আৱাজ - দ্য ভইচ ব্যুৰ’
চৌদি আৰৱে মক্কাৰ ৰিয়েল ইষ্টেট বজাৰখন বিদেশী বিনিয়োগকাৰীৰ বাবে মুকলি কৰি দিছে। ব্লুমবাৰ্গৰ এক প্ৰতিবেদন অনুসৰি, মূলধন আকৰ্ষণ কৰা আৰু তেলৰ ওপৰত নিৰ্ভৰশীল অৰ্থনীতিৰ বৈচিত্ৰ্যকৰণৰ বাবে গ্ৰহণ কৰা এক ব্যাপক কৌশলৰ অংশ হিচাপে এই পদক্ষেপ লোৱা হৈছে।
চৌদি আৰৱৰ ‘ভিজন ২০৩০’ সংস্কাৰ কাৰ্যসূচীৰ অধীনত ২০৩০ চনৰ ভিতৰত বাৰ্ষিক ১০০ বিলিয়ন মাৰ্কিন ডলাৰৰ পোনপটীয়া বিদেশী বিনিয়োগ (FDI) লাভ কৰাৰ লক্ষ্য ৰখা হৈছে। ২০২৫ চনত কৰ্তৃপক্ষই বিদেশী কোম্পানীসমূহক মক্কাত কৰ্মৰত ডেভেলপাৰ প্ৰতিষ্ঠানসমূহত বিনিয়োগ কৰাৰ অনুমতি প্ৰদান কৰে। একে সময়তে বিদেশী মুছলমানসকলকো এই পৱিত্ৰ চহৰখনত সম্পত্তি ক্ৰয় কৰাৰ এটা পথ মুকলি কৰি দিয়া হয়।
প্ৰতিনিধিত্বমুলক ফটো
এই পদক্ষেপে স্থিৰ আৰু দীৰ্ঘম্যাদী লাভ প্ৰদান কৰিব পৰা খণ্ডসমূহত অধিক গুৰুত্ব আৰোপ কৰাৰ ইংগিত দিয়ে। ধৰ্মীয় পৰ্যটনক এই কৌশলৰ কেন্দ্ৰবিন্দু হিচাপে গণ্য কৰা হৈছে। প্ৰতি বছৰে লাখ লাখ মুছলমান লোকে হজ আৰু উমৰাহ পালনৰ বাবে মক্কালৈ যাত্ৰা কৰে, যাৰ ফলত থকা-মেলা আৰু অন্যান্য সেৱাৰ বাবে এক নিৰন্তৰ চাহিদাৰ সৃষ্টি হয়।
চৌদি আৰৱে শেহতীয়া বছৰবোৰত বছৰজুৰি চলিব পৰা উমৰা ভিছাও সম্প্ৰসাৰণ কৰিছে। ইয়াৰ ফলত পৰম্পৰাগত হজৰ বতৰৰ বাহিৰেও দৰ্শনাৰ্থীৰ আগমন অব্যাহত ৰখাত সহায় হৈছে আৰু আতিথ্য তথা সম্পত্তি খণ্ডৰ বিনিয়োগকাৰীসকলৰ মাজত আত্মবিশ্বাস বৃদ্ধি পাইছে।
ব্লুমবাৰ্গৰ মতে, গৱেষণা প্ৰতিষ্ঠান MEED-ৰ অনুমান অনুসৰি মক্কাত প্ৰায় ৬০ বিলিয়ন ডলাৰ মূল্যৰ প্ৰকল্পৰ পৰিকল্পনা কৰা হৈছে বা নিৰ্মাণ কাৰ্য চলি আছে। ইয়াৰ ভিতৰত আছে আৱাসিক টাৱাৰ, হোটেল, শ্বপিং চেণ্টাৰ আৰু দৰ্শনাৰ্থীৰ বৰ্ধিত সংখ্যা ব্যৱস্থাপনা কৰিব পৰাকৈ বৃহৎ আন্তঃগাঁথনি।
চাহিদা বৃদ্ধি পোৱাৰ লগে লগে গ্ৰেণ্ড মছজিদৰ ওচৰৰ মাটিৰ দাম বিশ্বৰ ভিতৰতে সৰ্বোচ্চ পৰ্যায়ত উপনীত হৈছে। সম্পত্তিৰ দালাৰসকলৰ মতে, কিছুমান নিৰ্দিষ্ট মাটিৰ প্লটৰ দাম প্ৰতি বৰ্গমিটাৰত প্ৰায় ৮৭,০০০ মাৰ্কিন ডলাৰ পৰ্যন্ত হৈছে।
প্ৰতিনিধিত্বমুলক ফটো
এই পৰিৱৰ্তনে উন্নয়নৰ অগ্ৰাধিকাৰৰ এক ব্যাপক পুনৰ নিৰ্ধাৰণকো প্ৰতিফলিত কৰিছে। যদিও ‘নিঅ’ম’ (NEOM) ৰ দৰে বৃহৎ প্ৰকল্পসমূহ দীৰ্ঘম্যাদী পৰিকল্পনাৰ অংশ হৈ আছে, চৌদি আৰৱে দ্ৰুত অৰ্থনৈতিক লাভালাভৰ বাবে পৰ্যটন, বিত্ত আৰু প্ৰযুক্তিৰ ওপৰত অধিক গুৰুত্ব আৰোপ কৰিছে।
অৱশ্যে, এই পৱিত্ৰ চহৰখনৰ দ্ৰুত পৰিৱৰ্তনে পণ্ডিত আৰু তীৰ্থযাত্ৰীসকলৰ মাজত বিতৰ্কৰো সৃষ্টি কৰিছে। ক্ৰমান্বয়ে বাঢ়ি অহা খৰচ, অতিৰিক্ত ভিৰ আৰু ঐতিহাসিক চুবুৰীবোৰ হেৰাই যোৱাৰ আশংকাই বহুতক চিন্তিত কৰি তুলিছে। একাংশ দৰ্শনাৰ্থীয়ে কয় যে জনসংখ্যা বৃদ্ধিৰ ফলত ধৰ্মীয় ৰীতি-নীতি পালন কৰাটো প্ৰত্যাহ্বানজনক হৈ পৰিছে, বিশেষকৈ বৃদ্ধ উপাসকসকলৰ বাবে।
ছৌদি প্ৰশাসনে কয় যে দৰ্শনাৰ্থীৰ সংখ্যা বৃদ্ধি পোৱাৰ লগে লগে আন্তঃগাঁথনি, নিৰাপত্তা আৰু সেৱাৰ মান উন্নত কৰিবলৈ এই সম্প্ৰসাৰণ আৱশ্যকীয়। কম সম্পদশালী দেশৰ তীৰ্থযাত্ৰীসকলক সহায় কৰিবলৈ লোৱা কাৰ্যসূচীসমূহো শক্তিশালী কৰা হৈছে। উম্ম আল কুৰা ফৰ ডেভেলপমেণ্ট এণ্ড কনষ্ট্ৰাকচন (Umm Al Qura for Development and Construction)-ৰ মুখ্য কাৰ্যবাহী বিষয়া ইয়াছিৰ আবু আতিকে ব্লুমবাৰ্গক কয় যে, “বিনিয়োগ জগতৰ প্ৰভাৱশালী ব্যক্তিসকলৰ দৃষ্টি এতিয়া মক্কাৰ ওপৰত নিৱদ্ধ হৈছে।”
যিহেতু মক্কা চহৰখন ধৰ্মীয় পৰ্যটন আৰু বিনিয়োগৰ এক প্ৰধান গোলকীয় কেন্দ্ৰলৈ বিকশিত হৈছে, গতিকে বাণিজ্যিক উন্নয়ন আৰু মক্কাৰ আধ্যাত্মিক তথা সাংস্কৃতিক চৰিত্ৰ ৰক্ষা কৰাৰ মাজত ভাৰসাম্য বজাই ৰখাটো অত্যন্ত গুৰুত্বপূৰ্ণ।
.webp)
