গুৱাহাটী
অসমৰ মুখ্যমন্ত্ৰী হিমন্ত বিশ্ব শৰ্মাই দুৰ্গা পূজা মহোৎসৱৰ পূৰ্বে গুৱাহাটীৰ মুকলি মেনহ’ল তাৎক্ষণিকভাৱে বন্ধ কৰাৰ লগতে পদপথ আৰু পথ মেৰামতি কৰিবলৈ লোক নিৰ্মান বিভাগক নিৰ্দেশ দিছে।
৯ ছেপ্টেম্বৰত লোক নিৰ্মান বিভাগৰ বিষয়াসকলৰ সৈতে হোৱা এক বৈঠকত মুখ্যমন্ত্ৰী শৰ্মাই জোৰ দি কয় যে, নলা পৰিষ্কাৰ কৰাৰ পিছত মেনহ’লসমূহ সঠিকভাৱে বন্ধ কৰি দিয়াটো এটা মানক পৰিচালনা পদ্ধতি (এছ অ' পি)ৰ জৰিয়তে নিশ্চিত কৰিব লাগিব। কামটোক সৰ্বোচ্চ অগ্ৰাধিকাৰ হিচাপে গণ্য কৰা উচিত বুলি তেওঁ গুৰুত্ব আৰোপ কৰিছে।
নুনমাটি আৰু দীঘলীপুখুৰী সংযোগী নিৰ্মাণৰত উৰণ সেতুখন উৎসৱৰ পূৰ্বে জনসাধাৰণৰ বাবে সুলভ কৰি তোলাৰ নিৰ্দেশ দিয়ে মুখ্যমন্ত্ৰীগৰাকীয়ে। তদুপৰি গুৱাহাটীৰ লগতে কাছাৰ আৰু শ্ৰীভূমি জিলাৰ ডাঙৰ পথসমূহ শীঘ্ৰে মেৰামতিৰ বাবে অনুৰোধ জনায়।
সভাত প্ৰধান সম্পাদক কে কে দ্বিবেদী, জি এম চিৰ আয়ুক্ত এম এছ লক্ষ্মীপ্ৰিয়া, লোক নিৰ্মান বিভাগৰ আয়ুক্ত তথা বিশেষ সম্পাদক পবন তেৰাং, বিশেষ সম্পাদক বিভুতি শইকীয়া, মুখ্য অভিযন্তা (পথ) সঞ্জীব শ্যামকে ধৰি অন্যান্য জ্যেষ্ঠ বিষয়াসকল উপস্থিত থাকে।
