পবিত্ৰ কোৰআনখন মূলত আৰবী ভাষাত লিপিবদ্ধ যদিও বিভিন্ন সময়ত বিভিন্ন ভাষাত ইয়াৰ অনুবাদ কৰা হৈছে। ভাৰতবৰ্ষৰ দৰে দেশত অধিকাংশ লোকেই আৰৱী ভাষা বুজি নাপায়। ইছলাম ধৰ্মাৱলম্বী লোকসকলে শিশু অৱস্থাতে কম বেছি পৰিমানে আৰৱী বা কোৰআনৰ শিক্ষা গ্ৰহণ কৰে যদিও ইয়াৰ অৰ্থ বুজি নাপাই বা নাজানে। সেয়েহে পবিত্ৰ কোৰআনত আল্লাহে কি কৈছে বা কি উপদেশ দিছে সেই বিষয়ে আলিম-ওলেমাসকলৰ পৰা হে শুনি থাকে। কিন্তু পবিত্ৰ কোৰআনখন নিজৰ নিজৰ মাতৃভাষাত উপলদ্ধ হোৱাৰ লগে লগে নিজেই সকলো পঢ়িব পাৰে। লগতে অন্য ধৰ্মাৱলম্বী লোকেই কোৰআনৰ প্ৰতি আগ্ৰহ থাকিলে মাতৃভাষাতে পঢ়িব পাৰে।
উল্লেখযোগ্য যে যিসকলে কোৰআন পঢ়িব নাজানে কিন্তু কোৰআনত কি আছে জানিবলৈ উৎসুক, তেওঁলোকৰ বাবে এই অডিঅ' সংস্কৰণটো অতি সুবিধাজনক। মৌলানা নুৰুল আমিন কাছিমিয়ে কয়; "ধৰ্মীয় দৃষ্টিভংগীৰে কোৰআন পঢ়িলে প্ৰতিটো আখৰত ছোৱাব (পূণ্য) পোৱা যায়। যিসকলে কোৰআন পঢ়িব নাজানে, কিন্তু কোনোবাই পঢ়িলে মনোযোগেৰে শুনে, তাতেও ছোৱাব পোৱা যায়। কোৰআনখন কেৱল ইছলাম ধৰ্মাৱলম্বী লোকৰ বাবে নহয়, এই আল্লাহৰ এই পবিত্ৰ গ্ৰন্থখন সমগ্ৰ মানৱ জাতিৰ বাবেই। যিসকলে হেদায়ত বা সৎ পথ বিচাৰে, তেওঁলোকৰ বাবেই হৈছে কোৰআন। কোৰআনত প্ৰত্যেকটো জাতি ধৰ্মৰ বাবেই পথ প্ৰদৰ্শন কৰা হৈছে। যদি কোনোবাই ইয়াৰ পৰা সৎ পথ ল'ব বিচাৰে, তেন্তে নিশ্চিত ভাবে ল'ব পাৰে।"
মৌলানা নুৰুল আমিন কাছিমি
কোৰআনৰ অৰ্থ সকলোৱে পঢ়িব পাৰে নে নোৱাৰে সেই বিষয়ে সোধাত মৌলানা কাছিমিয়ে কয়; "তেনেকুৱা কোনো কথা নাই, কোৰআনৰ অৰ্থ সকলোৱে পঢ়িব পাৰে। মূল কথাটো হ'ল পবিত্ৰ কোৰআনখন বুজিব চেষ্টা কৰিব লাগে। কিন্তু তাত এটা কথা আছে, কোৰআন যিহেতু আৰৱী ভাষাত লিপিবদ্ধ আছে। তাৰ অৰ্থ বিভিন্ন ক্ষেত্ৰত বেলেগ বেলেগ হোৱা দেখা যায়। যদি উপৰি উপৰি অৰ্থ পঢ়িলে কোৰআনক ভুলকৈ বুজিব পাৰে। গতিকে কোৰআন পঢ়াৰ ক্ষেত্ৰত এজন গাইড ল'ব লাগে। গাইড জন এজন আলিম হ'লে ভালদৰে বাখ্যা কৰি দিব পাৰে।"
উল্লেখযোগ্য যে, পবিত্ৰ কোৰআনৰ অসমীয়া অৰ্থৰ অডিঅ' সংস্কৰণ মুকলি হোৱাৰ পিছত এতিয়া মৌলানা নুৰুল আমিন কাছিমিয়ে কোৰআনৰ টফছিৰ (বাখ্যা বা ভাঙনি) অডিঅ ইউটিউব যোগে প্ৰকাশ কৰাৰ পৰিকল্পনা কৰিছে। "যিহেতু এই কামৰ বাবে আমাক অলপ অৰ্থৰ প্ৰয়োজন হয়। গতিকে যদি কোনো ব্যক্তিয়ে এই কামৰ বাবে আমাক আৰ্থিক অনুদান আগবঢ়াব বিচাৰে তেন্তে আমি কামটো সোনকালে আৰম্ভ কৰিব পাৰিম", মৌলানা নুৰুল আমিন কাছিমিয়ে কয়।
উল্লেখযোগ্য যে মৌলানা নুৰুল আমিন কাছিমিৰ নেতৃত্বত প্ৰকাশ পোৱা অসমীয়া অৰ্থৰ অডিঅ' অসমীয়াত শুনিব বিচাৰে তেন্তে ইউটিউবত Assamese Translation of Quran নতুবা Nurul Amin Qasimi বুলি বিচাৰিলে দেখা পাব। Voice of Assamese Quran নামৰ ইউটিউব চেনেলটোত এই অডিঅ' সংস্কৰণ উপলদ্ধ আছে।
