নতুন দিল্লী
হোৱাইট হাউচলৈ ইৰানে প্ৰেৰণ কৰিছে এটা বিশেষ প্রস্তাৱ। কি আছে সেই প্রস্তাৱত ? এয়া শান্তিৰ দিশে এক পদক্ষেপ নে আমেৰিকাক বিভ্রান্ত কৰাৰ আন এক কৌশল ? যোৱা ৪৭ বছৰ ধৰি চলা শত্ৰুতাৰ মাজত হঠাৎ ইৰানৰ এই কোমল সুৰে এতিয়া বিশ্বজুৰি তোলপাৰ লগাইছে। ড’নাল্ড ট্ৰাম্পৰ মেজত পৰি থকা এই ৰূপৰেখাই হয়তো সলনি কৰি দিব পাৰে মধ্য প্ৰাচ্যৰ ইতিহাস, কিন্তু এটা ভুল পদক্ষেপ আৰু গোটেই পৰিকল্পনাটো ভস্মীভূত হ’বলৈ লাগিব মাথোঁ কেইটামান ছেকেণ্ড। সকলোৰে চকু এতিয়া ট্ৰাম্পৰ ওপৰত।
ইৰানৰ শেহতীয়া প্ৰস্তাৱৰ ওপৰত আমেৰিকাৰ স্থিতি সতৰ্ক যদিও দৃঢ় যেন পৰিলক্ষিত হৈছে। আমেৰিকাৰ ৰাষ্ট্ৰপতি ড’নাল্ড ট্ৰাম্পে দুয়োখন দেশৰ মাজত আলোচনা আগবাঢ়িছে বুলি উল্লেখ কৰিছে যদিও এতিয়াও চূড়ান্ত সিদ্ধান্তত উপনীত হোৱা নাই। তেওঁ ইংগিত দিয়ে যে এই প্ৰস্তাৱটো গুৰুত্বসহকাৰে বিবেচনা কৰা হৈছে, কিন্তু ইয়াক গ্ৰহণ কৰাটো সহজ নহ’ব।
আলোচনাৰ অৱস্থাৰ সন্দৰ্ভত মন্তব্য কৰি ট্ৰাম্পে কয় যে আমি ইৰানৰ সৈতে ভাল অগ্ৰগতি লাভ কৰিছো। তেওঁলোকে চুক্তি কৰিব বিচাৰে, কিন্তু তেওঁলোকৰ নেতৃত্বৰ বিষয়ে স্পষ্টতাৰ অভাৱ। মই প্ৰস্তাৱটো নিৰীক্ষণ কৰি আছো। তেওঁলোকে চুক্তিখনৰ ৰূপৰেখা শ্বেয়াৰ কৰিছে আৰু এতিয়া তেওঁলোকে সম্পূৰ্ণ সবিশেষ শ্বেয়াৰ কৰিবলৈ ওলাইছে। তেওঁৰ বক্তব্যই স্পষ্ট কৰি দিয়ে যে আমেৰিকাই ইৰানৰ প্ৰস্তাৱ সম্পূৰ্ণৰূপে নাকচ কৰা নাই, বৰঞ্চ প্ৰতিটো দিশ ভালদৰে পৰীক্ষা কৰি আছে।
ইৰানৰ সামৰিক শক্তি বিশেষকৈ ক্ষেপণাস্ত্ৰ নিৰ্মাণৰ ক্ষমতাক লৈ ট্ৰাম্পে কঠোৰ স্থিতি গ্ৰহণ কৰিছে। ট্ৰাম্পে কয় যে তেওঁ ইৰাণৰ বাকী থকা ক্ষেপণাস্ত্ৰৰ ক্ষমতা সম্পূৰ্ণৰূপে নাইকিয়া কৰাটো বিচাৰে। ট্ৰাম্পে কয় যে মই ইয়াক সম্পূৰ্ণৰূপে নাইকিয়া কৰিব বিচাৰো। তেওঁ কয়- “সেইটোৱে তেওঁলোকক পুনৰ নিজৰ সামৰ্থ্য সম্প্ৰসাৰণ কৰিবলৈ আৰম্ভ কৰাত বাধা দিব।”
ইৰানে যদি কোনো আগ্ৰাসী বা ভুল পদক্ষেপ গ্ৰহণ কৰে তেন্তে আমেৰিকাই সামৰিক ব্যৱস্থা গ্ৰহণৰ পৰা আঁতৰি নাযায় বুলিও ট্ৰাম্পে স্পষ্ট কৰি দিয়ে। তেওঁ কয়, “যদি তেওঁলোকে কোনো ভুল পদক্ষেপ গ্ৰহণ কৰে বা অনুচিত আচৰণ কৰে তেন্তে ব্যৱস্থা গ্ৰহণ কৰা হ’ব পাৰে। এই মুহূৰ্তত পৰিস্থিতিৰ ওপৰত নজৰ ৰখা হৈছে, কিন্তু এই সম্ভাৱনা সম্পূৰ্ণৰূপে আছে।”
ৰাষ্ট্ৰপতি ট্ৰাম্পে ছ’চিয়েল মিডিয়া পোষ্টযোগে ঘোষণা কৰে যে তেওঁ অতি সোনকালে ইৰানে প্ৰেৰণ কৰা প্ৰস্তাৱটো পুনৰীক্ষণ কৰিব। অৱশ্যে এই প্ৰস্তাৱক লৈ সন্দেহো প্ৰকাশ কৰে। তেওঁ লিখিছে, “ইৰানে আমালৈ পঠোৱা পৰিকল্পনাটো মই অতি সোনকালে পৰ্যালোচনা কৰিম, কিন্তু মই নাভাবো যে ইয়াক গ্ৰহণ কৰাটো সহজ হ’ব, কিয়নো যোৱা ৪৭ বছৰত যি হৈছে তাৰ বাবে তেওঁলোকে এতিয়াও পৰ্যাপ্ত মূল্য দিয়া নাই।”
_(1).webp)
