এই সন্দৰ্ভত প্ৰধানমন্ত্ৰী নৰেন্দ্ৰ মোদীৰ বক্তব্যৰ কথা উল্লেখ কৰি জয়শংকৰে কয়, "মধ্যম শক্তি বুলি কোৱাতকৈ আমি বিশ্বৰ ক্ষমতাৰ সমীকৰণৰ মাজত থকা শক্তিসমূহ বুলি ক’ব পাৰোঁ। প্ৰকৃততে মধ্যম শক্তি বুলিলে কি বুজায়? প্ৰধানমন্ত্ৰীৰ ভাষাত ক’বলৈ গ’লে, যিবোৰ দেশৰ আনক শক্তিশালী কৰি তোলাৰ সামৰ্থ্য আছে, সেইবোৰেই গুৰুত্বপূৰ্ণ শক্তি।"
ভাৰতৰ ক্ষেত্ৰত ‘মধ্যম শক্তি’ শব্দটোৰ ব্যৱহাৰ সন্দৰ্ভত তেওঁ কয়, "ভাৰতক মধ্যম শক্তি বুলি কোৱাটো আমাৰ বাবে বৰ স্বাচ্ছন্দ্যজনক বৰ্ণনা নহয়। কাৰণ, আপুনি যদি বিশ্বৰ সৰ্বাধিক জনসংখ্যাৰ দেশ হয়, আপোনাৰ মুঠ ঘৰুৱা উৎপাদন প্ৰায় ৪ ট্ৰিলিয়ন ডলাৰ হয় আৰু আপোনাৰ সন্মুখত বিকাশৰ বিপুল সম্ভাৱনা থাকে, তেন্তে নিজকে মধ্যম শক্তি হিচাপে সংজ্ঞায়িত কৰাটো নিজৰ সামৰ্থ্যক সীমিত কৰি ৰখাৰ দৰেই হয়।"
বৈদেশিক পৰিক্ৰমা মন্ত্ৰীগৰাকীয়ে লগতে উল্লেখ কৰে যে, বিশ্বৰ পৰিৱৰ্তিত পৰিস্থিতিত দেশসমূহে কেৱল আনৰ সিদ্ধান্তৰ ওপৰত নিৰ্ভৰ কৰি চলিলে নহ’ব। প্ৰতিখন দেশে নিজৰ জাতীয় স্বাৰ্থৰ মূল্যায়ন কৰি স্বাধীন নীতি প্ৰস্তুত কৰিব লাগিব আৰু তাৰ ভিত্তিত আন দেশৰ সৈতে সহযোগিতা তথা চুক্তিত উপনীত হ’ব লাগিব।
তেওঁ কয়, "মধ্যৱৰ্তী শক্তিসমূহে এতিয়াৰে পৰা নিজস্ব বিচাৰ-বিবেচনাৰে সিদ্ধান্ত গ্ৰহণ কৰিব লাগিব। নিজৰ স্বাৰ্থ নিৰ্ধাৰণ কৰিব লাগিব, নিজস্ব নীতি প্ৰস্তুত কৰিব লাগিব আৰু তাৰ পিছত পৰস্পৰৰ সৈতে বুজাবুজি তথা সহযোগিতাৰ ব্যৱস্থা গঢ়ি তুলিব লাগিব।"
ইফালে, বিশ্বৰ পৰিৱৰ্তিত অৰ্থনৈতিক আৰু কূটনৈতিক পৰিস্থিতিত দেশসমূহৰ মাজত থকা পাৰস্পৰিক নিৰ্ভৰশীলতাৰ গুৰুত্বৰ কথাও উল্লেখ কৰে জয়শংকৰে। একে সময়তে গুৰুত্বপূৰ্ণ প্ৰাকৃতিক সম্পদ, বিত্তীয় ব্যৱস্থা আৰু অৰ্থনৈতিক নিষেধাজ্ঞাক আন দেশৰ ওপৰত চাপ সৃষ্টিৰ অস্ত্ৰ হিচাপে ব্যৱহাৰ কৰাৰ প্ৰৱণতাক লৈও তেওঁ উদ্বেগ প্ৰকাশ কৰে।
বৰ্তমানৰ আন্তঃৰাষ্ট্ৰীয় পৰিস্থিতিক ‘গুৰুত্বপূৰ্ণ নিয়ন্ত্ৰণ-বিন্দুৰ বিশ্ব’ হিচাপে বৰ্ণনা কৰি জয়শংকৰে কয় যে, কিছুমান দেশে বিশেষ সম্পদ অথবা বিত্তীয় ব্যৱস্থাৰ ওপৰত থকা নিজৰ নিয়ন্ত্ৰণক আন দেশৰ বিৰুদ্ধে চাপ প্ৰয়োগৰ মাধ্যম হিচাপে ব্যৱহাৰ কৰিছে।
এই সন্দৰ্ভত তেওঁ কয়, "আজিৰ বিশ্বখন এনে কিছুমান গুৰুত্বপূৰ্ণ নিয়ন্ত্ৰণ-বিন্দুৰ ওপৰত নিৰ্ভৰশীল, যিবোৰক অস্ত্ৰ হিচাপে ব্যৱহাৰ কৰাৰ প্ৰৱণতা বৃদ্ধি পাইছে। সাধাৰণতে আমি বিৰল খনিজ পদাৰ্থৰ কথা উদাহৰণ হিচাপে ভাবোঁ। কিন্তু বাস্তৱত বিত্তীয় ব্যৱস্থাও এনে এক গুৰুত্বপূৰ্ণ নিয়ন্ত্ৰণৰ মাধ্যম। অৰ্থনৈতিক নিষেধাজ্ঞাও ইয়াৰ অংশ। কিছুমান দেশে বিত্তীয় ব্যৱস্থা অথবা আমেৰিকান ডলাৰৰ ওপৰত থকা নিজৰ নিয়ন্ত্ৰণক আনৰ বিৰুদ্ধে অস্ত্ৰ হিচাপে ব্যৱহাৰ কৰিছে।"
জয়শংকৰে লগতে কয় যে, ভৱিষ্যতৰ বিশ্ব ব্যৱস্থাত প্ৰতিযোগিতাৰ মূল ভিত্তি হ’ব বিভিন্ন দেশে আন দেশক কি আগবঢ়াব পাৰে আৰু পাৰস্পৰিক স্বাৰ্থৰ ভিত্তিত কেনেধৰণৰ চুক্তি সম্পাদন কৰিব পাৰে।
তেওঁৰ মতে, আগন্তুক দিনত দেশসমূহৰ মাজত সহযোগিতা আৰু প্ৰতিযোগিতা দুয়োটাই নতুন ৰূপ লাভ কৰিব। প্ৰতিখন দেশে নিজৰ সম্পদ, প্ৰযুক্তি, অৰ্থনৈতিক সামৰ্থ্য আৰু অন্যান্য সুবিধাক লৈ আলোচনাৰ মেজত বহিব।
এই সন্দৰ্ভত তেওঁ কয়, "আমি এনে এখন বিশ্বৰ দিশে আগবাঢ়িছোঁ, য’ত প্ৰতিযোগিতাৰ অন্যতম মূল বিষয় হ’ব কোনখন দেশে আলোচনাৰ মেজলৈ কি সামৰ্থ্য লৈ আহিব পাৰে। তাৰ পিছত দেশসমূহে পৰস্পৰৰ সৈতে চুক্তি কৰিব। যেনে, আপুনি এই কামটো কৰক, মই সেইটো কৰিম। আমি একেলগে ইয়াৰ বিকাশ সাধন কৰোঁ অথবা পৰস্পৰৰ মাজত সামগ্ৰী আৰু সুবিধাৰ বিনিময় কৰোঁ।"
অৱশ্যে বিশ্ব ব্যৱস্থাত চলি থকা এই পৰিৱৰ্তনক কেৱল নেতিবাচক দৃষ্টিভংগীৰে চোৱা উচিত নহয় বুলিও মত প্ৰকাশ কৰে বৈদেশিক পৰিক্ৰমা মন্ত্ৰীগৰাকীয়ে। তেওঁ কয়, "মই এতিয়াও বিশ্বাস কৰোঁ যে এই পৰিৱৰ্তনৰ প্ৰক্ৰিয়াটোক লৈ আমি নিৰাশাবাদী দৃষ্টিভংগী গ্ৰহণ কৰা উচিত নহয়।"
উল্লেখযোগ্য যে, নতুন দিল্লীত অনুষ্ঠিত ব্লুমবাৰ্গ নিউ ইক’নমী ফ’ৰামৰ এই বিশেষ আলোচনাত বৈদেশিক পৰিক্ৰমা মন্ত্ৰী এছ জয়শংকৰৰ সৈতে অংশগ্ৰহণ কৰে কানাডাৰ বৈদেশিক মন্ত্ৰী অনিতা আনন্দ, অষ্ট্ৰেলিয়াৰ প্ৰাক্তন প্ৰধানমন্ত্ৰী কেভিন ৰাড আৰু ব্ৰিটেইনৰ প্ৰাক্তন প্ৰধানমন্ত্ৰী ঋষি সুনাকে। বিশ্বৰ পৰিৱৰ্তিত শক্তিৰ সমীকৰণ, অৰ্থনৈতিক পাৰস্পৰিক নিৰ্ভৰশীলতা আৰু আন্তঃৰাষ্ট্ৰীয় সহযোগিতাৰ ভৱিষ্যৎ সন্দৰ্ভত এই আলোচনাত গুৰুত্ব আৰোপ কৰা হয়।
.webp "নৱৰাত্ৰি উপলক্ষে দেৱী শৈলপুত্ৰীক প্ৰণাম জনাই দেশবাসীক শুভেচ্ছা প্ৰধানমন্ত্ৰী মোদীৰ")
.webp "প্ৰতিনিধিত্বমূলক ছবি")
