নতুন দিল্লী
সুৰা নীতিৰ গোচৰত দিল্লী উচ্চ ন্যায়ালয়ে অৰবিন্দ কেজৰিৱালক গ্ৰেপ্তাৰৰ পৰা সুৰক্ষা প্ৰদান কৰিবলৈ অস্বীকাৰ কৰাৰ কেইঘণ্টামানৰ পাছতে প্ৰৱৰ্তনকাৰী সঞ্চালকালয়ৰ এটা দলে মুখ্যমন্ত্ৰীৰ বাসগৃহত উপস্থিত হৈ ধন সৰবৰাহ প্ৰতিৰোধ আইনৰ অধীনত কেজৰিৱালক জেৰা আৰম্ভ কৰিছে।
সূত্ৰই জনোৱা মতে, দলটোত ১২ জন বিষয়া আছে আৰু তেওঁলোক চাৰ্চ ৱাৰেণ্ট লৈ বাসগৃহৰ ভিতৰত আছে। দিল্লীৰ মন্ত্ৰী সৌৰভ ভৰদ্বাজেও বৃহস্পতিবাৰে সন্ধিয়া সেই স্থানত উপস্থিত হৈছে।
ভৰদ্বাজে কয় যে যিদৰে আৰক্ষী ভিতৰত আছে আৰু কাকো সোমাবলৈ দিয়া হোৱা নাই, এনে লাগে যেন অভিযান চলোৱা হৈছে। অৰবিন্দ কেজৰিৱালক গ্ৰেপ্তাৰ কৰাৰ পৰিকল্পনা কৰা যেন লাগে।
আম আদমী পাৰ্টিৰ ৰাষ্ট্ৰীয় আহ্বায়ক কেজৰিৱালে এতিয়া জৰুৰী শুনানিৰ বাবে উচ্চতম ন্যায়ালয়ৰ কাষ চাপিছে।
সুৰা নীতিৰ অভিযোগ উত্থাপিত কেলেংকাৰিৰ সন্দৰ্ভত প্ৰৱৰ্তনকাৰী সঞ্চালকালয়ে জাৰি কৰা ৯খন চমনৰ সঁহাৰি দিয়া নাছিল আপৰ মুৰব্বীগৰাকীয়ে। সোমবাৰে তেওঁ দিল্লী জল ব’ৰ্ডত সংঘটিত হোৱা কথিত অনিয়মৰ সৈতে জড়িত ধন সৰবৰাহৰ গোচৰত সংস্থাটোৱে জাৰি কৰা চমনৰও সঁহাৰি দিয়া নাছিল।
সুৰা নীতিৰ গোচৰত বি আৰ এছ নেতা কে কবিতা গ্ৰেপ্তাৰ হোৱাৰ এসপ্তাহ নৌহওঁতেই দিল্লীৰ মুখ্যমন্ত্ৰীৰ বাসগৃহত প্ৰৱৰ্তনকাৰী সঞ্চালকালয়ৰ দলটোৱে জেৰা চলাইছে। কবিতা গ্ৰেপ্তাৰ হোৱাৰ পিছত প্ৰথমবাৰৰ বাবে এই গোচৰৰ ষড়যন্ত্ৰকাৰী হিচাপে কেজৰিৱালক নাম উল্লেখ কৰা হৈছে।
যোৱা বছৰৰ অক্টোবৰ মাহত প্ৰৱৰ্তনকাৰী সঞ্চালকালয়ে প্ৰথম চমন জাৰি কৰাৰ পিছৰে পৰা আৰু ২ নৱেম্বৰত তেওঁক হাজিৰ হ’বলৈ কোৱাৰ পিছৰে পৰা দিল্লীৰ মুখ্যমন্ত্ৰীগৰাকীক সংস্থাটোৱে গ্ৰেপ্তাৰ কৰিব বুলি তীব্ৰ জল্পনা-কল্পনা চলি আহিছে।
যোৱা বছৰৰ ফেব্ৰুৱাৰী মাহত এই গোচৰৰ সৈতে জড়িত দিল্লীৰ প্ৰাক্তন উপ-মুখ্যমন্ত্ৰী মনীষ ছিছোদিয়াক গ্ৰেপ্তাৰ কৰা হৈছিল, আৰু অক্টোবৰ মাহত আপৰ ৰাজ্যসভাৰ সাংসদ সঞ্জয় সিঙক জিম্মাত লোৱা হৈছিল।
বৃহস্পতিবাৰে দিল্লী উচ্চ ন্যায়ালয়ে সুৰা নীতিৰ গোচৰত কেজৰিৱালক গ্ৰেপ্তাৰৰ পৰা সুৰক্ষা দিবলৈ অস্বীকাৰ কৰিছিল যদিও প্ৰৱৰ্তনকাৰী সঞ্চালকালয়ক তেওঁৰ আবেদনৰ উত্তৰ দাখিল কৰিবলৈ কৈছিল। ২২ এপ্ৰিলত পৰৱৰ্তী শুনানিৰ বাবে বিষয়টো তালিকাভুক্ত কৰি ন্যায়াধীশ সুৰেশ কুমাৰ কাইট আৰু মনোজ জৈনৰ বিচাৰপীঠে কয়, "আমি দুয়োপক্ষৰ শুনানি পাইছো, আৰু আমি এই পৰ্যায়ত (সুৰক্ষা প্ৰদান কৰিবলৈ) আগ্ৰহী নহয়। প্ৰতিবাদীৰ (প্ৰৱৰ্তনকাৰী সঞ্চালকালয়) উত্তৰ দাখিল কৰাৰ স্বাধীনতা আছে।"
