নতুন দিল্লী
শুক্ৰবাৰে পানামাত দুটাকৈ শক্তিশালী ভূমিকম্প আৰু তাৰ মাজতে কেইবাটাও অনুকম্পন অনুভূত হয় বুলি মাৰ্কিন ভূতাত্ত্বিক জৰীপ সংস্থাই জনায়। ৰিখটাৰ স্কেলত ৭.৭ প্ৰাবল্যৰ প্ৰথমটো ভূমিকম্পই ঘৰ-দুৱাৰ ক্ষতিগ্ৰস্ত কৰে, বিদ্যুৎ যোগান ব্যাহত কৰে, বিমান চলাচল বন্ধ কৰি দিয়ে আৰু লোকসকলক নিৰাপদ স্থানলৈ স্থানান্তৰ কৰিবলৈ বাধ্য কৰে; আনহাতে দ্বিতীয়টো ভূমিকম্পৰ প্ৰাবল্য আছিল ৬.৬।
প্ৰথমটো ভূমিকম্পৰ অভিকেন্দ্ৰৰ ওচৰৰ অট্টালিকাবোৰ ভাঙি পৰে আৰু আতংকিত বাসিন্দাসকলে বাট-পথলৈ ঢাপলি মেলে।
প্ৰথমটো জোকাৰণি, তাৰ পাছৰ দ্বিতীয়টো শক্তিশালী জোকাৰণি আৰু ইয়াৰ অনুকম্পনৰ ধাৰাবাহিকতা চুবুৰীয়া দেশ কলম্বিয়ালৈকেও অনুভূত হৈছিল। অৱশ্যে এতিয়ালৈকে কোনো লোকৰ মৃত্যু, আঘাত বা বৃহৎ ক্ষয়-ক্ষতিৰ বাতৰি পোৱা হোৱা নাই।
সমগ্ৰ দেশজুৰি এই কম্পন অনুভূত হৈছিল, য’ত বাসিন্দাসকলে দীৰ্ঘসময় জুৰি জোকাৰণি অনুভৱ কৰা বুলি জনাইছে আৰু কৰ্তৃপক্ষই কেইবাখনো প্ৰদেশৰ ক্ষয়-ক্ষতিৰ পৰিমাণ মূল্যায়ন কৰিছে। ক্ষয়-ক্ষতি আৰু প্ৰভাৱৰ সম্পূৰ্ণ মাত্ৰা তাৎক্ষণিকভাৱে স্পষ্ট হোৱা নাছিল যদিও, হতাহত হোৱাৰ সম্ভাৱনা আছে বুলি USGS-এ সকীয়াই দিয়ে।
এই ভূমিকম্পটো ভূমিৰ ১২.৬ কিলোমিটাৰ গভীৰতাত সংঘটিত হৈছিল, আৰু ইয়াৰ অভিকেন্দ্ৰ আছিল পানামা চহৰৰ পৰা প্ৰায় ২০০ কিলোমিটাৰ আঁতৰৰ এখন কম জনবসতিপূৰ্ণ অঞ্চল। ভূমিকম্পৰ পাছৰ কেইটামান ঘণ্টাত দেশখনত ৪০টাতকৈও অধিক অনুকম্পন অনুভূত হয়।
USGS-ৰ এক প্ৰতিবেদন অনুসৰি, প্ৰায় ৪৩,০০০ পানামাবাসী তীব্ৰ কম্পন অনুভূত হোৱা অঞ্চলবোৰত বাস কৰিছিল।
টেলিভিছনৰ ফুটেজত দেখা গৈছে যে অনুকম্পনৰ সময়ত বৃদ্ধ লোকসকলে ৰাজপথত কান্দি আছিল। ভূমিকম্পৰ ফলত প্ৰভাৱিত হোৱা হেৰেৰা প্ৰদেশৰ বাসিন্দাসকলে ভয় কৰিছিল যে ক্ষতিগ্ৰস্ত অট্টালিকাবোৰ যিকোনো মুহূৰ্ততে ভাঙি পৰিব পাৰে।
সংবাদ মাধ্যমৰ সম্মুখত ৭৪ বছৰীয়া ৰিকাৰ্ডো ব্ৰাউনে কয়, “আমি অতিশয় ভয় খাইছোঁ। ইয়াত আমি দুগৰাকী বৃদ্ধ মানুহহে আছোঁ। ঘৰটোত ফাট মেলিছে, আৰু আমাৰ ভয় লাগিছে জানোচা ই আমাৰ গাত ভাঙি পৰে।” তেওঁ জনায় যে তেওঁলোকৰ লাছ মিনাছ অঞ্চলৰ কেইবাটাও ঘৰ ক্ষতিগ্ৰস্ত হৈছে।
.webp "ভাৰতৰ কনছুলেট জেনেৰেলত অনুষ্ঠিত এক অনুষ্ঠানত ৰাষ্ট্ৰদূত লক্ষ্মী মুৰ্দেশ্বৰ পুৰী")
