নতুন দিল্লী
ডেনমাৰ্কৰ সংসদ সদস্য তথা প্ৰতিৰক্ষা সমিতিৰ অধ্যক্ষ ৰাছমাছ জাৰ্লভে কয় যে, আমেৰিকাই গ্ৰীণলেণ্ডক আক্ৰমণ কৰিলে ডেনমাৰ্কে নিজকে ৰক্ষা কৰিব লাগিব। তেওঁ স্বীকাৰ কৰে যে, ডেনমাৰ্কৰ সেনাবাহিনী আমেৰিকাক ৰখাব পৰাকৈ শক্তিশালী নহয়, যদিও এনে আক্ৰমণ সম্পূৰ্ণৰূপে গ্ৰহণযোগ্য নহয় বুলি উল্লেখ কৰে।
এক সাক্ষাৎকাৰত জাৰ্লভে কয় যে, ডেনমাৰ্কে স্পষ্টভাৱে ক’ব বিচাৰে যে ইয়াৰ ওপৰত সামৰিক আক্ৰমণ গ্ৰহণযোগ্য নহয়। তেওঁ সকীয়াই দিছিল যে এনে কাৰ্য্যই এক অৰ্থহীন আৰু বিপৰ্যয়জনক পৰিস্থিতিৰ সৃষ্টি কৰিব আৰু দুখন নাটোৰ সদস্য দেশৰ মাজত যুদ্ধ হ’ব। যিটো বিধ্বংসী, অত্যন্ত মূৰ্খামি আৰু সম্পূৰ্ণ অপ্ৰয়োজনীয় হ’ব।
জাৰ্লভে কয় যেক, "আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পে গ্ৰীণলেণ্ডক আক্ৰমণ কৰাৰ কোনো ভাবুকি, শত্ৰুতা বা বৈধ কাৰণ নাই। তেওঁ আঙুলিয়াই দিয়ে যে আমেৰিকাৰ ইতিমধ্যে গ্ৰীণলেণ্ডৰ প্ৰৱেশ আছে আৰু দুয়োখন দেশৰ প্ৰতিৰক্ষা চুক্তি আছে যিয়ে খনন কাৰ্যকলাপকে ধৰি আমেৰিকাৰ জড়িততাৰ অনুমতি দিয়ে। ইয়াৰ একেবাৰেই প্ৰয়োজন নাই, আৰু আমি আশা কৰিছো যে পৰিস্থিতি পুনৰ শুদ্ধ পথলৈ আনিব পৰা যাব আৰু তীব্ৰতৰ নহয়।"
ড’নাল্ড ট্ৰাম্পে প্ৰথমবাৰৰ বাবে ২০১৯ চনত ৰাষ্ট্ৰপতি হিচাপে গ্ৰীণলেণ্ড ক্ৰয় কৰাৰ প্ৰস্তাৱ দিছিল যদিও ডেনমাৰ্কে এই প্ৰস্তাৱ নাকচ কৰি কয় যে, এই দ্বীপটো বিক্ৰীৰ বাবে নহয়। ২০২৪ চনৰ আমেৰিকাৰ ৰাষ্ট্ৰপতি নিৰ্বাচনত জয়ী হৈ কাৰ্যভাৰলৈ ঘূৰি অহাৰ পিছত ট্ৰাম্পে গ্ৰীণলেণ্ড ক্ৰয়ৰ প্ৰস্তাৱ নবীকৰণ কৰে, যিটো পুনৰ নাকচ কৰা হয়।
জাৰ্লভে স্পষ্ট কৰি কয় যে গ্ৰীণলেণ্ড কোনো মূল্যত বিক্ৰীৰ বাবে নহয়। ডেনমাৰ্কে ৫৭ হাজাৰ ডেনিছ নাগৰিকক বিক্ৰী কৰি আমেৰিকানলৈ ৰূপান্তৰিত কৰিব নোৱাৰে বুলি উল্লেখ কৰি তেওঁ কয় যে, গ্ৰীণলেণ্ডৰ জনসাধাৰণে ইয়াৰ বিৰোধিতা অত্যন্ত স্পষ্ট কৰি দিছে।
ইফালে ডেনমাৰ্কৰ প্ৰধানমন্ত্ৰী মেটে ফ্ৰেডেৰিকচেনে সকীয়াই দিছে যে, গ্ৰীনলেণ্ডত আমেৰিকাৰ সামৰিক আক্ৰমণে ৭৬ বছৰ ধৰি চলি অহা পশ্চিমীয়া সামৰিক মিত্ৰতা নাটোৰ অন্ত পেলাব পাৰে।
তেওঁ কয় যে, "যদি এনে আক্ৰমণ হয় তেন্তে ডেনমাৰ্কে নাটোৰ ৫ নং অনুচ্ছেদৰ প্ৰয়োগ কৰিব লাগিব, য’ত সদস্য দেশসমূহে ইজনে সিজনক ৰক্ষা কৰিব লাগিব। ইয়াৰ অৰ্থ হ’ব যে নাটো দেশসমূহে ডেনমাৰ্কক আমেৰিকাৰ বিৰুদ্ধে নিজকে ৰক্ষা কৰাত সহায় কৰিবলৈ বাধ্য হ’ব। অৱশ্যে এই পদক্ষেপক আমেৰিকাই ভেটো দিব। যাৰ ফলত নাটো কাৰ্যকৰীভাৱে ধ্বংস হ’ব।"
মঙলবাৰে (স্থানীয় সময় অনুসৰি) হোৱাইট হাউছে কয় যে তেওঁলোকে গ্ৰীনলেণ্ড অধিগ্ৰহণৰ বাবে “একাধিক বিকল্প” বিবেচনা কৰি আছে। হোৱাইট হাউছৰ প্ৰেছ সচিব কেৰ’লিন লিভিটে এক ব্রিফিঙৰ সময়ত কয় যে, "সামৰিক শক্তিৰ ব্যৱহাৰ নুই কৰা হোৱা নাই৷"
লিভিটে কয় যে, ৰাষ্ট্ৰপতি ট্ৰাম্পে বিশ্বাস কৰে যে গ্ৰীণলেণ্ড অধিগ্ৰহণ কৰাটো আমেৰিকাৰ বাবে ৰাষ্ট্ৰীয় নিৰাপত্তাৰ অগ্ৰাধিকাৰ আৰু আৰ্কটিক অঞ্চলৰ প্ৰতিদ্বন্দ্বী ৰাষ্ট্ৰসমূহৰ পৰা অহা ভাবুকি ৰোধ কৰাৰ বাবে ই গুৰুত্বপূৰ্ণ।
অহা সপ্তাহত ডেনিছ আৰু গ্ৰীণলেণ্ডৰ বিষয়াসকলক সাক্ষাৎ কৰাৰ পৰিকল্পনা কৰিছে আমেৰিকাৰ বিদেশ মন্ত্ৰী মাৰ্কো ৰুবিঅ’ই। ৱাল ষ্ট্ৰীট জাৰ্নেলৰ মতে, ৰুবিঅ’ই স্পষ্ট কৰি দিয়ে যে, ট্ৰাম্পে গ্ৰীণলেণ্ডক ক্ৰয় কৰিব বিচাৰে আৰু সামৰিক শক্তি ব্যৱহাৰ কৰাৰ উদ্দেশ্য নাই। ডেনমাৰ্কে আগন্তুক বৈঠকক আদৰণি জনাইছে আৰু ইয়াক “প্ৰয়োজনীয় আলোচনা” বুলি অভিহিত কৰিছে।
.webp)
