নিউয়ৰ্ক
ৰাষ্ট্ৰসংঘৰ সাধাৰণ পৰিষদত (UNGA) দীঘলীয়া ভাষণৰ পিছত ফ্ৰান্সৰ ৰাষ্ট্ৰপতি ইমানুৱেল মেক্ৰনে দিনটোৰ বাবে অৱসৰ ল’বলৈ দূতাবাসলৈ উভতি গৈছিল। কিন্তু আমেৰিকাৰ ৰাষ্ট্ৰপতি ড’নাল্ড ট্ৰাম্পৰ কনভয় পাৰ হ’বলৈ দিবলৈ নিউয়ৰ্ক আৰক্ষীয়ে তেওঁক ৰখাই দিয়ে।
ইয়াৰ ফলত মেক্ৰন নিউয়ৰ্কৰ ৰাজপথত আবদ্ধ হৈ পৰে কাৰণ ট্ৰাম্পৰ গতিপথৰ বাবে সকলো পথ বন্ধ হৈ পৰিছিল। তাৰ পিছত মেক্ৰনে গাড়ীৰ পৰা নামি আৰক্ষীৰ কাষ চাপিল আৰু পথ বন্ধৰ বিষয়ে সোধা-পোছা কৰিলে। ছ’চিয়েল মিডিয়াত ভাইৰেল হৈছে এই ঘটনাৰ এটা ভিডিঅ’।
এজন আৰক্ষী বিষয়াই মেক্ৰনক কোৱা শুনা যায় যে, "মই দুঃখিত ৰাষ্ট্ৰপতি মহোদয়। এতিয়া সকলো বন্ধ কৰা হৈছে।"
আৰক্ষীয়ে তেওঁক ট্ৰাম্পৰ কনভ পাৰ হ’বৰ হৈছে বুলি কোৱাৰ লগে লগে মেক্ৰনে ৰাস্তাত থিয় হৈ আমেৰিকাৰ ৰাষ্ট্ৰপতিক লঘুভাৱে ফোন কৰা দেখা গ’ল।
বেৰিকেডৰ ওচৰত থিয় হৈ নিউয়ৰ্কৰ ভিৰ চাই মেক্ৰনে হাস্যৰসেৰে ট্ৰাম্পক বাট মুকলি কৰিবলৈ ক’লে। মেক্ৰনে ট্ৰাম্পক কোৱা শুনা যায় যে, "আপুনি কেনে আছে? অনুমান কৰক কি হ'ল? মই ৰাস্তাত ৰৈ আছো কাৰণ আপোনাৰ বাবে সকলো বন্ধ হৈ আছে।"
কিন্তু তেতিয়ালৈকে ট্ৰাম্পৰ কনভয় পাৰ হৈ গৈছিল, আৰু পথটো কেৱল পথচাৰীৰ বাবে মুকলি কৰি দিয়া হৈছিল।
ট্ৰাম্পৰ সৈতে ফোনত কথা পাতি পাতি ফ্ৰান্সৰ ৰাষ্ট্ৰপতিগৰাকীয়ে নিজৰ গাড়ী এৰিথৈ খোজকাঢ়ি যাত্ৰা অব্যাহত ৰাখিলে। নিউয়ৰ্কৰ লোকসকলৰ বাবে সেয়া আছিল এক বিৰল দৃশ্য – সাধাৰণতে এজন ৰাষ্ট্ৰপতিৰ লগৰ পৰিৱেশ আৰু নিৰাপত্তা নোহোৱাকৈ ফ্ৰান্সৰ ৰাষ্ট্ৰপতিক ৰাজপথত দেখা।
বাটত মেক্ৰনে নাগৰিকৰ সৈতে চেলফি আৰু ফটোৰ বাবেও ৰৈছিল। আনকি এজন ব্যক্তিয়ে ফ্ৰান্সৰ ৰাষ্ট্ৰপতিৰ কপালত চুমা খাই থকা দেখা যায় ভিডিঅ’টোত।
ইয়াৰ পূৰ্বে মেক্ৰনে UNGAত ঘোষণা কৰিছিল যে ফ্ৰান্সে পেলেষ্টাইনক আনুষ্ঠানিকভাৱে ৰাষ্ট্ৰ হিচাপে স্বীকৃতি দিছে। তেওঁ ইজৰাইল আৰু পেলেষ্টাইনীসকলৰ মাজত দশক দশক ধৰি চলি অহা সংঘাতৰ দুখন ৰাষ্ট্ৰৰ সমাধানৰ ধাৰণাটো পুনৰুজ্জীৱিত কৰিবলৈ আহ্বান জনাইছিল।
মেক্ৰনে কয় যে “শান্তিৰ সময় আহি পৰিছে” আৰু “গাজাত চলি থকা যুদ্ধক একোৱেই ন্যায্যতা প্ৰদান নকৰে”। অষ্ট্ৰেলিয়া, ব্ৰিটেইন, কানাডা আৰু পৰ্তুগালৰ পিছতে এই পদক্ষেপ ল’বলৈ দেশৰ ঢৌত যোগদান কৰিছে ফ্ৰান্সে।
