কেশৱ পাৰিয়াত / শ্বিলং
মেঘালয়ৰ এগৰাকী সাধাৰণ ছাত্ৰীৰ পৰা বিশ্বৰ সৰ্বোচ্চ শৃংগ মাউণ্ট এভাৰেষ্ট বিজয়ীলৈ ৰিফনেছ ৱাৰজ্ৰীৰ যাত্ৰা সহজ নাছিল। তেওঁৰ যাত্ৰা অদম্য সাহস, কঠোৰ পৰিশ্ৰম আৰু অটল সংকল্পৰে ভৰা আছিল। ৰিফনেছ ৱাৰজ্ৰীয়ে জীৱনৰ কঠিন বাধা-বিঘিনি অতিক্ৰম কৰি কেৱল নিজৰ সপোন পূৰণ কৰাই নহয়, সমগ্ৰ উত্তৰ-পূব ভাৰতৰ যুৱ প্ৰজন্মৰ বাবে তেওঁ আশাৰ নতুন দিশ মুকলি কৰিছে। মাত্ৰ ২০ বছৰ বয়সতে এভাৰেষ্ট জয় কৰা ৰিফনেছে প্ৰমাণ কৰিছে যে, দৃঢ় ইচ্ছাশক্তি আৰু অক্লান্ত অধ্যৱসায় থাকিলে কোনো সপোনেই অসাধ্য নহয়।
বিশ্বৰ সৰ্বোচ্চ শৃংগ মাউণ্ট এভাৰেষ্ট আৰোহণ কৰাৰ সপোন যেন প্ৰায় ভাঙি গৈছিল ৰিফনেছ ৱাৰজ্ৰীৰ। নেচনেল কেডেট কৰ্পছ (এনচিচি)-ৰ বাছনি পৰীক্ষাৰ পূৰ্বে ভৰিত আঘাত পোৱাৰ ফলত তেওঁৰ এভাৰেষ্ট অভিযানত অংশগ্ৰহণৰ আশা প্ৰায় শেষ হৈ পৰিছিল। কিন্তু ভাগ্যই তেওঁৰ বাবে আন কিবাহে লিখি থৈছিল। নিৰ্বাচিত পৰ্বতাৰোহীসকলৰ মাজৰ এজন শেষ মুহূৰ্তত আঁতৰি যোৱাত সংৰক্ষিত তালিকাত থকা ৰিফনেছে সুযোগ লাভ কৰে।
বিশ্বৰ সৰ্বোচ্চ শৃংগ মাউণ্ট এভাৰেষ্ট আৰোহণ অভিযানত ৰিফনেছ ৱাৰজ্ৰী
২০২৫ চনৰ মে' মাহত মাত্ৰ ২০ বছৰ বয়সতে তেওঁ সফলতাৰে মাউণ্ট এভাৰেষ্ট আৰোহণ কৰি মেঘালয়ৰ তৃতীয়গৰাকী মহিলা (আৰু ৰাজ্যখনৰ চতুৰ্থজন ব্যক্তি) হিচাপে ইতিহাস ৰচনা কৰে। একে সময়তে তেওঁ মেঘালয়ৰ আটাইতকৈ কম বয়সীয়া এভাৰেষ্ট বিজয়ী হিচাপেও পৰিচিত হয়। এই ঐতিহাসিক সফলতাৰ পাছত ৰিফনেছ মেঘালয়ৰ প্ৰতিটো ঘৰতে পৰিচিত নাম হৈ পৰিছে। বিশেষকৈ ৰাজ্যখনৰ যুৱ প্ৰজন্মৰ বাবে তেওঁ এক অনুপ্ৰেৰণাৰ উৎস।
অৱশ্যে তেওঁৰ এই যাত্ৰা একেবাৰে সহজ নাছিল। শ্বিলঙৰ হেপি ভেলীত অনুষ্ঠিত ৰাজ্যিক বাছনি শিবিৰৰ পূৰ্বে ভৰিত আঘাত পোৱাৰ বাবে তেওঁ মূল দলত স্থান লাভ কৰিব নোৱাৰি সংৰক্ষিত তালিকাত থাকিবলগীয়া হৈছিল। কিন্তু ভাগ্যই পুনৰ এবাৰ তেওঁক সুযোগ দিছিল। নিৰ্বাচিত এজন কেডেটে অংশগ্ৰহণ বাতিল কৰাত ৰিফনেছে গুৱাহাটীত অনুষ্ঠিত উত্তৰ-পূব আঞ্চলিক বাছনি শিবিৰত অংশগ্ৰহণৰ সুযোগ লাভ কৰে। সেই সুযোগৰ সদ্ব্যৱহাৰ কৰি তেওঁ আৰু অধিক কঠোৰ পৰিশ্ৰম কৰে আৰু শাৰীৰিক তথা মানসিক সক্ষমতাৰ পৰিচয় দি দিল্লীত অনুষ্ঠিত সৰ্বভাৰতীয় বাছনি শিবিৰলৈ নিৰ্বাচিত হয়।
তাৰ পিছত উত্তৰাখণ্ড আৰু ছিয়াচেনত তেওঁ কঠোৰ প্ৰশিক্ষণ লাভ কৰে। বিশেষকৈ ছিয়াচেনত মাইনাছ ৩০ ডিগ্ৰী চেলচিয়াছ তাপমাত্ৰাত চলা প্ৰশিক্ষণে তেওঁৰ মানসিক শক্তি আৰু সহনশীলতাৰ কঠিন পৰীক্ষা লয়। দেশজুৰি প্ৰায় ১৭ লাখ এনচিচি কেডেটৰ মাজৰ পৰা ৰিফনেছ অন্তিম পৰ্যায়ত এভাৰেষ্ট অভিযানৰ বাবে নিৰ্বাচিত হয়। নেপালস্থিত এভাৰেষ্ট বেছ কেম্প (১৭,৫৯৮ ফুট)ৰ পৰা ১০ জন এনচিচি কেডেটে সেনাবাহিনীৰ পৰ্বতাৰোহী আৰু গাইডসকলৰ সৈতে বেয়া বতৰৰ মাজেদি অভিযান আৰম্ভ কৰে।
প্ৰতিবছৰে শতাধিক পৰ্বতাৰোহীয়ে এভাৰেষ্ট আৰোহণৰ চেষ্টা কৰে যদিও এই অভিযান এতিয়াও অতি বিপদসংকুল। প্ৰায়ে দুৰ্ঘটনা আৰু মৃত্যুৰ ঘটনাও সংঘটিত হয়। সৌভাগ্যক্ৰমে ভাৰতীয় দলৰ সকলো সদস্যই সফলতাৰে বিশ্বৰ সৰ্বোচ্চ শিখৰত উপনীত হ'বলৈ সক্ষম হয়।
এভাৰেষ্ট বিজয়ী ৰিফনেছ ৱাৰজ্ৰী
এই অনুভৱ ব্যক্ত কৰি ৰিফনেছে কয়, "যেতিয়া মই এভাৰেষ্টৰ শিখৰত উপস্থিত হৈছিলো, সেই মুহূৰ্তটো মোৰ বাবে অত্যন্ত আৱেগিক আছিল। তেতিয়াই উপলব্ধি কৰিলোঁ যে, এই আৰোহণ কেৱল শিখৰত উপনীত হোৱাৰ যাত্ৰা নহয়, বৰং ত্যাগ, সাহস আৰু অসংখ্য প্ৰতিকূলতাক অতিক্ৰম কৰাৰ এক কাহিনী। পৰ্বতৰ প্ৰতিটো খোজেই মোৰ শক্তি আৰু দৃঢ় সংকল্পৰ পৰীক্ষা লৈছিল।"
তেওঁ লগতে কয়, "বিশ্বৰ সৰ্বোচ্চ শিখৰত থিয় হৈ ভাৰতৰ লগতে বিশেষকৈ উত্তৰ-পূব আৰু মেঘালয়ক প্ৰতিনিধিত্ব কৰিব পাৰি মই গৌৰৱ অনুভৱ কৰিছিলোঁ। এই সমগ্ৰ যাত্ৰাত মোক পথ দেখুওৱা আৰু সুৰক্ষা দিয়াৰ বাবে সৰ্বপ্ৰথমে ঈশ্বৰৰ ওচৰত কৃতজ্ঞতা জনাইছোঁ।"
শ্বিলঙত জন্ম আৰু ডাঙৰ-দীঘল হোৱা ৰিফনেছৰ শৈশৱত কোনো লক্ষণেই নাছিল যে, এদিন তেওঁ এভাৰেষ্ট বিজয়ী হ'ব। পাহাৰীয়া অঞ্চলত বাস কৰিলেও সঁচা অৰ্থত উচ্চ পৰ্বতৰ সৈতে তেওঁৰ কোনো সম্পৰ্ক নাছিল। কিন্তু এনচিচিত যোগদান কৰাৰ পিছতেই তেওঁৰ জীৱনৰ দিশ সলনি হয়। তেওঁৰ প্ৰশিক্ষকসকলৰ মাজৰ এগৰাকী আছিল ডলিন খাৰভিহ, যি মেঘালয়ৰ দ্বিতীয়গৰাকী মহিলা এভাৰেষ্ট বিজয়ী। তেওঁৰ অনুপ্ৰেৰণাতে ৰিফনেছৰ মনত পৰ্বতাৰোহণৰ প্ৰতি গভীৰ আগ্ৰহ জন্ম লয়।
বৰ্তমান উদ্ভিদ বিজ্ঞানৰ স্নাতক পাঠ্যক্ৰমত অধ্যয়ন কৰি থকা ৰিফনেছে কয়, "এভাৰেষ্ট অভিযানে মোৰ জীৱন সম্পূৰ্ণ সলনি কৰি দিলে। ইয়াৰ আগতে মোৰ সপোন ডাঙৰ আছিল, কিন্তু সেই সপোনৰ সৈতে বহু সন্দেহ আৰু ভয়ো আছিল। এই যাত্ৰাই মোক শৃংখলা, ধৈৰ্য্য, মানসিক দৃঢ়তা আৰু প্ৰতিকূল পৰিস্থিতিৰ সন্মুখীন হোৱাৰ সাহস দিছে। এভাৰেষ্টে মোক বুজাই দিলে যে, সফলতা কেতিয়াও সহজে নাহে। ইয়াৰ বাবে দীঘলীয়া প্ৰস্তুতি, ত্যাগ আৰু অসীম সাহসৰ প্ৰয়োজন।"
এভাৰেষ্ট বিজয়ী ৰিফনেছ ৱাৰজ্ৰী
পাঁচ ভাই-ভনীৰ ভিতৰত তৃতীয় হৈছে ৰিফনেছ। তেওঁৰ পিতৃ শ্লুৰবৰ খাৰমিন্দাই আৰু মাতৃ ডায়মণ্ডচি ৱাৰজ্ৰী। তেওঁ নিজৰ এই সফলতাৰ বাবে পিতৃ-মাতৃ, পৰিয়াল, শিক্ষক, প্ৰশিক্ষক আৰু সৰ্বশক্তিমান ঈশ্বৰক কৃতিত্ব দিয়ে। অৰ্থনৈতিকভাৱে সচ্ছল নোহোৱা পৰিয়ালৰ সন্তান হিচাপে এনচিচিৰ সহায়েই তেওঁৰ এভাৰেষ্ট অভিযান সম্ভৱ কৰি তুলিছিল। কিয়নো এই অভিযানৰ বাবে প্ৰয়োজনীয় সঁজুলি, প্ৰশিক্ষণ, ভ্ৰমণ ব্যয় আৰু নেপাল চৰকাৰক দিবলগীয়া অনুমতি মাচুল অত্যন্ত ব্যয়বহুল।
এতিয়া স্নাতক ডিগ্ৰী সম্পূৰ্ণ কৰাৰ ওপৰত গুৰুত্ব আৰোপ কৰি থকা ৰিফনেছে ভৱিষ্যতেও পৰ্বতাৰোহণ অব্যাহত ৰাখিবলৈ চৰকাৰ, বিভিন্ন সংস্থা আৰু পৃষ্ঠপোষকৰ সহায় লাভৰ আশা প্ৰকাশ কৰিছে।
ভৱিষ্যৎ পৰিকল্পনা সন্দৰ্ভত ৰিফনেছে কয়, "মোৰ আটাইতকৈ ডাঙৰ সপোনসমূহৰ এটা হৈছে ‘ছেভেন ছামিটছ’ সম্পূৰ্ণ কৰা। অৰ্থাৎ পৃথিৱীৰ সাতখন মহাদেশৰ সৰ্বোচ্চ শৃংগসমূহ আৰোহণ কৰা। এজন পৰ্বতাৰোহী হিচাপে এইটো মোৰ বাবে এক ডাঙৰ প্ৰত্যাহ্বান আৰু এক অৰ্থপূৰ্ণ যাত্ৰা হ'ব।"
তেওঁ লগতে কয়, "মই আশা কৰোঁ, উপযুক্ত সুযোগ আৰু সহযোগিতা লাভ কৰিলে ভৱিষ্যতেও মোৰ পৰ্বতাৰোহণৰ যাত্ৰা অব্যাহত ৰাখিব পাৰিম আৰু মেঘালয়, উত্তৰ-পূব তথা ভাৰতক বিশ্ব মঞ্চত গৌৰৱেৰে প্ৰতিনিধিত্ব কৰিব পাৰিম। চৰকাৰ, বিভিন্ন সংস্থা আৰু পৃষ্ঠপোষকৰ সহায় পালে এই সপোন বাস্তৱায়িত কৰাটো বহুত সহজ হ'ব।"
