সংস্কৃত ভাষাক জীৱন-যাপনৰ এক পন্থা হিচাপে বাচি লৈছে ডঃ ৰেজভি চুলতানাই
Story by Munni Begum | Posted by Munni Begum • 1 Years ago
ডঃ ৰেজভি চুলতানা
মুন্নী বেগম / গুৱাহাটী
সংস্কৃত হৈছে হিন্দু আৰু বৌদ্ধ ধৰ্মৰ এটা পবিত্ৰ দেৱভাষা। সংস্কৃতৰ প্ৰাক-শাস্ত্ৰীয় ৰূপটো বৈদিক সংস্কৃত নামেৰে পৰিচিত। ই হিন্দুধৰ্মৰ আটাইতকৈ পুৰণি ধৰ্ম গ্ৰন্থ ঋকবেদত ব্যৱহাৰ হোৱা এক প্ৰাচীন ভাষা। ভাৰতবৰ্ষৰ ঐতিহ্য আৰু পুৰাতন সভ্যতা-সংস্কৃতিৰ সাক্ষৰ বহন কৰা এই ধ্ৰুপদী ভাষা সংস্কৃতক জীৱন-যাপনৰ এক পন্থা হিচাপে বাচি লৈছে এগৰাকী মুছলমান মহিলা ডঃ ৰেজভি চুলতানাই।
একাংশ দুষ্ট চক্ৰই সমাজত ধৰ্মীয় অসহিষ্ণুতাৰ পৰিৱেশ সৃষ্টি কৰিবলৈ অহৰহ চেষ্টা কৰি থকাৰ সময়তে ৰেজভি চুলতানাই ধৰ্মীয় ভেদাভেদ একাষৰীয়া কৰি নিজে বিচৰা ধৰণে সংস্কৃত ভাষাত উচ্চ শিক্ষা গ্ৰহণ কৰে আৰু সমাজত জ্ঞানৰ পোহৰ বিলাই আছে৷ সম্প্ৰতি তেওঁ USTM-ৰ অধীনত থকা আয়ুৰ্বেদিক মহাবিদ্যালয়ত সংস্কৃত বিষয়ৰ সহকাৰী অধ্যাপিকা হিচাপে ছাত্ৰ-ছাত্ৰীক সংস্কৃত বিষয়ৰ পাঠদান কৰাই আছে।
'আৱাজ-দ্য ভইচ'ৰ সৈতে হোৱা এক সাক্ষাৎকাৰত ডঃ ৰেজভি চুলতানাই কয়, "বৰ্তমান সময়ত একাংশই সংস্কৃত ভাষাটোক মৃত ভাষা বুলি গণ্য কৰি আহিছে। কিন্তু প্ৰকৃততে সংস্কৃত বিষয়টো হৈছে এক তত্ত্ব গধুৰ বিষয় আৰু অতি কঠিন ভাষা। আমি এই ভাষাটোক আমাৰ দৈনন্দিন জীৱনত ব্যৱহাৰ নকৰো। প্ৰকৃততে সংস্কৃত ভাষাটো মৃত ভাষা নহয়। কিয়নো, প্ৰাচীন কালৰ পৰাই বেদ, উপনিষদ আদি সকলো গ্ৰন্থতে সংস্কৃত ভাষাৰ ব্যৱহাৰ হৈ আহিছে। বৰ্তমান সময়ত CBSC আৰু SEBAৰ অধীনৰ সকলো বিদ্যালয়তে ছাত্ৰ-ছাত্ৰীসকলৰ মাজত সংস্কৃত ভাষাটো বাধ্যতামূলক কৰি দিয়া হৈছে।"
উল্লেখ্য যে, বৰ্তমান গুৱাহাটীৰ বাসিন্দা ডঃ ৰেজভি চুলতানাই নগাওঁ চৰকাৰী ছোৱালী উচ্চতৰ মাধ্যমিক বিদ্যালয়ত শিক্ষা সমাপ্ত কৰি কটন কলেজত নামভৰ্তি কৰিছিল৷ তাৰ পৰা উচ্চতৰ মাধ্যমিকৰ পৰীক্ষাত উত্তীৰ্ণ হৈ তেওঁ দিল্লী বিশ্ববিদ্যালয়ৰ অধীনত হিন্দু কলেজৰ পৰা সংস্কৃত বিষয়ত মেজৰ লৈ সুখ্যাতিৰে স্নাতক ডিগ্ৰী উত্তীৰ্ণ হয়। অত্যন্ত মেধাসম্পন্ন ৰেজভিয়ে গুৱাহাটী বিশ্ববিদ্যালয়ৰ পৰা স্নাতকোত্তৰ আৰু ডক্টৰেট ডিগ্ৰী লাভ কৰে।
ডঃ ৰেজভি চুলতানাই কয়, "মই যেতিয়া অষ্টম শ্ৰেণীত চতুৰ্থ বিষয় হিচাপে সংস্কৃত অধ্যয়ন কৰিছিলো, তেতিয়াৰ পৰাই এই বিষয়টোৰ প্ৰতি মোৰ বিশেষ আকৰ্ষণৰ সৃষ্টি হৈছিল। এই বিষয়টো লোৱাৰ বাবে মোক পৰিয়াল বা সমাজৰ পৰা কোনোৱে বাধা দিয়া নাছিল। সংস্কৃত বিষয়ত মেজৰ লৈ মই সুখ্যাতিৰে উত্তীৰ্ণ হৈ স্নাতক ডিগ্ৰী লাভ কৰিছিলো। পিছত দিল্লী বিশ্ববিদ্যালয়ৰ অধীনত হিন্দু মহাবিদ্যালয়ৰ পৰা ২০০৬ চনত এম এ আৰু গুৱাহাটী বিশ্ববিদ্যালয়ৰ পৰা ২০১৬ চনত এম ফিল আৰু ২০১৭ চনত ডক্টৰেট ডিগ্ৰী লাভ কৰিছিলো। সেয়ে মই ভাবো যে, সকলোৱে সংস্কৃত পঢ়িব লাগে। কাৰন সংস্কৃত ভাষাত জানিবলগীয়া বহু কথা আছে।"
সংস্কৃত কেৱল কোনো এটা নিৰ্দিষ্ট ধৰ্মৰ ভাষা নহয়। সংস্কৃত হৈছে এক দেৱভাষা আৰু সকলো ভাষাৰ মূল হৈছে সংস্কৃত ভাষা। সংস্কৃত পঢ়িলে আমাৰ ভাষা শুদ্ধ হয়। কিন্তু বৰ্তমান প্ৰজন্মৰ মাজত সংস্কৃত ভাষা অধ্যয়নৰ প্ৰতি আগ্ৰহ খুবেই কম দেখা যায়। সংস্কৃতক লৈ আমাৰ মাজত এনেকুৱা এটা ধাৰণা আছে যে এই ভাষাটো বেদ উপনিষদৰ বহুত কঠিন ভাষা। কেৱল মাত্ৰ নম্বৰ লাভ কৰাৰ বাবেহে ছাত্ৰ-ছাত্ৰীসকলে এই সংস্কৃত বিষয়টো অধ্যয়ন কৰি আহিছে।
