ডুবাই
ডুবাইৰ পৰা ইজৰাইলৰ টেল আভিভ অভিমুখে উৰা মৰা ফ্লাইডুবাইৰ এখন যাত্ৰীবাহী বিমানত বুধবাৰে আকাশমাৰ্গত সংঘটিত এক গুৰুতৰ ঘটনাৰ ফলত বিমানখন ছৌদি আৰৱৰ তাবুকত জৰুৰীভাৱে অৱতৰণ কৰিবলগীয়া হয়। বিমানখনৰ ভিতৰত থকা সকলো যাত্ৰী আৰু কৰ্মচাৰী সুৰক্ষিত বুলি বিমান সংস্থাটোৱে নিশ্চিত কৰিছে। অৱশ্যে ঘটনাটোৰ প্ৰকৃত কাৰণ আৰু ক্ৰমবিকাশ সম্পৰ্কে তদন্ত অব্যাহত আছে।
ডুবাইৰ পৰা টেল আভিভলৈ যোৱা এফ জেড–১০৭৩ বিমানখনত এই ঘটনা সংঘটিত হয়। উৰণৰ মাজভাগত বিমানখনৰ পৰা জৰুৰী সংকেত প্ৰেৰণ কৰা হয়। উৰণ অনুসৰণকাৰী তথ্য অনুসৰি, বিমানখনে হঠাতে যথেষ্ট উচ্চতা হেৰুৱাইছিল আৰু পিছত ছৌদি আৰৱৰ তাবুকৰ দিশে পথ সলনি কৰে। বিমানখন নিৰাপদে তাবুক বিমানবন্দৰত অৱতৰণ কৰে।
ছৌদি বিমানবন্দৰ কৰ্তৃপক্ষৰ মতে, স্থানীয় সময় অনুসৰি পুৱা ৮ বাজি ৪৪ মিনিটত বিমানখনৰ পৰা জৰুৰী অৱতৰণৰ অনুৰোধ লাভ কৰা হৈছিল। প্ৰায় এঘণ্টাৰ পাছত, পুৱা ৯ বাজি ৪৫ মিনিটত বিমানখন তাবুক বিমানবন্দৰত নিৰাপদে অৱতৰণ কৰে। বিমানখনৰ দুয়োজন চালক আহত হোৱা বুলি কৰ্তৃপক্ষই প্ৰকাশ কৰিছে আৰু তেওঁলোকক চিকিৎসালয়লৈ প্ৰেৰণ কৰা হয়। যাত্ৰীসকলক বিমানবন্দৰৰ যাত্ৰীবিশ্ৰাম কক্ষত প্ৰয়োজনীয় সহায় আগবঢ়োৱা হয়।
বিমানখনৰ দুজন চালকৰ পৰিচয় সম্পৰ্কে প্ৰকাশিত তথ্য অনুসৰি, মুখ্য চালকজন ভাৰতীয়, আনহাতে সহকাৰী চালকজন ওমানৰ নাগৰিক আছিল। সহকাৰী চালকজনে বিমান সংস্থাটোত তুলনামূলকভাৱে কম সময়হে কাম কৰিছিল বুলি ইজৰাইলী সংবাদমাধ্যমে প্ৰকাশ কৰিছে। ইজৰাইলী কৰ্তৃপক্ষৰ দাবী অনুসৰি, সহকাৰী চালকজনে মুখ্য চালকক ছুৰিকাঘাত কৰিছিল আৰু বিমানখনৰ নিয়ন্ত্ৰণ ব্যৱস্থাত হস্তক্ষেপ কৰাৰ চেষ্টা কৰিছিল। অৱশ্যে এই অভিযোগৰ সম্পূৰ্ণ সত্যতা ছৌদি তদন্তকাৰী সংস্থা বা ফ্লাইডুবাইৰ তৰফৰ পৰা এতিয়ালৈকে স্বতন্ত্ৰভাৱে নিশ্চিত কৰা হোৱা নাই।
ফ্লাইডুবাইয়ে পাইলট দুজনৰ পৰিচয় আনুষ্ঠানিকভাৱে প্ৰকাশ কৰা নাই। কিন্তু, এই ঘটনাৰ কেন্দ্ৰবিন্দুত থকা বিমানখনৰ মুখ্য চালক হিচাপে ভাৰতীয় নাগৰিক তথা স্পাইচজেটৰ প্ৰাক্তন জ্যেষ্ঠ চালক স্মিত মচ্ছৰৰ নাম বিভিন্ন সংবাদমাধ্যমত প্ৰকাশ পাইছে। প্ৰকাশিত পেছাগত তথ্য অনুসৰি, মচ্ছাৰে প্ৰায় ১১ বছৰ স্পাইচজেটত সেৱা আগবঢ়াইছিল। তেওঁ জ্যেষ্ঠ বিমানচালকৰ দায়িত্ব পালন কৰাৰ লগতে ২০২০ চনৰ নৱেম্বৰৰ পৰা ‘লাইন প্ৰশিক্ষণ কেপ্টেইন’ হিচাপেও কাম কৰিছিল -- অৰ্থাৎ আন বিমানচালকক প্ৰশিক্ষণ আৰু মূল্যায়নৰ দায়িত্বতো জড়িত আছিল। ২০২২ চনৰ জুন মাহত তেওঁ ফ্লাইডুবাইত অভিজ্ঞ চালক হিচাপে পোনপটীয়াকৈ নিযুক্তি লাভ কৰে আৰু বোয়িং ৭৩৭ শ্ৰেণীৰ বিমানৰ মুখ্য চালক হিচাপে দায়িত্ব পালন কৰি আহিছিল। তেওঁৰ প্ৰকাশিত পেছাগত বিৱৰণত বোয়িং ৭৩৭-৮০০ আৰু ৭৩৭ মেক্স ৮/৯ বিমানত প্ৰায় ৯,৭৫০ ঘণ্টাৰ উৰণ অভিজ্ঞতা থকাৰ কথা উল্লেখ আছে; ইয়াৰে ৬,৪০০ ঘণ্টাতকৈ অধিক সময় মুখ্য চালক হিচাপে উৰণ কৰাৰ তথ্য পোৱা যায়।
ঘটনাৰ সময়ত মচ্ছাৰ নিজেও আহত হোৱা বুলি প্ৰকাশ পাইছে। ইজৰাইলী আৰু ভাৰতীয় সংবাদমাধ্যমৰ উদ্ধৃত তথ্য অনুসৰি, সহকাৰী চালকৰ সৈতে সংঘাতৰ মাজতো তেওঁ বিমানখনৰ নিয়ন্ত্ৰণ পুনৰ লাভ কৰাত ভূমিকা লৈছিল আৰু পিছত বিমানখন ছৌদি আৰৱৰ তাবুক বিমানবন্দৰত জৰুৰীভাৱে অৱতৰণ কৰা হয়।
ইফালে, ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে ঘটনাটোৰ বিষয়ে প্ৰকাশ কৰা তথ্যই বিষয়টোক অধিক গুৰুতৰ ৰূপ দিছে। তেওঁৰ মতে, বিমানখনৰ সহকাৰী চালকে মুখ্য চালকক ছুৰিকাঘাত কৰাৰ লগতে বিমানখন দুৰ্ঘটনাগ্ৰস্ত কৰাৰ চেষ্টা কৰিছিল। তেওঁৰ বক্তব্য অনুসৰি, বিমানখন ভয়ংকৰভাৱে তললৈ নামিবলৈ ধৰাৰ পাছত যাত্ৰী আৰু আন কৰ্মচাৰীয়ে চালকৰ কক্ষত প্ৰৱেশ কৰি পৰিস্থিতি নিয়ন্ত্ৰণ কৰাত সহায় কৰে। পিছত বিমানখনত যাত্ৰী হিচাপে ভ্ৰমণ কৰি থকা আন চালকে বিমানখনৰ নিয়ন্ত্ৰণ গ্ৰহণ কৰি তাবুকত অৱতৰণ কৰায়।
ডুবাইৰ পৰা টেল আভিভলৈ যোৱা এই বিমানখনত প্ৰায় ১৮০জন যাত্ৰী আছিল বুলি বিভিন্ন প্ৰতিবেদনত প্ৰকাশ পাইছে। ইয়াৰে অধিকাংশই ইজৰাইলী নাগৰিক আছিল; কিছুমান প্ৰতিবেদনত প্ৰায় ১৫০জন ইজৰাইলী যাত্ৰী থকাৰ কথা উল্লেখ কৰা হৈছে। বিমানখনত যাত্ৰা কৰা দুজন অফ-ডিউটি বিমানচালকেও ঘটনাৰ সময়ত গুৰুত্বপূৰ্ণ ভূমিকা লোৱা বুলি যাত্ৰীসকলৰ উদ্ধৃতিৰে প্ৰকাশ পাইছে। তেওঁলোকে কেবিন কৰ্মচাৰী আৰু কেইজনমান যাত্ৰীৰ সহায়ত চালকৰ কক্ষত প্ৰৱেশ কৰি পৰিস্থিতি নিয়ন্ত্ৰণ কৰাত সহায় কৰে আৰু পিছত বিমানখন সুৰক্ষিতভাৱে অৱতৰণ কৰোৱাত ভূমিকা লয় বুলি প্ৰতিবেদনসমূহত কোৱা হৈছে। বিমানখনৰ অধিকাংশ যাত্ৰী অক্ষত অৱস্থাত থাকে যদিও ঘটনাটোৰ সময়ত সৃষ্টি হোৱা আতংক আৰু বিমানখনৰ আকস্মিক অৱনমনে যাত্ৰীসকলৰ মাজত তীব্ৰ ভয়ৰ সৃষ্টি কৰিছিল।
কিন্তু এই দাবীসমূহৰ সকলো দিশ এতিয়াও স্বতন্ত্ৰ তদন্তৰ জৰিয়তে নিশ্চিত হোৱা নাই। ফ্লাইডুবাইয়ে ঘটনাটোক বিমানৰ চালকৰ কক্ষত সংঘটিত এক ‘সংঘাত’ বুলি বৰ্ণনা কৰিছে আৰু কৈছে যে দায়িত্বত থকা আন কৰ্মচাৰীসকলে বিমানখন নিয়ন্ত্ৰণলৈ আনি নিৰাপদে তাবুকত অৱতৰণ কৰায়। বিমান সংস্থাটোৱে সকলো যাত্ৰী আৰু কৰ্মচাৰী সুৰক্ষিত বুলি জনোৱাৰ লগতে সংশ্লিষ্ট কৰ্তৃপক্ষৰ সৈতে তদন্তত সহযোগিতা কৰাৰ কথা প্ৰকাশ কৰিছে।
ঘটনাটোৰ সময়ত বিমানখনে আন্তঃৰাষ্ট্ৰীয় জৰুৰী সংকেত প্ৰেৰণ কৰিছিল। ইয়াৰে এটা সাধাৰণ জৰুৰী অৱস্থাৰ সংকেত আছিল, আনহাতে আন এটা সংকেত সম্ভাব্য বেআইনী হস্তক্ষেপ বা বিমান অপহৰণৰ আশংকাৰ সৈতে জড়িত। ইয়াৰ ফলত বিমানখনৰ গতিবিধি আৰু সুৰক্ষা ব্যৱস্থাক লৈ সংশ্লিষ্ট দেশসমূহৰ কৰ্তৃপক্ষৰ মাজত তৎপৰতা বৃদ্ধি পায়।
ঘটনাটোক লৈ ইজৰাইলী কৰ্তৃপক্ষই সম্ভাব্য সন্ত্ৰাসবাদী উদ্দেশ্যৰ দিশটোও পৰীক্ষা কৰি আছে। কিন্তু তদন্ত সম্পূৰ্ণ নোহোৱালৈকে ইয়াক নিশ্চিত সন্ত্ৰাসবাদী আক্ৰমণ বুলি অভিহিত কৰাটো আগতীয়াকৈ সিদ্ধান্তত উপনীত হোৱা হ’ব। বৰ্তমান নিশ্চিত তথ্য এয়াই যে বিমানখনত গুৰুতৰ এক ঘটনা সংঘটিত হৈছিল, বিমানখনে জৰুৰী অৱতৰণ কৰিবলগীয়া হৈছিল আৰু সকলো যাত্ৰী জীৱিত অৱস্থাত নিৰাপদে বিমানৰ পৰা নামিবলৈ সক্ষম হৈছিল।
এই ঘটনাই আকাশমাৰ্গত বিমানৰ চালকৰ কক্ষৰ সুৰক্ষা, জৰুৰী পৰিস্থিতিত বিমান নিয়ন্ত্ৰণৰ ব্যৱস্থা আৰু বিমানৰ ভিতৰত সংঘটিত হিংসাত্মক ঘটনাৰ মোকাবিলাৰ প্ৰস্তুতি সম্পৰ্কে গুৰুত্বপূৰ্ণ প্ৰশ্ন উত্থাপন কৰিছে। তদন্ত আগবঢ়াৰ লগে লগে ঘটনাটোৰ সম্পূৰ্ণ ছবি অধিক স্পষ্ট হোৱাৰ সম্ভাৱনা আছে।
