দেৰগাঁও
ড্ৰাগছৰ ভয়াৱহ সমস্যা মোকাবিলা কৰাৰ বাবে অসম আৰক্ষীৰ অধীনত নতুনকৈ ‘এণ্টি নাৰ্কটিকছ টাস্ক ফ’ৰ্চ’ (Anti Narcotics Task Force) নামৰ এটা বিশেষ গোট গঠন কৰা হ’ব বুলি মুখ্যমন্ত্ৰী হিমন্ত বিশ্ব শৰ্মাই বৃহস্পতিবাৰে ঘোষণা কৰে।
দেৰগাঁৱত অনুষ্ঠিত দুদিনীয়া এছ এছ পি সন্মিলন সমাপ্ত হোৱাৰ পাছত আয়োজন কৰা এখন সংবাদমেলত মুখ্যমন্ত্ৰীগৰাকীয়ে লগতে কয় যে এই বছৰৰ ভিতৰত চাৰ্জশ্বীট দাখিল কৰা গোচৰসমূহত দোষী সাব্যস্ত কৰাৰ হাৰ ৩৫ শতাংশলৈ বৃদ্ধি কৰাৰ অসম চৰকাৰে লক্ষ্য লৈছে। বৰ্তমান এই হাৰ ২৯.৩ শতাংশ।
“ড্ৰাগছৰ ভয়াৱহ সমস্যা মোকাবিলা কৰিবলৈ ‘এণ্টি নাৰ্কটিকছ টাস্ক ফ’ৰ্চ’ নামৰ এটা নতুন গোট গঠন কৰা হ’ব। কেন্দ্ৰীয় চৰকাৰেও ইয়াৰ পৰামৰ্শ দিছিল,” শৰ্মাই কয়।
মুখ্যমন্ত্ৰীগৰাকীয়ে কয় যে এই বিশেষ বাহিনীটোৰ অধীনত আইনী আৰু বিত্তীয় বিষয়কে ধৰি কেইবাটাও শাখা থাকিব। অভিযুক্তসকলে যাতে সহজে জামিন লাভ কৰিব নোৱাৰে, সেয়া নিশ্চিত কৰাৰ লগতে ড্ৰাগছ সৰবৰাহকাৰী চক্ৰৰ বিত্তীয় নেটৱৰ্ক ভাঙি পেলোৱাৰ দৰে বিষয়সমূহো এই বাহিনীয়ে পৰ্যালোচনা কৰিব।
“এই বাহিনীয়ে NDPS আইন কঠোৰভাৱে কাৰ্যকৰী কৰাৰ ক্ষেত্ৰত কাম কৰিব। অহা এমাহৰ ভিতৰত অসম আৰক্ষীৰ অধীনত এই গোটটো গঠন কৰিব পাৰিম বুলি আমি আশা কৰিছোঁ,” শৰ্মাই কয়।
মুখ্যমন্ত্ৰীগৰাকীয়ে লগতে কয় যে চাৰ্জশ্বীট দাখিল কৰা FIR-সমূহত দোষী সাব্যস্ত কৰাৰ হাৰ ২০২০ চনত প্ৰায় ৭ শতাংশৰ পৰা বৰ্তমান ২৯.৩ শতাংশলৈ বৃদ্ধি পাইছে।
“এতিয়া আমি এই বছৰৰ ভিতৰত দোষী সাব্যস্ত কৰাৰ হাৰ ৩৫ শতাংশলৈ উন্নীত কৰাৰ লক্ষ্য লৈছোঁ। বৰ্তমান নিৰ্ধাৰিত সময়সীমাৰ ভিতৰত পঞ্জীয়ন কৰা ৮০ শতাংশ গোচৰত আমি চাৰ্জশ্বীট দাখিল কৰিবলৈ সক্ষম হৈছোঁ,” তেওঁ কয়।
মুখ্যমন্ত্ৰীয়ে জনায় যে দুদিনীয়া এছ এছ পি সন্মিলনত ড্ৰাগছৰ বিষয়টো সন্দৰ্ভত বিস্তৃত আলোচনা কৰা হয় আৰু নিচাজাতীয় সামগ্ৰীৰ সৰবৰাহৰ ট্ৰেনজিট পথসমূহৰ বিষয়েও আলোচনা কৰা হয়।
“এছ এছ পিসকলে কৈছে যে এই ট্ৰেনজিট পথ বন্ধ কৰিবলৈ আমি মিজোৰাম, মণিপুৰ আৰু অৰুণাচল প্ৰদেশৰ সৈতে সমন্বয় সাধন কৰি কাম কৰিব লাগিব। অন্যথা ড্ৰাগছৰ পৰিবহণ বন্ধ কৰাটো কঠিন হ’ব,” তেওঁ কয়।
শৰ্মাই জনোৱা অনুসৰি, এছ এছ পি সন্মিলনত আগন্তুক দিনসমূহত অসম আৰক্ষীৰ অধীনত আৰু দুটা নতুন বেটেলিয়ন গঠন কৰাৰ সিদ্ধান্ত গ্ৰহণ কৰা হৈছে।
“অসম আৰক্ষীত পদোন্নতিৰ বিষয়টো কিছুদিন ধৰি বাকী আছিল। এতিয়া আমি এই প্ৰক্ৰিয়া আগবঢ়াই নিয়াৰ সিদ্ধান্ত লৈছোঁ। ইয়াৰ ফলত নতুনকৈ নিযুক্তিৰ বাবে অধিক পদ সৃষ্টি হ’ব। অহা বছৰ অসম আৰক্ষীত ৫,০০০ লোকক নিযুক্তি দিয়া হ’ব,” তেওঁ কয়।
মুখ্যমন্ত্ৰীগৰাকীয়ে জনায় যে বিগত পাঁচ বছৰত অসম আৰক্ষীত ২১,০০০ যুৱক-যুৱতীক নিযুক্তি দিয়া হৈছে। বৰ্তমান চৰকাৰৰ কাৰ্যকালত আৰু ১৫,০০০ৰ পৰা ২০,০০০ লোকক নিযুক্তি দিয়াৰ লক্ষ্য লোৱা হৈছে বুলিও তেওঁ কয়।
সন্মিলনখনৰ বিষয়ে উল্লেখ কৰি মুখ্যমন্ত্ৰীয়ে কয় যে আইন-শৃংখলা বজাই ৰখাক সৰ্বাধিক অগ্ৰাধিকাৰ দিয়া হৈছে আৰু কোনো পৰিস্থিতিতে ইয়াৰ সৈতে আপোচ কৰা নহ’ব।
