গুৱাহাটী
পত্নীক হত্যা কৰাৰ অভিযোগত অভিযুক্ত পলাতক ৰেলৱে বিষয়া ৰাহুল সিঙক শনিবাৰে গুৱাহাটীত গ্ৰেপ্তাৰ কৰা হৈছে বুলি আৰক্ষীয়ে জানিবলৈ দিয়ে। অসমৰ কামৰূপ জিলাৰ ৰঙিয়াৰ সমীপৰ কেন্দুকোনা ৰেল ষ্টেচনৰ ষ্টেচন মাষ্টাৰ হিচাপে কৰ্মৰত সিঙৰ বাসগৃহত তেওঁৰ পত্নীক মৃত অৱস্থাত উদ্ধাৰ হোৱাৰ পষেকতকৈও অধিক সময়ৰ পাছত গ্ৰেপ্তাৰ হৈছে।
তেওঁ ছদ্মবেশত গুৱাহাটীৰ এটা অট্টালিকাত ব্যক্তিগত নিৰাপত্তাৰক্ষী হিচাপে কাম কৰি আছিল। গ্ৰেপ্তাৰৰ পিছত তেওঁক ৰঙিয়ালৈ অনা হয় বুলি আৰক্ষীয়ে জানিবলৈ দিয়ে। সিঙক স্থানীয় আদালতত হাজিৰ কৰোৱা হয় আৰু তেওঁক চাৰি দিনৰ আৰক্ষী জিম্মালৈ প্ৰেৰণ কৰা হয়।
উত্তৰ-পূব সীমান্ত ৰেলৱেৰ বিষয়াগৰাকীয়ে যোৱা ২ জুলাইত তেওঁলোকৰ সন্তানৰ সন্মুখত পত্নীক ছুৰীৰে আঘাত কৰি হত্যা কৰি পলায়ন কৰিছিল বুলি এজন আৰক্ষী বিষয়াই কয়। তেওঁ লগতে কয়, "নিহত মহিলাগৰাকীৰ নাম অঞ্জলি সিং। শিশু দুটাই আমাক জনোৱামতে তেওঁলোকৰ পিতৃয়ে তেওঁলোকৰ মাকক ছুৰীৰে আঘাত কৰিছিল।"
ফৰেনছিক বিভাগ আৰু অপৰাধ অনুসন্ধান বিভাগে স্থানীয় আৰক্ষীক তদন্তত সহায় কৰিছে। হত্যাকাণ্ডৰ কেইদিনমান পিছতে ভুক্তভোগীয়ে আত্মীয়-স্বজনলৈ প্ৰেৰণ কৰা এটা অডিঅ' ক্লিপ প্ৰকাশ পাইছিল। অডিঅ' ক্লিপটোত অঞ্জলিয়ে কোৱা শুনা যায় যে, তেওঁৰ স্বামী আৰু শাহুৱেকে তেওঁক মানসিক আৰু শাৰীৰিক নিৰ্যাতন চলাইছিল। স্বামীয়ে তেওঁক হত্যাৰ ভাবুকি দিয়াৰ কথাও কৈছিল আৰু যদি তাইৰ কিবা হয় তেন্তে তেওঁৰ স্বামীকে জগৰীয়া কৰা উচিত।
.webp "প্ৰতিনিধিত্বমুলক ছবি")
.webp)
