যোৰহাট
বৃহস্পতিবাৰে সন্ধিয়া কাৰ্বি আংলং জিলাৰ চোকিহোলাৰ অন্তৰ্গত নিলিপ ব্লকৰ সমীপৰ এটা দুৰ্গম পাহাৰীয়া এলেকাত যোৰহাটৰ পৰা উৰা মৰা এখন সুখোই-৩০ যুদ্ধ বিমান দুৰ্ঘটনাগ্ৰস্ত হোৱাৰ সন্দেহ কৰা হৈছে।
স্থানীয় ৰাইজৰ মতে, সন্ধিয়া প্ৰায় ৭ বজাত অঞ্চলটোৰ এটা ওখ পাহাৰীয়া অঞ্চলত এক বৃহৎ বিস্ফোৰণ সদৃশ শব্দ শুনা যায়। তীব্ৰ বিস্ফোৰণৰ কিছু সময়ৰ পিছতে ওচৰৰ গাঁৱৰ লোকসকলে পাহাৰীয়া অঞ্চলটোত যুদ্ধ বিমান দুৰ্ঘটনাগ্ৰস্ত হোৱাৰ সন্দেহ প্ৰকাশ কৰে।
প্ৰত্যক্ষদৰ্শীয়ে জনোৱা মতে, শব্দটো বৃহৎ আৰু চাৰিওফালৰ পাহাৰৰ মাজত প্ৰতিধ্বনিত হোৱাৰ ফলত বাসিন্দাসকলৰ মাজত আতংকৰ সৃষ্টি হয়। স্থানীয় একাংশ লোকে বিস্ফোৰণৰ কিছু সময়ৰ পিছতে পাহাৰৰ দিশৰ পৰা ধোঁৱা ওলোৱা লক্ষ্য কৰা বুলিও জানিবলৈ দিয়ে।
সূত্ৰই ইংগিত দিছে যে সুখয়-৩০ যুঁজাৰু বিমানখন যোৰহাটৰ পৰা উৰা মাৰিছিল যদিও আনুষ্ঠানিক নিশ্চিতকৰণৰ বাবে এতিয়াও অপেক্ষা কৰা হৈছে।
সন্দেহযুক্ত দুৰ্ঘটনাস্থলীটো মানৱ বসতিস্থলৰ পৰা বহু দূৰত অৱস্থিত হোৱাৰ বাবে স্থানীয় লোক আৰু উদ্ধাৰকাৰীয়ে তৎক্ষণাত অঞ্চলটোত উপস্থিত হোৱাত অসুবিধাৰ সৃষ্টি হৈছে। নিৰাপত্তা বাহিনী আৰু সংশ্লিষ্ট কৰ্তৃপক্ষই সঠিক পৰিস্থিতিৰ বিষয়ে জানিবলৈ অনুসন্ধান আৰু উদ্ধাৰ অভিযান আৰম্ভ কৰিছে।
এতিয়ালৈকে পাইলট বা বিমানখনৰ অৱস্থা সন্দৰ্ভত কোনো আনুষ্ঠানিক বিবৃতি প্ৰকাশ কৰা হোৱা নাই। কৰ্তৃপক্ষই এই কাণ্ডৰ সত্যাসত্য নিৰূপণৰ সময়ত অধিক সবিশেষৰ বাবে অপেক্ষা কৰি আছে।
