নতুন দিল্লী
এমাহজোৰা নিস্তব্ধতাৰ অন্তত মধ্যপ্ৰাচ্যত পুনৰ যুদ্ধৰ সূচনা হৈছে।ইৰানৰ ভিতৰত ইছলামিক ৰিভল্যুচনেৰী গাৰ্ড কৰ্পছৰ লক্ষ্যস্থানত একেৰাহে দ্বিতীয় দিনাও আক্ৰমণ কৰে আমেৰিকাই। ইয়াৰ প্ৰত্যুত্তৰত ইৰানে জৰ্ডানৰ প্ৰিন্স হাছান এয়াৰবেছ আৰু তাত অৱস্থিত আমেৰিকাৰ মেৰিন বেছক বেলিষ্টিক মিছাইলেৰে লক্ষ্য কৰি লয়।
ইৰানে এক বিবৃতি জাৰি কৰি কয় যে তেওঁলোকে এক ‘নিৰ্ণায়ক’ প্ৰত্যাক্ৰমণ চলাইছে, য’ত জৰ্ডানত থকা আমেৰিকান সামৰিক ঘাটিত মিছাইল নিক্ষেপ কৰা হৈছে। এই আক্ৰমণ দেশখনৰ ওপৰত আমেৰিকাৰ সামৰিক আক্ৰমণৰ ধাৰাবাহিক প্ৰক্ৰিয়াৰ উত্তৰত কৰা হৈছে, যিটো এতিয়াও অব্যাহত আছে। ৰিপোৰ্ট অনুসৰি, ইৰানে জৰ্ডানৰ আকাবাত থকা আমেৰিকান সামৰিক ঘাটিলৈ মিছাইল নিক্ষেপ কৰিছে। আমেৰিকান সৈন্যৰ ওপৰত আক্ৰমণৰ পাছত আমেৰিকাই ইৰানত থকা IRGC-ৰ ঘাটিবোৰত আক্ৰমণ চলাইছে। মঙলবাৰে দিনৰ ভাগত এই আক্ৰমণসমূহ সংঘটিত হয়, যাৰ ফলত অঞ্চলটোত উত্তেজনা বৃদ্ধি পাইছে। খবৰ অনুসৰি, IRGC-য়ে অলপতে হৰমুজ প্ৰণালীত (Strait of Hormuz) ব্যৱসায়িক জাহাজ আৰু অঞ্চলটোত মোতায়েন থকা আমেৰিকান সৈন্যৰ ওপৰত আক্ৰমণৰ চেষ্টা চলাইছিল। ইয়াৰ প্ৰত্যুত্তৰত আমেৰিকাই ইৰানৰ সামৰিক মুখ্য কার্যালয়ক লক্ষ্য কৰি লৈছে।
ইৰানৰ চৰকাৰী টিভি চেনেল ‘প্ৰেছ টিভি’ৰ মতে, ইৰানী মিছাইল আৰু ড্ৰোন শত্ৰুৰ ঘাটিৰ দিশে নিক্ষেপ কৰা হৈছিল। জৰ্ডানৰ উপৰিও বাহৰেইনত থকা আমেৰিকান সামৰিক ঘাটিসমূহকো লক্ষ্য কৰি লোৱা হৈছিল। IRGC-ৰ মুখপাত্ৰ ব্ৰিগেডিয়াৰ জেনেৰেল হুছেইন মহেব্বীয়ে দাবী কৰে যে ইৰানৰ এয়াৰ ডিফেন্স চিষ্টেমে মাৰ্কাজী প্ৰদেশৰ খোমেনৰ ওপৰত আমেৰিকান সেনাবাহিনীৰ এটা ড্ৰোন ধ্বংস কৰিছে। তেওঁ কয় যে ইৰানে নিজৰ শত্ৰুক এনে এক কঠোৰ শাস্তি দিব যে শত্ৰুৱে এই নতুন আক্ৰমণৰ বাবে অনুশোচনা কৰিবলগীয়া হ’ব।
উল্লেখযোগ্য যে, ইৰানৰ সশস্ত্ৰ বাহিনীৰ জেনেৰেল ষ্টাফ আৰু খাতাম অল-আনবিয়া চেণ্ট্ৰেল হেডকোৱাৰ্টাৰে আমেৰিকাক কাপুৰুষ আৰু দুষ্ট বুলি আখ্যা দি তাৰ ওপৰত বিধ্বংসী আৰু প্ৰচণ্ড আঘাত হানাৰ শপত লয়। প্ৰেছ টিভিৰ মতে, IRGC-য়ে তেওঁলোকৰ বিবৃতিত কয় যে আমি আমাৰ স্থিতিত অটল আৰু কোনো পৰিস্থিতিতে বীৰ ইৰানী জাতিৰ অধিকাৰৰ পৰা আঁতৰি নাহোঁ আৰু আমেৰিকান শত্ৰুৰ পৰা গধুৰ মূল্য উচুল কৰিম।
আনফালে, আমেৰিকাৰ ৰাষ্ট্ৰপতি ড’নাল্ড ট্ৰাম্পে মঙলবাৰে ঘোষণা কৰে যে ৱাশ্বিংটনে হৰমুজ প্ৰণালীৰ ওচৰত থকা ইৰানী ঘাটিবোৰত নতুনকৈ বিমান আক্ৰমণ আৰম্ভ কৰিছে। ট্ৰাম্পে দাবী কৰে যে ইৰানে হৰমুজ প্ৰণালীত সাগৰীয় মাইন (barricade mines) বহুৱাৰ বিফল চেষ্টা কৰাৰ উত্তৰত এই আক্ৰমণ কৰা হৈছে।
ট্ৰাম্পে ছ’চিয়েল মিডিয়া প্লেটফৰ্ম ‘ট্ৰুথ ছ’চিয়েল’ত পোষ্ট কৰি লিখে, ‘যুক্তৰাষ্ট্ৰই এই মুহূৰ্তত হৰমুজ প্ৰণালীৰ ওচৰৰ ইৰানী ঘাটিত আক্ৰমণ চলাই আছে। এই আক্ৰমণ অত্যন্ত ভয়াবহ আৰু শক্তিশালী। ইৰানে উপসাগৰত সাগৰীয় মাইন বহুৱাৰ বিফল চেষ্টা আৰু জৰ্ডানত আমাৰ সামৰিক ঘাটিত ইৰানে নিক্ষেপ কৰা ৮ টা মিছাইলৰ উত্তৰত এই পদক্ষেপ লোৱা হৈছে। সেই সকলোবোৰ মিছাইল সফলতাৰে আকাশতে ধ্বংস কৰা হৈছে।’
ট্ৰাম্পে সকিয়নি দিয়ে যে ইৰানে যদি প্ৰতিশোধৰ নামত আকৌ আক্ৰমণ চলায়, তেন্তে ৱাশ্বিংটনৰ ফালৰ পৰা ইয়াতকৈও অধিক কঠোৰ ব্যৱস্থা গ্ৰহণ কৰা হ’ব। তেহৰানত আৰু ডাঙৰ আক্ৰমণৰ ইংগিত দি তেওঁ কয় যে যদি তেহৰানে পুনৰ আক্ৰমণৰ দুঃসাহস কৰে, তেন্তে তেওঁলোকৰ ওপৰত তাতকৈ অধিক তীব্ৰ আক্ৰমণ হ’ব। অৱশ্যে, এইটো তেওঁলোকৰ আটাইতকৈ ডাঙৰ আক্ৰমণ নহয়। সেয়া এতিয়াও বাকী আছে আৰু যেতিয়া সেয়া শেষ হ’ব, তেতিয়া ইছলামিক ৰিপাব্লিক অৱ ইৰানৰ অস্তিত্বই নাইকিয়া হ’ব!
দুয়োখন দেশৰ মাজত আক্ৰমণ-প্ৰত্যাক্ৰমণৰ ফলত পশ্চিম এছিয়াত পৰিস্থিতি পুনৰ অতি সংবেদনশীল আৰু উদ্বেগজনক হৈ পৰিছে। আমেৰিকাৰ অবৰোধৰ বাবে ইৰানৰ বৈদেশিক বাণিজ্য দ্ৰুতগতিত হ্ৰাস পাইছে। এনে পৰিস্থিতিত আমেৰিকাৰ ওপৰত চাপ সৃষ্টি কৰিবলৈ ইৰানে হৰমুজ প্ৰণালীত নতুন সাগৰীয় মাইন বহুৱাবলৈ চেষ্টা কৰিছে।
