গুৱাহাটী
সোমবাৰে ইয়াৰ এখন আদালতে “কাৰিকৰী ত্ৰুটি”ৰ বাবে জুবিন গাৰ্গৰ মৃত্যুৰ গোচৰৰ এজন অভিযুক্তৰ বেংক একাউণ্ট ফ্ৰীজ বাতিল কৰাৰ (de-freeze) নিৰ্দেশ দিয়ে, আনহাতে অভিযোগৰ শুনানিৰ বিবেচনাৰ বাবে ১৯ মাৰ্চৰ দিন নিৰ্ধাৰণ কৰে বুলি গোচৰটোৰ বিশেষ ৰাজহুৱা অধিবক্তা (এছপিপি)য়ে জনায়।
এই গোচৰৰ শুনানি গ্ৰহণ কৰি থকা কামৰূপ মহানগৰ জিলা আৰু সত্ৰ আদালতে ছিংগাপুৰ আৰক্ষীৰ প্ৰতিবেদন বিচৰা আন এজন অভিযুক্তৰ আবেদন নাকচ কৰে বুলিও তেওঁ কয়।
সাংবাদিকৰ আগত এছপিপি জিয়াউল কামাৰে কয় যে, "মাননীয় আদালতে অভিযোগৰ শুনানিৰ বিবেচনাৰ বাবে ১৯ মাৰ্চৰ দিন নিৰ্ধাৰণ কৰিছে। ইয়াৰ পিছত বিচাৰ আৰম্ভ হ'ব।"
অভিযোগৰ শুনানিৰ নেতৃত্ব দিয়া বিচাৰ বিভাগ ইয়াৰ বাবে সাজু হৈছে বুলি তেওঁ দৃঢ়তাৰে কয় যদিও অভিযুক্তৰ হৈ তেওঁ কোনো মন্তব্য দিব নোৱাৰিলে।
পূৰ্বে বিভিন্ন আবেদন দাখিল কৰি পলম কৰাৰ কৌশল গ্ৰহণ কৰাৰ অভিযোগ উত্থাপন কৰা কামাৰে লগতে কয়, "অভিযুক্তই কি কৰিব, কি আবেদন দাখিল কৰিব পাৰে মই নাজানো।"
তেওঁ কয় যে আদালতে “কাৰিকৰী কাৰণত” এজন অভিযুক্ত শ্যামকানু মহন্তৰ বেংক একাউণ্ট ফ্ৰিজ বাতিল কৰাৰ নিৰ্দেশ দিছে।
কণ্ঠশিল্পীগৰাকীৰ ভগ্নী পালমে বৰঠাকুৰৰ সৈতে শুনানিৰ সময়ত উপস্থিত থকা গাৰ্গৰ পত্নী গৰিমা শইকীয়া গাৰ্গে মহন্তৰ বেংক একাউণ্ট ডি-ফ্ৰিজ কৰাত “হতাশা” প্ৰকাশ কৰে।
"আমাৰ বাবে বেয়া খবৰ। কিছু প্ৰক্ৰিয়াগত ত্ৰুটি আৰু কাৰিকৰী সমস্যাৰ বাবে এই নিৰ্দেশ দিয়া হৈছে," গৰিমা গাৰ্গে কয়।
জ্যেষ্ঠ অধিবক্তাগৰাকীয়ে আৰু কয় যে গাৰ্গৰ গোচৰত ছিংগাপুৰ আৰক্ষীৰ প্ৰতিবেদনৰ প্ৰতিলিপি বিচাৰি আন এজন অভিযুক্ত সিদ্ধাৰ্থ শৰ্মাই কৰা আবেদন নাকচ কৰিছে আদালতে।
তেওঁ কয়, "আদালতে কৈছে যে অসম আৰক্ষীয়ে ইতিমধ্যে সকলো সবিশেষ অধিগ্ৰহণ কৰিছে আৰু ইয়াৰ ওপৰত অভিযুক্তই অধিক পৰীক্ষাৰ বাবে ১০ৰ পৰা ১২ মাৰ্চলৈ, দুপৰীয়া ২ বজাৰ পৰা বিয়লি ৪ বজালৈ প্ৰৱেশ কৰিব পাৰিব।"
গুৱাহাটীত থকা শৰ্মাই নিজৰ ফ্লেট ডি-এটাচমেণ্ট বিচৰা সন্দৰ্ভত কমাৰে কয় যে শৰ্মাই আৰক্ষীক ১৬ লাখ টকাৰ বেংক জাউৰিটি দিলে সেই ফ্লেটটো মুকলি কৰিব পাৰে বুলি আদালতে নিৰ্দেশ দিছে।
গাৰ্গৰ মেনেজাৰ শৰ্মাই ফ্লেটটো ক্ৰয় কৰাৰ সময়ত কণ্ঠশিল্পীগৰাকীৰ পৰা আত্মসাৎ কৰা ১৬ লাখ টকাৰ ধন ব্যৱহাৰ কৰাৰ অভিযোগ উত্থাপন হৈছে।
শৰ্মাৰ সহ-মালিকানা পেকেজড খোৱাপানী কোম্পানী মহাবীৰ একুৱা সম্পৰ্কীয় এটা সুকীয়া গোচৰো ১৯ মাৰ্চত একেখন আদালতে গ্ৰহণ কৰিব বুলিও কামাৰে লগতে কয়।
চৰকাৰে ঘোষণা কৰা মতে গোচৰটো আগবঢ়াই নিবলৈ ফাষ্ট ট্ৰেক ক’ৰ্ট গঠনৰ ক্ষেত্ৰত কিবা অগ্ৰগতি সন্দৰ্ভত সোধাত এছপিপিয়ে কয় যে এয়া চৰকাৰ আৰু গুৱাহাটী উচ্চ ন্যায়ালয়ৰ মাজৰ বিষয়।
তেওঁ কয় যে ইয়াৰ দ্বাৰা শুনানিৰ প্ৰক্ৰিয়াটো নিশ্চিতভাৱে ক্ষিপ্ৰ হ’ব, যদিও “আইনী পদ্ধতিসমূহ কৰ্তন কৰিব নোৱাৰি”।
কামাৰে লগতে কয়, "অভিযুক্তসকলৰো নিজৰ অধিকাৰ আছে। তেওঁলোকে হয়তো (ফাষ্ট ট্ৰেক আদালতৰ আগত) আবেদন দাখিল কৰিব, আমিও আবেদন দাখিল কৰিব লাগিব।"
যদিও তেওঁ বিষয়টোৰ অগ্ৰগতিৰ বিষয়ে অৱগত নহয়, গৰিমাই লগতে আশা কৰে যে ফাষ্ট ট্ৰেক আদালত গঠন কৰিলে গোচৰটো ক্ষিপ্ৰ হ’ব।
বিগত বৰ্ষৰ ১৯ ছেপ্টেম্বৰত উত্তৰ-পূব ভাৰত মহোৎসৱৰ চতুৰ্থ সংস্কৰণত অংশগ্ৰহণ কৰিবলৈ গৈ ছিংগাপুৰত সাগৰত সাঁতুৰি থকাৰ সময়তে বিখ্যাত গায়কজনৰ মৃত্যু হৈছিল।
ৰাজ্যিক আৰক্ষীৰ চিআইডিৰ বিশেষ তদন্তকাৰী দলে (এছআইটি) গোচৰটোৰ তদন্ত কৰি ডিচেম্বৰ মাহত অভিযোগনামা দাখিল কৰিছিল, য’ত একাংশ অভিযুক্তৰ বিৰুদ্ধে হত্যাৰ অভিযোগ আছিল।
এনইআইএফৰ মুখ্য আয়োজক শ্যামকানু মহন্ত আৰু শৰ্মাৰ উপৰিও গাৰ্গৰ বেণ্ডৰ দুই সদস্য শেখৰ জ্যোতি গোস্বামী আৰু অমৃতপ্ৰভা মহন্ত, তেওঁৰ সম্পৰ্কীয় ভাতৃ তথা বৰ্তমান নিলম্বিত অসম আৰক্ষীৰ ডিএছপি সন্দিপন গাৰ্গ আৰু তেওঁৰ পিএছঅ’ নন্দেশ্বৰ বৰা আৰু প্ৰবীণ বৈশ্য এই গোচৰৰ অভিযুক্ত হিচাপে জেলত আছে।
ইয়াৰ পূৰ্বে ৰাজ্যৰ মন্ত্ৰীসভাই জ্যেষ্ঠ অধিবক্তা জিয়াউল কামাৰৰ নেতৃত্বত পাঁচজনীয়া এটা অধিবক্তাৰ দল নিযুক্তি দিছিল। ইয়াত ব্ৰজেন্দ্ৰ মোহন চৌধুৰী, কিশোৰ দত্ত, প্ৰাঞ্জল দত্ত আৰু বিকাশ জম্মাৰক নিযুক্তি দিয়া হৈছিল।
