বৰপেটা
মঙলবাৰে পশ্চিম অসমৰ বৰপেটা জিলাত ব্ৰহ্মপুত্ৰ নদীত যন্ত্ৰ চালিত নাও এখন ডুব যোৱাৰ ফলত চাৰিটা শিশুসহ কমেও ছয়জন লোক সন্ধানহীন হৈ পৰে।
বৰপেটা ৰাজহ চক্ৰৰ ক্ষেত্ৰ বিষয়া জ্যোতিৰ্ময় চৌধুৰীয়ে জনোৱা মতে, ৰহামপুৰৰ পৰা ২২ জন লোকক লৈ নাওখন বৰঘুল চৰলৈ গৈ থকা অৱস্থাত সংঘটিত হয় এই দুৰ্ঘটনা।
তেওঁ লগতে কয়, "যেতিয়া নাওখন চলি আছিল, তেতিয়া নদীৰ পানীৰ ঘূলিৰ সংস্পৰ্শলৈ আহি ডুব যোৱাৰ খবৰ আহিছে। বেছিভাগ লোককে ওচৰৰ আন এখন নাৱেৰে উদ্ধাৰ কৰিছিল।"
অৱশ্যে ছয়জন লোক এতিয়াও সন্ধানহীন হৈ আছে আৰু ইয়াৰে চাৰিজন শিশু বুলি জানিব পৰা গৈছে।
চৌধুৰীয়ে লগতে কয়, "স্থানীয় লোকে আমাক জনাইছে যে নাওখন কোনো সুৰক্ষা ব্যৱস্থা অবিহনে যাত্ৰা কৰি আছিল। কোনো যাত্ৰীয়ে লাইফ জেকেট পিন্ধা নাছিল।"
বৰ্তমান চিকিৎসাধীন হৈ থকা নাওখনৰ চালকজনক সোধা-পোছা কৰি দুৰ্ঘটনাৰ সঠিক কাৰণ জানিব পৰা যাব বুলি বিষয়াগৰাকীয়ে জানিবলৈ দিয়ে।
চৌধুৰীয়ে জানিবলৈ দিয়া মতে নিৰুদ্দেশ হোৱা লোক কেইজন হৈছে মধু মিঞা (৬০), সুকুৰজান নেছা (৪৫), আমিনা পাৰবিন (৮), ৰাহুল আমিন (৭), আৰিয়ান ইছলাম (৪) আৰু জুনুফা ইয়াছমিন (৫)।
