আৱাজ - দ্য ভইচ / গুৱাহাটী
ফুটবলৰ পৃথিৱীখনত প্ৰশিক্ষণৰ সময় ঘড়ীৰ কাঁটাৰ দৰেই নিৰৱচ্ছিন্নভাৱে চলে। খেলপথাৰত ভৰি দিয়াৰ লগে লগেই খেলুৱৈসকলে এক কঠোৰ আৰু নিৰ্দিষ্ট নিয়ম পালন কৰিবলগীয়া হয়। প্ৰথমে ৱাৰ্ম-আপ, তাৰ পাছত দোৱা (প্ৰাৰ্থনা) আৰু তাৰ পাছত আৰম্ভ হয় কঠোৰ পৰিশ্ৰম। যোৱা ৮ মাৰ্চৰ দিনা নৰ্থইষ্ট ইউনাইটেড এফ চিৰ দলটোৱে পঞ্জাৱ এফ চিৰ বিৰুদ্ধে হ'বলগীয়া মেচখনৰ এদিন পূৰ্বে তেনেদৰেই প্ৰশিক্ষণ লৈ আছিল। সকলোবোৰ স্বাভাৱিকভাৱেই চলি আছিল। কিন্তু হঠাতে দলটোৰ ছন্দ কিছু সময়ৰ বাবে স্তব্ধ হৈ পৰিল।
খেলুৱৈসকলে অনুশীলন সামৰাৰ লগে লগেই দলটোৰ এজন কৰ্মচাৰীৰ ম’বাইলটো বাজি উঠিল। ফোনকলটো আছিল মহাৰাষ্ট্ৰৰ পেছাদাৰী খেলুৱৈ তথা দলৰ গুৰুত্বপূৰ্ণ সদস্য আশীৰ আখতাৰৰ বাবে। দলৰ মুখ্য প্ৰশিক্ষক জুৱান পেড্ৰো বেনালী সমগ্ৰ পৰিস্থিতিৰ বিষয়ে পূৰ্বৰ পৰাই অৱগত আছিল। তেওঁ লগে লগে বুজি উঠিল যে ফোনটো কিহৰ বাবে আহিছে। লগে লগে এইটো স্পষ্ট হৈ পৰিল যে আশীৰে এতিয়া দলৰ সৈতে দিল্লীলৈ যোৱা নিৰ্ধাৰিত বিমানখনত যাত্ৰা কৰিব নোৱাৰিব।
প্ৰশিক্ষক বেনালীয়ে আৱেগিক হৈ আশীৰক সাবটি ধৰি কয়, "আশীৰ, আমাৰ লগতে দোৱা কৰা আৰু যোৱা।" কেইমিনিটমানৰ ভিতৰতেই আশীৰ চিকিৎসালয়লৈ ৰাওনা হ'ল। কেইঘণ্টামানৰ পাছত চিকিৎসালয়ৰ পৰা সেই সুন্দৰ খবৰটো আহিল— আশীৰ আৰু তেওঁৰ পত্নীৰ কোলা শুৱনি কৰি এটি দ্বিতীয় পুত্ৰ সন্তানৰ জন্ম হৈছে। মাতৃ আৰু শিশু দুয়ো সম্পূৰ্ণ সুস্থ আছিল।
এফালে আশীৰৰ পৰিয়ালে নতুন আলহীক আদৰাৰ আনন্দত উল্লাস কৰি আছিল, আনফালে দলৰ পৰিচালনা সমিতিয়ে নিজৰ তৎপৰতা আৰম্ভ কৰি আছিল। দলৰ মেনেজাৰে দিল্লীলৈ যাব পৰা পৰৱৰ্তী প্ৰতিখন সম্ভাৱ্য বিমানৰ খবৰ ল'বলৈ ধৰিলে। ইয়াৰ কাৰণ আছিল খেলুৱৈগৰাকীৰ প্ৰবল ইচ্ছাশক্তি; আশীৰে স্পষ্ট কৰি দিছিল যে যিয়েই নহওক কিয়, তেওঁ মেচখন কোনো কাৰণতে এৰিব নিবিচাৰে।
পুত্ৰৰ জন্মৰ মাত্ৰ কেইঘণ্টামানৰ পাছতেই আশীৰে বিমানত উঠি দিল্লীত দলটোৰ ওচৰ পালেগৈ। তেওঁৰ এই সিদ্ধান্তই নিজৰ দল আৰু ফুটবলৰ প্ৰতি থকা তেওঁৰ অপৰিসীম একাগ্ৰতা আৰু নিষ্ঠাক জলজল পটপটকৈ দাঙি ধৰিলে। আনন্দত আত্মহাৰা হৈ আশীৰে প্ৰতিক্ৰিয়া ব্যক্ত কৰি কয়, "পুত্ৰৰ আগমনত মই বহুত সুখী। মোৰ প্ৰথম পুত্ৰই এতিয়া এজন সৰু ভায়েক পালে।"
জন আব্ৰাহামৰ সৈতে নৰ্থইষ্ট ইউনাইটেডৰ অধিনায়ক আশীৰ আখতাৰ
তেওঁ লগতে কয়, "মোৰ পত্নীয়ে সদায় মোক সমৰ্থন কৰি আহিছে। এইবাৰো তেঁৱেই মোক কৈছিল যে পুত্ৰৰ জন্মৰ পাছত মই দলটোৰ ওচৰলৈ যোৱা উচিত। তেওঁৰ এই কথাই মোৰ বাবে সিদ্ধান্ত লোৱাটো সহজ কৰি তুলিলে। দলৰ অধিনায়ক হোৱা হেতুকে মই জানিছিলো যে মোৰ দ্বিতীয়খন পৰিয়ালে মোৰ বাবে অপেক্ষা কৰি আছে।"
সোমবাৰে পঞ্জাৱ এফ চিৰ বিৰুদ্ধে মেচখনত আশীৰ আৰম্ভণিৰ একাদশৰ অংশ আছিল। মেচখনত যেতিয়া নৰ্থইষ্ট ইউনাইটেডে প্ৰথমটো গ'ল দিছিল, তেতিয়া গ'লস্ক'ৰাৰ পাৰ্থিৱ গগৈয়ে সেই গ'লটো আশীৰৰ সৰু পুত্ৰলৈ উছৰ্গা কৰি সতীৰ্থ প্ৰেমৰ এক সুন্দৰ নিদৰ্শন দাঙি ধৰে। খেলপথাৰৰ এই আৱেগিক মুহূৰ্তটোৱে প্ৰমাণ কৰে যে দলটোৰ খেলুৱৈসকলৰ মাজত কিমান গভীৰ আত্মীয়তা আছে।
সতীৰ্থৰ এই কাৰ্যত আপ্লুত হৈ আশীৰে কয়, "পাৰ্থিৱ আৰু দলৰ এই আচৰণ অতি মৰম লগা আছিল। আমাৰ পুত্ৰৰ আগমনে আমাক ছিজনৰ প্ৰথমটো জয় অৰ্জন কৰিবলৈ আৰু অধিক সাহস যোগাব।"
উল্লেখ্য যে, এই দেওবাৰে নৰ্থইষ্ট ইউনাইটেডে নিজৰ ঘৰুৱা খেলপথাৰ গুৱাহাটীত জামছেদপুৰ এফ চিৰ বিৰুদ্ধে অৱতীৰ্ণ হ'ব। আশীৰ সদায়ৰ দৰেই দলত থাকিব। সাধাৰণতে আশীৰৰ পৰিয়াল গুৱাহাটীতে থাকে আৰু প্ৰতিখন মেচতে ষ্টেণ্ডত উপস্থিত থাকি তেওঁক উৎসাহিত কৰে। কিন্তু এইবাৰ পৰিস্থিতি কিছু সুকীয়া হ'ব। ষ্টেণ্ডত কেৱল আশীৰৰ পিতৃকহে দেখা পোৱা যাব। তেওঁৰ মাতৃ, পত্নী আৰু ডাঙৰ পুত্ৰই ঘৰতে থাকি পৰিয়ালৰ নতুন সদস্যজনৰ যতন ল'ব আৰু টিভিত মেচখন চাই আশীৰক উৎসাহিত কৰিব।
