আৱাজ-দ্য ভইচ ব্যুৰ'
আব্দেলফত্তা মেহদীয়ে কয় যে, ২০১৭ চনত তেওঁৰ ভাতৃ তালাল আব্দো মেহদীক হত্যা কৰাৰ অভিযোগত অভিযুক্ত নিমিছা প্ৰিয়াক উচিত শাস্তি দিব লাগে। হত্যাৰ দৰে ঘৃণনীয় অপৰাধৰ বাবে কোনোপধ্যেই ক্ষমা কৰা উচিত নহয়। তেওঁ লগতে কয় যে, হত্যাকাৰী নিমিছা প্রিয়াক ফাঁচী দিব লাগে।
ভাৰতীয় সংবাদ মাধ্যমে অভিযুক্ত নাৰ্ছ নিমিছা প্ৰিয়াক তেওঁৰ অপৰাধ প্ৰচাৰ কৰাৰ পৰিৱৰ্তে ভুক্তভোগী হিচাপে চিত্ৰিত কৰাৰ প্ৰচেষ্টাকলৈ আব্দেলফত্তাহে তেওঁৰ পৰিয়ালটোৰ হৈ তীব্ৰ অসন্তুষ্টি প্ৰকাশ কৰে।
ঘটনাক্রমে, নিমিছা প্ৰিয়াক বুধবাৰে ফাঁচী দিয়া হ'ব লাগিছিল, কিন্তু দীঘলীয়া আলোচনাৰ পাছত তেওঁৰ ফাঁচী স্থগিত ৰখা হৈছে।
একাধিক প্ৰচেষ্টাৰ বাবেই নিমিছা প্ৰিয়াৰ ফাঁচী স্থগিত ৰখা হয়। ইয়াৰ ভিতৰত আছিল ভাৰত চৰকাৰৰ সম্পূৰ্ণ সমৰ্থন, চৌদি আৰৱৰ বিভিন্ন সংস্থাৰ সহায় আৰু কান্থাপুৰম এ পি আবুবাকাৰ মুছলিয়াৰৰ ধৰ্মীয় হস্তক্ষেপ। খবৰ অনুসৰি তেওঁ মধ্যস্থতাত সহায় কৰিবলৈ য়েমেনৰ শ্বুৰা কাউন্সিলৰ এজন বন্ধুৰ সৈতে যোগাযোগ কৰিছিল। একেলগে এই প্ৰচেষ্টাসমূহৰ ফলত পৰৱৰ্তী নিৰ্দেশ নোহোৱালৈকে ফাঁচীৰ সময়সীমা পিছুৱাই দিয়াৰ সিদ্ধান্ত লোৱা হৈছিল।
প্ৰতিনিধিত্বমূলক ছবি
বুধবাৰে পুৱা ৰাজ্যিক চিপিআই-এমৰ সম্পাদক এম ভি গোবিন্দনে মুছলিয়াৰক সাক্ষাৎ কৰে আৰু এই বিষয়সমূহৰ ওপৰত আলোচনা কৰে।
"মুছলিয়াৰে মোক কয় যে ইতিমধ্যে ফাঁচী স্থগিত ৰখা হৈছে আৰু গোচৰ সন্দৰ্ভত আন কিছুমান দিশ আছে, যিবোৰৰ বিষয়ে আলোচনা কৰা হৈছে।" গোবিন্দনে কয় যে য়েমেনৰ কৰ্তৃপক্ষৰ আৰু লগতে ক্ষমা দিবলগীয়া পৰিয়ালটোৰ সৈতেও লোকসকলে আলোচনাত মিলিত হৈছে।
ইফালে নিমিছাৰ বাবে আটাইতকৈ ডাঙৰ সকাহ পোৱা গৈছে যে পৰৱৰ্তী নিৰ্দেশ নোহোৱালৈকে ফাঁচী স্থগিত ৰখা হৈছে।
নিমিছা প্ৰিয়াক ক্ষমা কৰাৰ চাবিকাঠি ভুক্তভোগীৰ পৰিয়ালৰ হাতত আছে যদিও পৰিয়ালৰ ভিতৰত ভিন্ন মত বিনিময়ত পৰিস্থিতি জটিল হৈ পৰিছে। আলোচনাৰ লগত জড়িত ধৰ্মগুৰু আৰু বিষয়াসকলে সমস্যা সমাধানৰ লগতে নিমিছাৰ বাবে ক্ষমা নিশ্চিত কৰাৰ বাবে কাম কৰি আছে।
এতিয়া মূল প্ৰত্যাহ্বানটো হ’ল ভুক্তভোগীৰ পৰিয়ালক পৰিস্থিতি বুজিবলৈ আৰু এটা সমাধানত উপনীত হোৱাত সহায় কৰা। পৰিয়ালটোৱে বুজাবুজি কৰিলে ক্ষতিপূৰণ দিয়া হ'ব যাৰ ফলত সম্ভাৱনাময়ভাৱে নিমিছাৰ ক্ষমাৰ পথ মুকলি হ'ব।
আলোচনাৰ পৰৱৰ্তী অংশত নিমিছা প্ৰিয়াৰ বাবে ক্ষমাৰ বিনিময়ত ভুক্তভোগীৰ পৰিয়ালক দিয়া ক্ষতিপূৰণৰ ওপৰত গুৰুত্ব আৰোপ কৰা হ'ব।
"ব্লাড মানি" ক্ষমাৰ বিনিময়ত ভুক্তভোগীৰ পৰিয়ালক দিয়া আৰ্থিক ক্ষতিপূৰণক বুজায়। যিটো শ্বৰীয়ত আইন অনুসৰি অনুমোদিত।
কেৰেলাৰ কোটিপতি এম এ ইউছুফ আলীয়ে নিমিছা প্ৰিয়াৰ মুক্তি নিশ্চিত কৰাত সহায় কৰিবলৈ “ব্লাড মানি”কে ধৰি আৰ্থিক সহায় আগবঢ়াবলৈ সাজু হৈছে।
নিমিছা প্ৰিয়াক বচাবলৈ ভাৰত চৰকাৰে কৰা প্ৰচেষ্টা সচাকৈ গুৰুত্বপূৰ্ণ। সকলোৰে দৃষ্টি এতিয়া আলোচনাৰ ওপৰতে আছে।
বৰ্তমান নিমিছা প্ৰিয়া য়েমেনৰ এখন কাৰাগাৰত আছে, ২০১৭ চনত তেওঁৰ প্ৰাক্তন ব্যৱসায়িক অংশীদাৰ মেহদীক হত্যা কৰাৰ অভিযোগত অভিযুক্ত নিমিছা।
য়েমেনত ফাঁচীৰ সন্মুখীন হোৱা কেৰালাৰ নাৰ্ছ নিমিছা প্ৰিয়াৰ গোচৰত জৰুৰী হস্তক্ষেপৰ বাবে কেৰালাৰ ৰাজনীতিবিদসকলে কেন্দ্ৰীয় চৰকাৰ আৰু ৰাষ্ট্ৰপতিৰ ওচৰত আবেদন জনাইছে।
কেৰালাৰ নাৰ্ছ নিমিছা প্ৰিয়াই ২০০৮ চনত পৰিয়াল পোহপাল দিবলৈ য়েমেনলৈ গৈছিল। প্ৰথমতে নাৰ্ছ হিচাপে কাম কৰিছিল আৰু পিছত নিজাকৈ ক্লিনিক খুলিছিল।
অভিযোগ অনুসৰি ২০১৭ চনত নিমিছা প্ৰিয়াই নিজৰ ব্যৱসায়িক সহযোগী মেহদীক জব্দ কৰা পাছপ’ৰ্ট উদ্ধাৰৰ বাবে চেডেটিভ ঔষধ দিছিল আৰু তেওঁৰ মৃত্যু হৈছিল। পিছলৈ এই চেডেটিভ ঔষধ মাৰাত্মক বুলি প্ৰমাণিত হৈছিল।
য়েমেনৰ পৰা পলায়ন কৰিব বিচৰাৰ সময়তে নিমিছা প্ৰিয়াক গ্ৰেপ্তাৰ কৰা হৈছিল আৰু ২০১৮ চনত হত্যাৰ গোচৰত দোষী সাব্যস্ত হৈছিল। হত্যাৰ দোষত মৃত্যুদণ্ডৰ সন্মুখীন হৈছিল।
২০২০ চনত মৃত্যুদণ্ডৰ শাস্তি প্ৰদান কৰা হৈছিল আৰু ২০২৩ চনৰ নৱেম্বৰ মাহত য়েমেনৰ উচ্চতম ন্যায়িক পৰিষদে সমৰ্থন কৰিছিল।
আদালতে ভুক্তভোগীৰ পৰিয়ালক "ব্লাড মানি"ৰ ক্ষতিপূৰণৰ জৰিয়তে সম্ভাৱ্য ক্ষমাৰ অনুমতি দিছিল, যাৰ ফলত নিমিছা প্ৰিয়াৰ শাস্তি ক্ষমা হোৱাৰ সম্ভাৱনা আছে।
উল্লেখযোগ্য যে, শেহতীয়া পৰ্যায়ৰ আলোচনাৰ পিছতে ভাৰতৰ এজন শক্তিশালী চুন্নী মুছলমান ধৰ্মগুৰু গ্ৰেণ্ড মুফতি কান্থাপুৰম এ পি আবুবকাৰ মুছলিয়াৰয়ে য়েমেনৰ এজন বিখ্যাত চুফী পণ্ডিত শ্বেইখ হাবিব ওমৰৰ সৈতে যোগাযোগ কৰিছে।
ভাৰত আৰু য়েমেনৰ চুফী নেতাৰ কূটনৈতিক প্ৰচেষ্টা আৰু হস্তক্ষেপৰ বাবে নিমিছাৰ ফাঁচী স্থগিত ৰখা হৈছে। তেওঁৰ জীৱন ৰক্ষাৰ বাবে জৰুৰী কূটনৈতিক পদক্ষেপ লোৱাৰ বাবে আবেদন দাখিল কৰাৰ পিছতে এই স্থগিত ৰখা হৈছে।
গ্ৰেণ্ড মুফতি কান্থাপুৰম এ পি আবুবকাৰ মুছলিয়াৰয়ে কয় যে ভাৰতীয় নাগৰিকে যেতিয়া বিদেশত ফাঁচীৰ বাবে অপেক্ষা কৰি থাকে তেতিয়া মানৱীয় সমাধান বিচৰাটো আমাৰ ৰাষ্ট্ৰীয় দায়িত্ব।
