সকলো জাতিৰে নিজৰ খাদ্য সম্ভাৰ আছে। অসমীয়া জাতিৰো নিজা খাদ্য সম্ভাৰ আছে। ভাৰতীয় পৰম্পৰাগত অসমীয়া খাদ্য সম্ভাৰ পিঠা-পনাৰ এক চহকী ঐতিহ্য আৰু পৰম্পৰা আছে। অসমৰ জলবায়ু আৰু উৎসৱসমূহৰ পৰা পিঠা-পনাৰ পৰম্পৰা আৰম্ভ হৈছিল। পিঠাগুড়িৰ পৰা প্ৰস্তুত কৰা পাৰম্পৰিক অসমীয়া পিঠাৰ বিভিন্ন প্ৰকাৰ আছে আৰু অসমীয়া জনজীৱনত ইয়াৰ বিশেষ গুৰুত্ব আছে। 

ব্যৱসায় সন্দৰ্ভত ছামিমা আহমেদে কয়, "বিহু তথা অন্য বিভিন্ন অনুষ্ঠানক্ৰমে বিবাহ, জন্মদিন, বাগদান পৰ্ব, ৰাজহুৱা সভা আদিত আমাৰ গোটৰ পিঠা-পনাৰ যথেষ্ট চাহিদা দেখা যায়। প্ৰতি বছৰে বিহুৰ সময়ত আমি ব্যাপক হাৰত গ্ৰাহকৰ পৰা অৰ্ডাৰ লাভ কৰো। এইবেলিও ব্যতিক্ৰম নহয়। কিয়নো এইবাৰ মাঘ বিহুত আমাৰ গোটৰ তৰফৰ পৰা প্ৰায় ডেৰ লাখ টকাৰ পিঠা-পনা গ্ৰাহকক যোগান ধৰিবলৈ সক্ষম হৈছো। ঘৰুৱাভাৱে প্ৰস্তুত কৰা আমাৰ পিঠা-লাড়ু সতেজ আৰু সুলভ মূল্যত উপলব্ধ হোৱা হেতুকে ৰাজ্যৰ লগতে দেশ তথা বিদেশৰ গ্ৰাহকেও ক্ৰয় কৰি আহিছে। আমাৰ গোটে প্ৰস্তুত কৰা পিঠা পনা অসমৰ বিভিন্ন জিলাৰ লগতে মুম্বাই তথা ডুবাইলৈও ৰপ্তানি হৈ আহিছে। আমাৰ সামগ্ৰী গ্ৰাহকে সহজে লাভ কৰিব পৰাকৈ আমি অনলাইন যোগান ধৰাৰ ব্যৱস্থা কৰিছো। ইয়াৰোপৰি দেশৰ বিভিন্ন ৰাজ্যত থকা তথা বিদেশত বাস কৰা প্ৰবাসী অসমীয়া লোকসকলে বিদেশৰ লোকসকলৰ বাবে আমাৰ পৰা ব্যাপক হাৰত পিঠা লাড়ু ক্ৰয় কৰি আহিছে।"