নতুন দিল্লী
বাংলাদেশৰ মুদ্ৰা নোটত আৰু নাথাকিব 'জাতিৰ পিতৃ' প্ৰয়াত শ্বেখ মুজিবুৰ ৰহমানৰ ফটো। চুবুৰীয়া দেশখনত মহম্মদ ইউনুছ নেতৃত্বাধীন অন্তৱৰ্তীকালীন চৰকাৰৰ শাসনৰ অধীনত হোৱা এইটো হৈছে অন্যতম উল্লেখযোগ্য আৰু ব্যাপক পৰিৱৰ্তন।
খবৰ অনুসৰি বাংলাদেশে শেহতীয়াকৈ নতুনকৈ ডিজাইন কৰা বেংকনোট জাৰি কৰিবলৈ আৰম্ভ কৰিছে। য’ত দেশৰ প্ৰতিষ্ঠাপক শ্বেখ মুজিবুৰ ৰহমানৰ ফটো নাথাকে, যাক জনপ্ৰিয়ভাৱে 'বংগবন্ধু' বুলিও কোৱা হয়।
জানিব পৰা মতে, দেওবাৰৰ অৰ্থাৎ ১ জুনৰ ঠিক আগতে বাংলাদেশৰ কৰ্তৃপক্ষই নতুন মুদ্ৰা নোট জাৰি কৰা বুলি জানিব পৰা গৈছে। য’ত প্ৰথমবাৰৰ বাবে মুজিবুৰ ৰহমানৰ ফটো নাই। এই উন্নয়নৰ বিষয়ে জনা সূত্ৰসমূহে বিশ্বাস কৰে যে, মুদ্ৰা নোটৰ পূৰ্বৰ ডিজাইন সলনি কৰিবলৈ দেওবাৰে নতুন বেংক নোট জাৰি কৰা হৈছে।
বাংলাদেশৰ কেন্দ্ৰীয় বেংকৰ এজন জ্যেষ্ঠ বিষয়াৰ উদ্ধৃতি দি প্ৰকাশ পোৱা এক বাতৰি অনুসৰি নতুনকৈ ডিজাইন কৰা মুদ্ৰা শৃংখলাত এতিয়া কোনো মানৱীয় ব্যক্তিৰ প্ৰতিকৃতি নাই।
নতুন বেংক নোটত এতিয়া বাংলাদেশৰ সাংস্কৃতিক ঐতিহ্য প্রদর্শন কৰি প্রাকৃতিক ভূ-প্ৰকৃতি, ঐতিহাসিক ল্যাণ্ডমার্ক আদি প্রদর্শন কৰা হৈছে৷ নতুন মুদ্ৰাৰ নোটত মন্দিৰ আৰু বৌদ্ধ ধৰ্মৰ পূজাস্থলীৰ প্ৰতিচ্ছবিও সন্নিবিষ্ট কৰা হৈছে।
সূত্ৰসমূহে দাবী কৰে যে, ৯টা মুদ্ৰাবৰ্গৰ ভিতৰত ৩টা মুদ্ৰাবৰ্গ এতিয়ালৈকে জাৰি কৰা হৈছে। আনহাতে বাকী মুদ্ৰাবৰ্গসমূহ পিছত প্ৰৱৰ্তন হোৱাৰ সম্ভাৱনা আছে। এক সূত্ৰই জনোৱা মতে, বৰ্তমান আৰু বৰ্তমানৰ বেংকনোট আৰু মুদ্ৰা অৱশ্যে প্ৰচলিত হৈ থাকিব।
