ডোভালে কয়, "যোৱা ১,০০০ বছৰৰ ভিতৰত তোমালোকেই যে, আটাইতকৈ সৌভাগ্যশালী প্ৰজন্ম, যিসকলৰ সন্মুখত ইমানবোৰ সুযোগ আছে, সেই কথা হয়তো তোমালোকে উপলব্ধি কৰা নাই। তোমালোকৰ পূৰ্বৰ প্ৰজন্মসমূহে দাসত্বৰ মাজত সংগ্ৰাম কৰিবলগীয়া হৈছিল। কেৱল ইয়াতেই নহয়, সমগ্ৰ বিশ্বতে বহু পৰিৱৰ্তন হৈছে। আৰু এই পৰিৱৰ্তন তোমালোকৰ বাবে অধিক ইতিবাচক হৈছে।"
ইয়াৰ উপৰি আইআইটি ৰুৰকিৰ সমাৱৰ্তনত ভাষণ দি ডোভালে তেওঁৰ চোৰাংচোৱা সেৱাৰ আৰম্ভণিৰ দিনসমূহৰ এটা গুৰুত্বপূৰ্ণ অভিজ্ঞতাৰ কথাও বৰ্ণনা কৰে। তেওঁ ছিকিম ভাৰতৰ সৈতে একত্ৰীকৰণৰ সময়ত সংঘটিত এটা গুৰুত্বপূৰ্ণ সীমান্ত অভিযানৰ স্মৃতি ৰোমন্থন কৰে।
ডোভালে কয়, "মই তেতিয়া এজন যুৱ আইপিএছ বিষয়া আছিলোঁ আৰু চোৰাংচোৱা সেৱাৰ ক্ষেত্ৰত নতুন আছিলোঁ। মোৰ বয়স ২০ বছৰ আছিল আৰু ছিকিমত চোৰাংচোৱা বিভাগৰ দায়িত্বত আছিলোঁ। সেই সময়ত ছিকিম ভাৰতৰ অংশ নাছিল। ই ভাৰতৰ সৈতে একত্ৰিত হোৱাৰ প্ৰক্ৰিয়াত আছিল। সেই একত্ৰীকৰণ প্ৰক্ৰিয়াৰ অংশ মইও আছিলোঁ। কিন্তু মোৰ দায়িত্বৰ ভিতৰত সীমান্ত এলেকাসমূহৰ নিৰাপত্তাৰ ওপৰত নজৰ ৰখা আৰু পিএলএ তথা চীনা সেনাৰ গতিবিধিৰ বিষয়ে তথ্য সংগ্ৰহ কৰাও অন্তৰ্ভুক্ত আছিল।"
এটা নিৰ্দিষ্ট অভিযানৰ কথা উল্লেখ কৰি ডোভালে কয় যে, সীমান্তৰ সিপাৰে প্ৰেৰণ কৰা এটা চোৰাংচোৱা দল নিৰ্ধাৰিত সময়ৰ ভিতৰত উভতি অহা নাছিল।
তেওঁ কয়, "এবাৰ সীমান্ত এলেকাত আমি এটা চোৰাংচোৱা অভিযান চলাইছিলোঁ। প্ৰায় আঠ দিনৰ পিছত দলটো উভতি অহাৰ কথা আছিল। পাঁচ দিন পাৰ হ’ল, তাৰ পিছত ১০ দিন, আৰু অৱশেষত হয়তো ১৫ দিনো পাৰ হৈ গ’ল। মোৰ বাবে এয়া কেৱল পেছাগতভাৱে নহয়, মানৱীয় দিশৰ পৰাও অত্যন্ত চিন্তাৰ বিষয় হৈ পৰিছিল। কাৰণ ইমানজন লোকৰ কি হ’ল, তেওঁলোক জীয়াই আছে নে নাই—আমি একোৱেই জনা নাছিলোঁ।"
পিছত তেওঁ জানিব পাৰে যে, চীনা বাহিনীয়ে সেই কৰ্মীসকলক আটক কৰি জেৰা কৰিছিল। পৰৱৰ্তী সময়ত আলোচনাৰ জৰিয়তে তেওঁলোকক ভাৰতলৈ ঘূৰাই অনা হয়। এই ঘটনাৰ কথা স্মৰণ কৰি ডোভালে কয় যে, সেই সময়ত তেওঁ আশংকা কৰিছিল, এই ঘটনাই হয়তো তেওঁৰ কেৰিয়াৰৰ অকাল সমাপ্তি ঘটাব।
ডোভালে কয়, "আমি কোনো হিমস্খলন বা তেনেধৰণৰ ঘটনা সংঘটিত হোৱাৰ খবৰ পোৱা নাছিলোঁ। বিষয়টো লৈ মই গভীৰভাৱে চিন্তিত হৈ পৰিছিলোঁ। কিন্তু এদিন মুখ্য কাৰ্যালয়ৰ পৰা এটা ফোন আহিল। মোৰ ঊৰ্ধ্বতন বিষয়াগৰাকীয়ে সুধিলে, "তুমি কিছুমান লোকক সীমান্তৰ সিপাৰলৈ পঠিয়াইছিলা নেকি?" মই ক’লোঁ, "মই একো গম নাপাও তেওঁলোকৰ কথা। তেওঁলোক উভতি আহি আছে চাগে। পাঁচ-ছয় দিনৰ ভিতৰতে উভতি অহাৰ কথা আছিল, কিন্তু এতিয়া প্ৰায় ১০-১১ দিন হৈ গ’ল।" তেতিয়া তেওঁ ক’লে, "তেওঁলোক এতিয়া চীনৰ জিম্মাত আছে।"
তেওঁ কয় যে, চীনা বাহিনীয়ে সেই লোকসকলক আটক কৰি জেৰা কৰিছিল। অৱশেষত সম্ভৱতঃ আলোচনা, আলোচনাৰ জৰিয়তে হোৱা বুজাবুজি বা কোনো চুক্তিৰ পাছত চীনৰ পৰা তেওঁলোকক ঘূৰাই পঠিওৱা হয়।
ডোভালে কয়, "তেওঁলোক সম্পূৰ্ণৰূপে বিধ্বস্ত অৱস্থাত উভতি আহিছিল। তাৰ পিছত ঘটনাটোৰ তদন্ত আৰম্ভ হয়। মই ভাবিছিলোঁ যে এয়াই মোৰ কেৰিয়াৰৰ শেষ। তেতিয়া মোৰ বয়স ২০ বছৰ আছিল আৰু মোক নতুনকৈ কেৰিয়াৰ আৰম্ভ কৰিবলগীয়া হ’ব বুলি ভাবিছিলোঁ। ঘটনাটো মোৰ বাবে একেবাৰে অপেছাদাৰী যেন লাগিছিল।"
ডোভালে লগতে কয়, "যি নহওক, তদন্ত শেষ হ’ল। তদন্তত মোক দোষী সাব্যস্ত কৰা নহ’ল। সম্ভৱতঃ মই সকলো কাম সঠিকভাৱেই কৰিছিলোঁ। মুখ্য কাৰ্যালয়ৰ পৰা আমাক দিয়া মানচিত্ৰ আৰু নক্সাসমূহত কিছু ভুল আৰু বিসংগতি আছিল। সেইদৰেই ঘটনাটো সংঘটিত হৈছিল।"
ৰাষ্ট্ৰীয় নিৰাপত্তা উপদেষ্টাগৰাকীয়ে আইআইটি ৰুৰকিৰ ঐতিহাসিক ঐতিহ্যৰো প্ৰশংসা কৰে। শিক্ষাৰ্থীসকলৰ শিক্ষা আৰু যাত্ৰাক আগুৱাই নিয়াত গুৰুত্বপূৰ্ণ ভূমিকা গ্ৰহণ কৰা প্ৰতিষ্ঠানখনৰ শিক্ষক-শিক্ষয়িত্ৰী আৰু অভিভাৱকসকলৰ প্ৰতিও তেওঁ কৃতজ্ঞতা প্ৰকাশ কৰে।
ডোভালে কয়, "যোৱা ১,০০০ বছৰৰ ভিতৰত তোমালোকেই যে আটাইতকৈ সৌভাগ্যশালী প্ৰজন্ম, যিসকলৰ সন্মুখত ইমানবোৰ সুযোগ আছে, সেই কথা হয়তো তোমালোকে উপলব্ধি কৰা নাই। তোমালোকৰ পূৰ্বৰ প্ৰজন্মসমূহে দাসত্বৰ মাজত সংগ্ৰাম কৰিবলগীয়া হৈছিল। তেওঁলোকৰ সন্মুখত তোমালোকৰ বাবে মুকলি হোৱা এই সুযোগসমূহ নাছিল। কেৱল ইয়াতেই নহয়, সমগ্ৰ বিশ্বতে বহু পৰিৱৰ্তন হৈছে আৰু এই পৰিৱৰ্তন তোমালোকৰ বাবে অধিক ইতিবাচক হৈছে। তোমালোকে এনে এক সময়ত জীৱন আৰু কৰ্মজগতত প্ৰৱেশ কৰিছা, যি সময়ত কোনো এখন দেশ বা সমাজৰ বিকাশ আৰু প্ৰগতিৰ ক্ষেত্ৰত প্ৰযুক্তিয়েই আটাইতকৈ গুৰুত্বপূৰ্ণ চালিকাশক্তি হৈ পৰিব।"
সমাৱৰ্তন অনুষ্ঠানত ভাষণ দি জ্যেষ্ঠ অধিবক্তা হৰিশ ছালভেও যুৱ স্নাতকসকলক পৰিৱৰ্তিত বিশ্ব পৰিস্থিতি আৰু আধুনিক গণতান্ত্ৰিক ব্যৱস্থাৰ ভংগুৰতাৰ বিষয়ে সচেতন হ’বলৈ আহ্বান জনায়।
ছালভেই কয়, "তোমালোক এনে এখন পৃথিৱীত প্ৰৱেশ কৰা প্ৰথমটো প্ৰজন্ম, যিখন পৃথিৱীয়ে নিজকে নতুন ৰূপত গঢ় দিবলৈ গভীৰভাৱে চেষ্টা কৰি আছে। মোৰ প্ৰজন্মই যি বিশ্বব্যৱস্থা চিনি পাইছিল, সেই ব্যৱস্থা এতিয়া এনে এক অৱস্থাত উপনীত হৈছে যাক আমি চিনাক্ত কৰিব নোৱাৰোঁ। আমি যিটো কথা জানো সেয়া হ’ল, আমি যি নিয়মভিত্তিক বিশ্বব্যৱস্থাক স্বাভাৱিক বুলি ধৰি লৈছিলোঁ, সেয়া এতিয়া আৰু অলংঘনীয় হৈ থকা নাই। সেই ব্যৱস্থা পুনৰ ঘূৰি আহিবনে? সময়েহে তাৰ উত্তৰ দিব। স্বাধীনতা আৰু গণতন্ত্ৰৰ দৰে আশীৰ্বাদসমূহক কেতিয়াও সহজভাৱে নল’বা।"
পৰিৱৰ্তিত বিশ্বব্যৱস্থাৰ প্ৰসংগ উত্থাপন কৰি হৰিশ ছালভেই শিক্ষাৰ্থীসকলক স্বাধীনতা আৰু গণতন্ত্ৰক কেতিয়াও সহজভাৱে নল’বলৈ সতৰ্ক কৰে। তেওঁৰ মতে, পূৰ্বৰ প্ৰজন্মসমূহে এই মূল্যবোধসমূহ কিমান সহজে পৰীক্ষাৰ সন্মুখীন হ’ব পাৰে, সেই কথাটো যথেষ্ট গুৰুত্বসহকাৰে উপলব্ধি কৰা নাছিল।
ছালভেই লগতে কয়, "মই স্বাধীনতাৰ পিছত জন্মগ্ৰহণ কৰা প্ৰজন্মৰ লোক। আমি বহু কথাই স্বাভাৱিকভাৱে লাভ কৰা বুলি ধৰি লৈছিলোঁ। আমাৰ প্ৰজন্মই ধৰি লৈছিল যে, বিশ্ব এখন আইন আৰু নিয়মৰ ওপৰত আধাৰিত। আমি আনকি তুলনামূলকভাৱে কম সৌভাগ্যশালী দেশসমূহৰ লোকসকলকো কৰুণাৰ দৃষ্টিৰে আৰু কিছু পৰিমাণে হেয়জ্ঞান কৰিছিলোঁ। কিন্তু স্বাধীনতা আৰু গণতন্ত্ৰৰ দৰে মূল্যবোধসমূহ কিমান ঠুনুকা, সেই কথা আমি উপলব্ধি কৰাই নাছিলোঁ।"
আগন্তুক দিনত স্নাতকসকলৰ ওপৰত আহিবলগীয়া বৃহৎ দায়িত্বৰ কথা উল্লেখ কৰি ছালভেই কয় যে, নতুন স্নাতকসকলে প্ৰযুক্তিনিৰ্ভৰ নতুন বিশ্বব্যৱস্থা গঢ়ি তোলাত গুৰুত্বপূৰ্ণ ভূমিকা পালন কৰাৰ এক বিশেষ সুযোগ লাভ কৰিছে।
জ্যেষ্ঠ অধিবক্তা ছালভেই কয়, "তোমালোকে এনে এখন পৃথিৱীত প্ৰৱেশ কৰিবলৈ গৈছা, য’ত নতুন বিশ্বব্যৱস্থা পুনৰ গঢ়ি তোলাৰ এক বৃহৎ দায়িত্ব তোমালোকৰ কান্ধত থাকিব। এই ক্ষেত্ৰত তোমালোকৰ এক ডাঙৰ সুবিধা আছে, কাৰণ আজিৰ বিশ্বব্যৱস্থাৰ কেন্দ্ৰবিন্দু হ’ব প্ৰযুক্তি।"
ইফালে, আজি প্ৰতিষ্ঠিত ভাৰতীয় প্ৰযুক্তিবিদ্যা প্ৰতিষ্ঠান (IIT) ৰুৰকিত দুদিনীয়া সমাৱৰ্তন অনুষ্ঠান আৰম্ভ হয়। এই সমাৱৰ্তনত মুঠ ২,৭০১গৰাকী শিক্ষাৰ্থীক ডিগ্ৰী প্ৰদান কৰা হয়। অনুষ্ঠানত আইআইটি ৰুৰকিৰ সঞ্চালক কে কে পণ্টেও অংশগ্ৰহণ কৰে।
