গুৱাহাটী
আজি হ'বলগীয়া পূর্ণ চন্দ্রগ্রহণ সমগ্র উত্তৰ-পূব ভাৰতৰ পৰা দেখা যাব যদিও ছিকিমকে ধৰি ভাৰতবৰ্ষৰ অন্যান্য অঞ্চলৰ পৰা কেৱল আংশিক গ্রহণহে দৃশ্যমান হ'ব।
ভাৰতৰ উপৰি পূব এছিয়া, অষ্ট্ৰেলিয়া, আমেৰিকা আৰু প্রশান্ত মহাসাগৰকে ধৰি পৃথিৱীৰ অধিকাংশ অঞ্চলৰ পৰা এই চন্দ্রগ্রহণ দেখা পোৱা যাব।
ভাৰতীয় সময় অনুসৰি চন্দ্ৰৰ আংশিক গ্রহণ আৰম্ভ হ'ব বিয়লি ৩.২০ বজাত, যিয়ে পূৰ্ণগ্ৰহণৰ ৰূপ পাব ৪.৩৪ বজাত। এই পূর্ণগ্রহণ সন্ধিয়া ৫.৩৩ বজালৈ অব্যাহত থাকিব আৰু পৰৱৰ্তী পৰ্যায়ত ৬.৪৮ বজাৰ আংশিক গ্রহণ সমাপ্ত হ'ব।
অৱশ্যে ভাৰতবৰ্ষত গ্ৰহণৰ দৃশ্য চন্দ্রোদয়ৰ পৰা আৰম্ভ কৰি গ্ৰহণ শেষ হোৱা মুহূর্তলৈ দেখা যাব। ডিব্ৰুগড়ত পূর্ণগ্রহণ হৈ থকা অৱস্থাতে সন্ধিয়া ৫.০৮ বজাত চন্দ্রোদয় হ'ব। আনহাতে গুৱাহাটীত চন্দ্রোদয় হ'ব সন্ধিয়া ৫.২২ বজাত।
সূৰ্যগ্ৰহণৰ বিপৰীতে চন্দ্ৰগ্রহণক খালী চকুৰেই নিৰীক্ষণ কৰিব পাৰি। গুৱাহাটী তাৰকাগৃহই চন্দ্ৰগ্ৰহণৰ এই সমগ্ৰ পৰিঘটনা, আগ্রহী জনসাধাৰণ তথা ছাত্ৰ-ছাত্ৰীৰ বাবে বিয়লি ৪ বজাৰ পৰা দূৰবীক্ষণ যন্ত্ৰ আৰু স্ক্রীনৰ সহায়ত নিৰীক্ষণৰ ব্যৱস্থা কৰিছে।।
