তেওঁ উত্তৰ প্ৰদেশৰ ট্ৰেইল ব্লেজাৰছৰ ওপৰত ৰাজ্যসভাৰ টিভিৰ এখন তথ্যচিত্ৰত আৰু উত্তৰ প্ৰদেশৰ শীৰ্ষ ১০০ প্ৰেৰণাদায়ক মুছলমান মহিলাৰ আৰ বি টি চিৰ তালিকাত স্থান লাভ কৰিছে। লিংগ সমতা আৰু সামাজিক ন্যায়ৰ ওপৰত ভাষণ দি ৰাষ্ট্ৰীয় আৰু আন্তঃৰাষ্ট্ৰীয় ৰেডিঅ’তো নাকভিয়ে নিজৰ কণ্ঠ দাঙি ধৰিবলৈ সক্ষম হৈছে।
শেহতীয়াকৈ গ্ৰন্থপ্ৰেমীৰ মাজত বিশেষকৈ মহিলাসকলৰ মাজত তেওঁৰ "দ্য ৰিলাক্টেণ্ট মাদাৰ: এ ষ্ট’ৰী ন’ ৱান ৱান্টছ টু টেল" নামৰ গ্ৰন্থখনে ব্যাপক সমাদৰ লাভ কৰিবলৈ সক্ষম হৈছে। তেওঁৰ এই গ্ৰন্থখনত গৰ্ভাৱস্থা, প্ৰসৱ আৰু শিশুক লালন-পালনৰ প্ৰকৃত পৰীক্ষা আৰু কষ্ট আদিৰ বিষয়ে বিস্তৃত বৰ্ণনা আগবঢ়োৱা হৈছে। গৰ্ভাৱস্থাৰ সময়ত এগৰাকী মহিলাই অন্য গ্ৰন্থবোৰৰ লগতে এই গ্ৰন্থখন নিশ্চয়কৈ অধ্যয়ন কৰা উচিত।
গ্ৰন্থখনত সাহসী মহিলা সাংবাদিক নকভিয়ে লিখিছে কিদৰে গৰ্ভাৱস্থাই তেওঁৰ জীৱনটো হঠাতে স্তব্ধ কৰি তুলে, বমিৰ অনুভৱ হোৱাৰ ফলত বহু প্ৰত্যাশিত পেছাদাৰী ভ্ৰমণ বাতিল, পেটৰ কেচুঁৱাৰ নিৰাপত্তাৰ বাবে পথৰ ভ্ৰমণ স্থগিত ৰখা, আনকি বাহিৰত খাদ্য খোৱাৰ দৰে সাধাৰণ আনন্দবোৰো সংবেদনশীল পেটৰ বাবে বাধাগ্ৰস্ত হয়।
অৱশ্যে যিসকলে সন্তান জন্ম দিয়াৰ পৰিকল্পনা কৰি গৰ্ভধাৰণ কৰে, তেওঁলোকৰ ক্ষেত্ৰত এই অনুভৱবোৰ কিছু পৃথক হ’ব পাৰে। কিন্তু, অ-পৰিকল্পিত গৰ্ভাৱস্থাত যেতিয়া আপুনি উপভোগ কৰি থকা এটা জীৱনৰ পৰা বিৰতি ল’বলৈ বাধ্য হয়, তেতিয়া ইয়াৰ বাবে দায়ী ব্যক্তিজনক আৰু কিছু ক্ষেত্ৰত শিশুটিকো ভাল পোৱাটো যথেষ্ট কঠিন হৈ পৰে। নকভিয়ে সাহসীকতাৰে এই সত্যটো গ্ৰন্থখনত উল্লেখ কৰিছে।
গ্ৰন্থখনত নকভিয়ে এই কথাও উল্লেখ কৰিছে যে, গৰ্ভাৱস্থা যদি কঠিন হয়, তেন্তে শিশুৰ পিছৰ অৱস্থা তাতকৈও কঠিন হয়। শিশুক ডাঙৰ-দীঘল কৰাৰ বাবে লোৱা দীঘলীয়া বিশ্ৰামৰ অন্ত পেলাই কিদৰে, এগৰাকী মাতৃয়ে নতুনকৈ জীৱনটো আৰম্ভ কৰিবলগীয়া হয়, সেই বিষয়েও গ্ৰন্থখনত সুন্দৰকৈ উপস্থাপন কৰা হৈছে।
এক কথোপকথোনত জেহৰা নাকভিয়ে আঙুলিয়াই দিয়ে যে মাতৃত্বৰ বিষয়ে আমি ৰখা কু-সংস্কাৰসমূহ পুনৰ বিবেচনা কৰাটো অত্যন্ত গুৰুত্বপূৰ্ণ। কাৰণ মাতৃসকলো একো একোজন মানুহ, আৰু তেওঁলোকক আন যিকোনো মানুহৰ দৰেই নিজৰ অনুভৱ প্ৰকাশ কৰিবলৈ দিয়া উচিত। শশী দেশপাণ্ডে ৰাইটিং ফ্ৰম দ্য মাৰ্জিন এণ্ড অদাৰ এছেছত লিখাৰ দৰে: "মাতৃত্ব এক অস্থিৰ অভিজ্ঞতা, অভূতপূৰ্ব উত্থান-পতনেৰে ভৰা মিশ্ৰিত আৱেগ আৰু আভ্যন্তৰীণ সংগ্ৰামেৰে ভৰপূৰ অনুভূতি।"
নাকভীয়ে কয় যে নাৰীৰ উত্থানৰ বাবে এই চিন্তাও তেওঁলোকৰ মনৰ পৰা আঁতৰাই পেলোৱাটো প্ৰয়োজনীয় যে কোনোবাই তেওঁলোকৰ বিষয়ে চিন্তা কৰিছে, যেতিয়ালৈকে মহিলাসকলে নিজেই তেওঁলোকৰ উত্থানৰ কথা নাভাবে তেতিয়ালৈকে সমাজত তেওঁলোকৰ মৰ্যাদা উচ্চ নহ’ব।
লেখক তথা সাংবাদিকগৰাকীয়ে জানিবলৈ দিয়ে যে তেওঁ আলিগড়ত জন্ম গ্ৰহণ কৰিছিল আৰু ২০০৯ চনত দিল্লীলৈ আহিছিল। সকলো কৰ্মক্ষেত্ৰত মহিলাৰ উন্নতিৰ হকে কাম কৰি থকা নাকভীয়ে আলিগড় মুছলিম বিশ্ববিদ্যালয়ত অধ্যয়ন কৰিছিল। তেওঁ কয় যে চৰকাৰে মহিলাসকলৰ শিক্ষাৰ ওপৰত গুৰুত্ব দিব লাগিব যাতে তেওঁলোকে জীৱনত নিজৰ গুৰুত্ব উপলব্ধ কৰিব পাৰে আৰু নতুন চিন্তাৰে আগুৱাব পাৰে।
