওঁলোকে স্বতঃস্ফূৰ্তভাৱে সন্ত্ৰাসবাদৰ বিৰুদ্ধে বিক্ষোভ প্ৰদৰ্শনত নামে।
ৱাকফ আইনৰ বিৰুদ্ধে পূৰ্বৰ প্ৰতিবাদসমূহ দেশৰ বৃহত্তৰ স্বাৰ্থৰ বাবে স্থগিত ৰখা হৈছে। সন্ত্ৰাসবাদীৰ ওপৰত ক্ষোভ প্ৰকাশ কৰি ভাৰতীয় মুছলমান সমাজ ওলাই অহাৰ ঘটনা সঁচাকৈয়ে উল্লেখযোগ্য। ইয়াৰ কাৰণ আছিল এই প্ৰতিবাদৰ ব্যাপকতা আৰু স্বতঃস্ফূৰ্ততা। আনকি যিসকলে ভাৰতীয় মুছলমানসকলক ৰাষ্ট্ৰীয় সংকটৰ সময়ত মাত নামাতে বুলি প্ৰায়ে সমালোচনা কৰে, তেওঁলোকো এইবাৰ আচৰিত হৈছে।
জম্মু-কাশ্মীৰৰ ৰামবানত অৱস্থিত দাৰুল উলুম ছাবিল উল হুদাৰ শিক্ষাৰ্থীসকলে মমবাতি জ্বলাই নিহতসকলৰ প্ৰতি শোক প্ৰকাশ কৰিছে
ভাৰতীয় মুছলমানৰ একত্ৰিত আৰু সমন্বিত প্ৰতিবাদে সকলোৱে দৃষ্টি আকৰ্ষণ কৰিছে। ৰাজপথত শান্তিপূৰ্ণ প্ৰতিবাদ, মমবাতিৰ পোহৰত সমদল, আৰু ছ’চিয়েল মিডিয়াত নিন্দাৰ এক শক্তিশালী বাৰ্তা দেখা গৈছিল, যিবোৰে ভাৰতীয় মুছলমানৰ জাতীয় পৰিচয়ক সুদৃঢ় কৰাত সহায় কৰিছে।
এই ৰাজহুৱা আন্দোলনে দীৰ্ঘদিনীয়া কু-সংস্কাৰকো প্ৰত্যাহ্বান জনাইছে যে ভাৰতীয় মুছলমানসকলে নিজৰ জাতীয় পৰিচয়তকৈ বিশ্বব্যাপী মুছলমান সম্প্ৰদায়ক (উম্মাহ) অগ্ৰাধিকাৰ দিয়ে। ইয়াৰ বিপৰীতে এই ঘটনাবোৰে ধৰ্ম নিৰ্বিশেষে তেওঁলোকৰ সতীৰ্থ নাগৰিকসকলৰ সৈতে এক গভীৰ আৱেগিক সম্পৰ্কও প্ৰতিফলিত কৰিছে। হয়তো আটাইতকৈ আকৰ্ষণীয় আছিল কাশ্মীৰ উপত্যকাৰ দৃশ্য, য’ত এনে প্ৰকৃতিৰ প্ৰতিবাদ বিৰল। সন্ত্ৰাসবাদী সংগঠনৰ প্ৰতিশোধৰ আশংকাক অৱজ্ঞা কৰি মুছলমান ধৰ্মগুৰু, যুৱক-যুৱতী আৰু মহিলাসকল ঐক্যবদ্ধভাৱে ৰাজপথলৈ ওলাই আহে।
গুৰুত্বপূৰ্ণ কথাটো হ’ল ভাৰতীয় মুছলমানৰ এই গৰিহণাৰ জোৱাৰ কেৱল কাশ্মীৰতে সীমাবদ্ধ নাছিল। দিল্লী আৰু লক্ষ্ণৌৰ পৰা আৰম্ভ কৰি ভূপাল, গুৰগাঁও, পঞ্জাৱ, কৰ্ণাটক, খাৰগুন আৰু হৰদালৈকে ভাৰতীয় মুছলমানসকলে ভুক্তভোগীৰ সৈতে সহমৰ্মিতা প্ৰকাশ কৰে। মহাৰাষ্ট্ৰত প্ৰায় ২৫ খন গাঁৱত সন্ত্ৰাসবাদী কাৰ্যকলাপৰ বিৰুদ্ধে প্ৰতিবাদ সাব্যস্ত কৰা হয়। এক্সত পোষ্ট কৰা এটা ভিডিঅ’ ক্লিপটোত হায়দৰাবাদৰ এজন স্বেচ্ছাসেৱকে শুকুৰবাৰে পহলগাম আক্ৰমণৰ পিছত মুছলমানৰ হাতত ক’লা বেজ বান্ধি দিয়া দেখা গৈছে।
অসমৰ বিভিন্ন প্ৰান্ততো প্ৰতিবাদ সাব্যস্ত হৈছে। গুৱাহাটীৰ ‘বুঢ়া জামে মছজিদ’ত মুছলমানসকলে সন্ত্ৰাসবাদৰ বিৰুদ্ধে প্লেকাৰ্ড, বেনাৰ, শ্লোগানেৰে প্ৰতিবাদ সাব্যস্ত কৰে। পহলগামত প্ৰাণ হেৰুওৱা সকলৰ বাবে তেওঁলোকে নামাজো আগবঢ়াইছিল। কোনো ৰাজনৈতিক বা ধৰ্মীয় নেতৃত্বই এই বিক্ষোভৰ আয়োজন কৰা নাছিল, এয়া আছিল মুছলমান সমাজৰ স্বাভাৱিক প্ৰতিক্ৰিয়া। ঐক্যবদ্ধ নেতৃত্বৰ অভাৱৰ বাবে সততে সমালোচিত হোৱা এটা সম্প্ৰদায়ত এই স্বাভাৱিক সমাগম আছিল অতি ইতিবাচক আৰু যথেষ্ট তাৎপৰ্যপূৰ্ণ।
ক্ষোভ বৃদ্ধি কৰাত ছ’চিয়েল মিডিয়াইও গুৰুত্বপূৰ্ণ ভূমিকা পালন কৰিছে। সমাজৰ সৰ্বসাধাৰণ লোকে ছ’চিয়েল মিডিয়াত কৰা পোষ্ট আৰু মূলসুঁতিৰ সংবাদ মাধ্যমত প্ৰকাশ পোৱা বাতৰিয়ে সমগ্ৰ দেশবাসীক মন-মগজু আলোড়িত কৰিছে। শোকত ভাগি পৰা পৰিয়াল আৰু জীৱিতসকলৰ হৃদয় বিদাৰক ভিডিঅ’সমূহে সামূহিক শোক আৰু নৈতিক দায়িত্ববোধৰ এক পৰিৱেশৰ সূচনা কৰিছিল।
সন্ত্ৰাসবাদৰ বিৰুদ্ধে ভাৰতীয় মুছলমানৰ প্ৰতিবাদ, হায়দৰাবাদৰ দৃশ্য
মুছলমান ধৰ্মীয় আৰু ৰাজনৈতিক ব্যক্তি, সংগঠন, পণ্ডিত, সাধাৰণ নাগৰিকে সন্ত্ৰাসবাদক একেস্বৰে নিন্দা কৰাৰ লগতে পাকিস্তানৰ বিৰুদ্ধে ভাৰত চৰকাৰৰ দৃঢ় স্থিতিকো সমৰ্থন কৰে। তেওঁলোকৰ বাৰ্তা স্পষ্ট আছিল যে এই ট্ৰেজেডী যিকোনো মানুহৰ ক্ষেত্ৰত হ’ব পাৰে, আৰু সকলো মুছলমানে ধৰ্মীয় ৰেখাৰ বাহিৰত এক ভাৰতীয় বুলি অনুভৱ কৰাৰ প্ৰয়োজন আছে।
আদিল হুছেইনৰ দৰে ভুক্তভোগীৰ প্ৰতি শোক প্ৰকাশ কৰাৰ বিপৰীতে ছত্তীশগড়ৰ এটা পৰিয়ালক ৰক্ষা কৰা নাজাকত হুছেইনৰ দৰে ব্যক্তিৰ বীৰত্বৰ কাৰ্য্যক বহুলভাৱে প্ৰশংসা কৰা হৈছে। এই মানৱতা আৰু সাহসৰ কাহিনীবোৰে ধৰ্মীয় বিভাজনবোৰ নাইকীয়া কৰি পেলাইছে আৰু সকলো ভাৰতীয়ৰ উমৈহতীয়া মানৱতাক আলোকিত কৰি তুলিছে। গভীৰ দৃষ্টিৰে আমি এই পৰিঘটনাক আধ্যাত্মিক আৰু ধৰ্মীয় প্ৰতিক্ৰিয়া হিচাপে চাব পাৰো যে মৃত্যুৱে কোনো ধৰ্মক স্বীকৃতি নিদিয়ে। বহু মুছলমানেও ধৰ্মীয়ভাৱে এই হত্যাকাণ্ডক গভীৰভাৱে অইছলামিক বুলি গণ্য কৰি ধিক্কাৰ দিবলৈ বাধ্য হৈছে।
ভাৰতীয় মুছলমানসকলে যি গুৰুত্বসহকাৰে ঘটনাটোক লৈ সামূহিকভাৱে নিন্দা কৰিলে, সেয়া শুকুৰবাৰৰ জুম্মা নামাজত স্পষ্ট হৈ পৰিছিল। দেশৰ চুকে-কোণে থকা সকলো ইমামে এই বিষয়টো নামাজ আদায় কৰিবলৈ মছজিদলৈ অহা লাখ লাখ লোকৰ মাজত ৰাজহুৱা নিন্দাৰ বাবে উত্থাপন কৰিছিল। ইমামসকলে শুকুৰবাৰৰ খুতবাত ইয়াৰ কথা উল্লেখ কৰিছে যিবোৰ ধৰ্মীয় মুছলমান মনোজগতত যথেষ্ট তাৎপৰ্যপূৰ্ণ।
সন্ত্ৰাসবাদীয়ে ধৰ্মীয় শব্দৰ অপব্যৱহাৰ কৰিব পাৰে কিন্তু অধিকাংশ ভাৰতীয় মুছলমানে ইছলামৰ প্ৰকৃত সত্তাক আঁকোৱালি লয়, যিয়ে হিংসাক সম্পূৰ্ণৰূপে নাকচ কৰে আৰু ন্যায় আৰু মানৱতাক সমৰ্থন কৰে।
পহলগাম সন্ত্ৰাসবাদী আক্ৰমণৰ পিছত ৰাজপথলৈ ওলাই আহি শোক প্ৰকাশ কাশ্মীৰী পুৰুষ-মহিলাৰ
এইটো স্বীকাৰ কৰাটো গুৰুত্বপূৰ্ণ যে প্ৰতিটো ধৰ্মৰ উগ্ৰপন্থী থাকে, কিন্তু তেওঁলোকে সামগ্ৰিকভাৱে ধৰ্মীয় বিশ্বাসক প্ৰতিনিধিত্ব নকৰে। ভাৰতীয় মুছলমানসকলো আনৰ দৰে বৈচিত্ৰ্যপূৰ্ণ, চিন্তাশীল আৰু শান্তিপ্ৰিয়। শেহতীয়া দেশজোৰা প্ৰতিবাদে এক শক্তিশালী আৰু প্ৰয়োজনীয় বাৰ্তা প্ৰেৰণ কৰিছে যে ভাৰতীয় মুছলমানসকলক প্ৰায়ে ভুল বুজা যায়, কিন্তু তেওঁলোকৰ মানৱতা, ধৰ্মীয়তা, দেশপ্ৰেম আৰু শান্তিৰ আকাংক্ষাৰ ক্ষেত্ৰত কোনো পাৰ্থক্য নাই। তেওঁলোকে কেৱল মুছলমান হিচাপেই নহয়, ভাৰতীয় হিচাপেও দেশৰ দুখৰ সময়ত শোক, মমতা আৰু ন্যায়ৰ আহ্বানেৰে দেশবাসীৰ সৈতে একত্ৰিত হৈছে।
