আধিবক্তা শ্বেহনাজ ৰহমানে কয়, "অতি দুখৰ কথা যে আমাৰ সমাজখনে আজিও নাৰীৰ সুৰক্ষাৰ বাবে থকা আইনবোৰৰ বিষয়ে অৱগত নহয়। যিসকলে এই আইনৰ বিষয়ে জানে তেওঁলোকে মহিলাসকলৰ মাজত সজাগতা সৃষ্টি কৰাত ব্যৰ্থ হৈছে। সেয়াহে মই ভাবোঁ যে আমি নাৰীসকলক তেওঁলোকৰ সুবিধা তথা সুৰক্ষাৰ বাবে থকা আইনৰ সম্পৰ্কে সজাগতা সৃষ্টি কৰিব লাগিব। তেওঁলোকক মুকলিকৈ নিৰ্ভয়ে স্বস্তিৰ নিশ্বাস ত্যাগ কৰিব পৰা এক পৰিবেশৰ সৃষ্টি কৰিব লাগিব তেতিয়াহে নাৰী দিৱসৰ তাৎপৰ্য সফল হব।"

কবি শ্বাহিনে কয়, "এলবাৰ্ট আইনষ্টাইনে কৈছিল, "প্ৰকৃতিৰ গভীৰতালৈ চাওক আৰু তাৰ পিছত আপুনি সকলোবোৰ ভালদৰে বুজি পাব।" মই অনুভৱ কৰোঁ যে তেওঁৰ এই কাঠাফাঁকি নাৰী জাতিৰ সৈতে সম্পৰ্কিত। কিয়নো এগৰাকী মহিলাও প্ৰকৃতিৰ দৰে গভীৰ, প্ৰকৃতিৰ দৰে সুন্দৰ, কোমল, শান্ত আৰু পৰ্যবেক্ষণকাৰী হোৱাৰ লগতে শক্তিশালী আৰু নীৰৱ আৰু ভয়ংকৰও হয়।  প্ৰকৃতি আৰু এগৰাকী নাৰীৰ সাৰাংশ একে হোৱাৰ কাৰণবোৰৰ বাবে প্ৰকৃতিক সদায় নাৰীসুলভ বুলি গণ্য কৰা হয়। সেয়েহে, মই নিজেও  প্ৰথমে এগৰাকী নাৰী আৰু তাৰ পিছত কবি হোৱাৰ বাবে মই সদায় প্ৰকাশৰ শক্তিৰ ওপৰত বিশ্বাস কৰি আহিছো। সঁচা কোৱাৰ সামৰ্থ্য, নিজৰ বাবে থিয় দিয়া, অন্যায়ৰ বিৰুদ্ধে যুঁজ দিয়া আদি এগৰাকী নাৰীৰ বাবে এটা কণ্ঠ হ'ব।"