গুৱাহাটী
অসমত অব্যাহত ধাৰাসাৰ বৰষুণ আৰু চুবুৰীয়া অৰুণাচল প্ৰদেশত হোৱা প্ৰবল বৰষুণৰ ফলত সৃষ্টি হোৱা বানৰ প্ৰথমটো ঢৌত ৰাজ্যৰ ছয়খন জিলাৰ ২২ হাজাৰতকৈ অধিক লোক ক্ষতিগ্ৰস্ত হৈছে। এই তথ্য দেওবাৰে ৰাজ্যিক বিষয়াসকলে প্ৰকাশ কৰে।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণ (ASDMA)-এ প্ৰকাশ কৰা তথ্য অনুসৰি, ধেমাজি, নলবাৰী, ডিব্ৰুগড়, চিৰাং, লখিমপুৰ আৰু কোকৰাঝাৰ জিলাত মুঠ ২২,১২৪ জন লোক বানপানীৰ কবলত পৰিছে।
ইয়াৰ ভিতৰত ধেমাজি জিলাই সৰ্বাধিক ক্ষতিগ্ৰস্ত অঞ্চল হিচাপে পৰিগণিত হৈছে। জিলাখনত বৰ্তমান ১৫,৪৮৩ জন লোকে বানৰ প্ৰভাৱ ভুগি আছে।
ASDMA-ৰ বিবৃতিত কোৱা হৈছে যে, বানপানীয়ে ৯৬খন গাঁও প্লাৱিত কৰাৰ লগতে প্ৰায় ১,৬৯০ হেক্টৰ কৃষিভূমি নষ্ট কৰিছে।
অব্যাহত বৰষুণৰ ফলত ব্ৰহ্মপুত্ৰ আৰু ইয়াৰ উপনদীসমূহৰ জলস্তৰো বৃদ্ধি পাইছে। ASDMA-ৰ প্ৰতিবেদন অনুসৰি, শিৱসাগৰ জিলাৰ নাংলামুৰাঘাটত দিছাং নদীৰ জলস্তৰ বৰ্তমান বিপদসীমাৰ ওপৰেৰে বৈ আছে।
মানুহৰ উপৰিও বৰ্তমানৰ বান পৰিস্থিতিৰ ফলত ৪৮,১৯৯টা পশুও প্ৰভাৱিত হৈছে।
ইয়াৰ পূৰ্বে ধেমাজি জিলাৰ চিমেন নদীৰ ওপৰত থকা এখন ৰে'ল দলং আংশিকভাৱে ভাঙি পৰাৰ কথা উত্তৰ-পূব সীমান্ত ৰে'লৱেৰ (NFR) এজন বিষয়াই নিশ্চিত কৰে।
উত্তৰ-পূব সীমান্ত ৰে'লৱেৰ মুখ্য জনসংযোগ বিষয়া (CPRO)-এ প্ৰকাশ কৰা এক চৰকাৰী বিবৃতি অনুসৰি, ধেমাজি জিলাত আৰু ইয়াৰ আশে-পাশে ১১০ মিলিমিটাৰতকৈ অধিক বৰষুণ হোৱাৰ ফলত সৃষ্টি হোৱা বান আৰু নদীৰ পাৰত হোৱা খহনীয়াৰ বাবে দলংখন ক্ষতিগ্ৰস্ত হোৱাত আৰ্ছিপথাৰ আৰু চিমেন চাপৰি ষ্টেচনৰ মাজৰ ৰে'লপথত ৰে'ল চলাচল স্থগিত কৰা হৈছে।
১৯৬৫ চনত নিৰ্মাণ কৰা আৰু পিছলৈ ব্ৰডগেজলৈ ৰূপান্তৰ কৰা দলংখন পূৰ্বে সম্পূৰ্ণ সুৰক্ষিত অৱস্থাত আছিল। কিন্তু ধাৰাসাৰ বৰষুণৰ ফলত নদীৰ পাৰত বৃহৎ অংশ খহি যোৱাত দলংখনৰ এটা খুটা অস্থিৰ হৈ পৰে।
বিবৃতিটোত স্পষ্টকৈ কোৱা হৈছে যে, এই ঘটনাত কোনো ৰে'লৰ ক্ষতি হোৱা নাই আৰু কোনো লোক আঘাতপ্ৰাপ্ত হোৱা নাই। উক্ত শাখা ৰে'লপথত ৰে'ল চলাচল তুলনামূলকভাৱে কম আছিল আৰু নদীত প্ৰবল বান অহাৰ ফলত পূৰ্বেই ৰে'ল চলাচল বন্ধ কৰি দিয়া হৈছিল।
টিনিচুকীয়া সংমণ্ডলৰ অন্তৰ্গত মুৰকংচেলেক আৰু শিলাপথাৰৰ মাজৰ ৰে'ল চলাচল পৰৱৰ্তী নিৰ্দেশ নোপোৱালৈকে স্থগিত থাকিব।
বৰ্তমান এই পথত চলাচল কৰা ৰে'লসমূহ শিলাপথাৰৰ পৰাই যাত্ৰা আৰম্ভ আৰু সমাপ্ত কৰিব। ইচ্ছুক যাত্ৰীসকলক মুৰকংচেলেকৰ পৰা শিলাপথাৰলৈ নিয়াৰ বাবে বাছৰ ব্যৱস্থাও কৰা হৈছে।
ইয়াৰ উপৰিও, যাত্ৰীসকলক সকলো প্ৰয়োজনীয় সহায় আগবঢ়াবলৈ ধেমাজি, শিলাপথাৰ আৰু মুৰকংচেলেক ৰে'ল ষ্টেচনত সহায়ক কক্ষ মুকলি কৰা হৈছে।
উত্তৰ-পূব সীমান্ত ৰে'লৱে কৰ্তৃপক্ষই জিলা আৰু ৰাজ্য চৰকাৰৰ সৈতে সমন্বয় ৰাখি সমগ্ৰ পৰিস্থিতিৰ ওপৰত নিবিড়ভাৱে নজৰ ৰাখিছে।
.webp "অম্বুবাচী মেলাত প্ৰাণৰ শিল্পী জুবিন গাৰ্গৰ গুণানুকীৰ্তনঃ সাধু-সন্ন্যাসীৰ মুখতো শুনা গ’ল")
