বেংগালুৰু
ইণ্ডিয়ান প্ৰিমিয়াৰ লীগ (আই পি এল) ২০২৫ ছিজনৰ স্থগিত কৰাৰ পিছত আন এক বৃহৎ অনুষ্ঠান নীৰজ চোপ্ৰা ক্লাছিক জেভেলিন থ্ৰ’ প্ৰতিযোগিতা অনিৰ্দিষ্টকালৰ বাবে পিছুৱাই দিয়া হৈছে।
২৪ মে’ত বেংগালুৰুৰ শ্ৰী কান্তেৰভা ষ্টেডিয়ামত আয়োজন কৰিবলগীয়া এদিনীয়া অনুষ্ঠান নীৰজ চোপ্ৰা ক্লাছিক পৰৱৰ্তী জাননী নিদিয়ালৈকে পিছুৱাই দিয়া হৈছে।
তেওঁলোকৰ অফিচিয়েল এক্স একাউণ্টত নীৰজ চোপ্ৰা ক্লাছিকে কয় যে, বৰ্তমান ভাৰত-পাকিস্তানৰ উত্তেজনাৰ বাবে উদ্বোধনী সংস্কৰণটো অনিৰ্দিষ্টকাললৈ পিছুৱাই দিয়া হৈছে, আয়োজকসকলে খেলুৱৈসকলৰ সুৰক্ষাক অগ্ৰাধিকাৰ দিছে আৰু সশস্ত্ৰ বাহিনীৰ সৈতে সংহতি প্ৰকাশ কৰিছে।
"বৰ্তমানৰ পৰিস্থিতিৰ বাবে এন চি ক্লাছিকৰ উদ্বোধনী সংস্কৰণ পৰৱৰ্তী জাননী নিদিয়ালৈকে পিছুৱাই দিয়া হৈছে। এই সিদ্ধান্ত সযতনে চিন্তা আৰু পৰামৰ্শৰ অন্তত লোৱা হৈছে, খেলুৱৈ, অংশীদাৰ, আৰু বহল সম্প্ৰদায়ৰ মংগল শীৰ্ষ অগ্ৰাধিকাৰ হিচাপে লোৱা হৈছে। আমি ক্ৰীড়াৰ একত্ৰীকৰণ শক্তিত বিশ্বাস কৰোঁ। কিন্তু, এই জটিল মুহূৰ্তত, জাতিটোৰ সৈতে দৃঢ়তাৰে থিয় দিয়াটোৱেই আটাইতকৈ গুৰুত্বপূৰ্ণ। এইখিনিতে আমাৰ সকলো কৃতজ্ঞতা আৰু চিন্তা কেৱল আমাৰ দেশৰ বাবে আগৰণুৱা সশস্ত্ৰ বাহিনীৰ সৈতে। যথা সময়ত এনচি ক্লাছিকৰ বাবে এটা সংশোধিত অনুসূচী প্ৰদান কৰা হ'ব। জয় হিন্দ," বিবৃতিটোত কোৱা হৈছে।
ইয়াৰ পূৰ্বে ভাৰতৰ দুবাৰৰ অলিম্পিক পদক বিজয়ীগৰাকীয়ে জম্মু-কাশ্মীৰত সংঘটিত হোৱা মৰ্মান্তিক পহলগাম সন্ত্ৰাসবাদী আক্ৰমণৰ পিছত বেংগালুৰুত অনুষ্ঠিত হোৱা নীৰজ চোপ্ৰা ক্লাছিকৰ বাবে পাকিস্তানী জেভেলিন নিক্ষেপকাৰী আৰ্ছাদ নাদীমক নিমন্ত্ৰণ জনোৱাৰ বিতৰ্কক সম্বোধন কৰি আৱেগিক বিবৃতি প্ৰকাশ কৰে।
ছ’চিয়েল মিডিয়াত নিজৰ চিন্তাধাৰা শ্বেয়াৰ কৰি ভাৰতীয় জেভেলিন তাৰকাগৰাকীয়ে স্পষ্ট কৰি দিয়ে যে আক্ৰমণৰ বহু আগতেই এই নিমন্ত্ৰণ কৰা হৈছিল আৰু তেতিয়াৰ পৰাই তেওঁ আৰু তেওঁৰ পৰিয়ালৰ প্ৰতি হোৱা ঘৃণা আৰু নিৰ্যাতনৰ বাবে দুখ প্ৰকাশ কৰে।
"মই সাধাৰণতে কম শব্দৰ মানুহ, কিন্তু তাৰ অৰ্থ এইটো নহয় যে মই যিটো ভুল বুলি ভাবো তাৰ বিৰুদ্ধে মই মাত মাতিব নোৱাৰো। তাতোকৈ বেছি যেতিয়া আমাৰ দেশৰ প্ৰতি মোৰ প্ৰেম, আৰু মোৰ পৰিয়ালৰ মান সন্মানক লৈ প্ৰশ্ন উত্থাপন হোৱাৰ কথা আহে। নীৰজ চোপ্ৰা ক্লাছিকত অংশগ্ৰহণ কৰিবলৈ আৰ্ছাদ নদীমক আমন্ত্ৰণ জনোৱাৰ মোৰ সিদ্ধান্তৰ বিষয়ে ইমানেই চৰ্চা হৈছে, আৰু ইয়াৰ বেছিভাগেই ঘৃণা আৰু গালি-গালাজ। তেওঁলোকে মোৰ পৰিয়ালকো ইয়াৰ পৰা আঁতৰাই ৰখা নাই। মই আৰ্শাদলৈ আগবঢ়োৱা নিমন্ত্ৰণটো এজন খেলুৱৈৰ পৰা আন এজনলৈ আছিল – আৰু একো নহয়। এন চি ক্লাছিকৰ উদ্দেশ্য আছিল শ্ৰেষ্ঠ খেলুৱৈসকলক ভাৰতলৈ অনা আৰু আমাৰ দেশক বিশ্বমানৰ ক্ৰীড়া প্ৰতিযোগিতাৰ ঘৰ নিৰ্মাণ কৰা। পহলগামত সন্ত্ৰাসবাদী আক্ৰমণৰ দুদিন আগতে সোমবাৰে সকলো খেলুৱৈৰ ওচৰলৈ আমন্ত্ৰণ জনোৱা হৈছিল," চোপ্ৰাই এক্সত কয়।
