শতানন্দ ভট্টাচাৰ্য
শিলচৰৰ জুবিন গাৰ্গ সোঁৱৰণী মঞ্চত ১০ দিনীয়া কাৰ্যসূচীৰে অনুষ্ঠিত কৰা হৈছে অসম গ্ৰন্থমেলা। ৰাজ্য চৰকাৰৰ অধীনত আৰু অসম প্ৰকাশন পৰিষদৰ উদ্যোগত অনুষ্ঠিত এই গ্ৰন্থমেলাত প্ৰতিদিনে মুকলি মঞ্চত বিভিন্ন সাংস্কৃতিক অনুষ্ঠান, নাট, কবিতা পাঠ আদি আয়োজন কৰা হৈছে।
যিসময়ত সকলো বয়সৰ লোকে মোবাইল ফোনত ব্যস্ত হৈ থাকে সেই সময়ত এই গ্ৰন্থমেলাই কিতাপ পঢ়াৰ এক সুযোগৰ সৃষ্টি কৰিছে। মেলাত উপস্থিত থকা বিশিষ্ট সাংবাদিক তথা সাহিত্যিক অধ্যাপক পাৰ্থ চেটাৰ্জীয়ে ভাষণ প্ৰদান কৰি কয়, "মানুহৰ দৃষ্টিত মোবাইল স্ক্ৰীণত নিবদ্ধ হৈ থকাৰ বাবে গ্ৰন্থই প্ৰত্যাহ্বানৰ সন্মুখীন হৈছে।"
গ্ৰন্থমেলাখন উদ্বোধন কৰি শিক্ষামন্ত্ৰী ড০ ৰানোজ পেগুৱে কয় যে, মানৱ জীৱনত গ্ৰন্থৰ গুৰুত্ব অপৰিসীম, কিতাপেই মানুহৰ শ্ৰেষ্ঠ বন্ধু, কেৱল গ্ৰন্থইহে মানসিক সত্তাক নিয়ন্ত্ৰণ কৰিব পাৰে, সেয়েহে বৰ্তমানৰ যুগত প্ৰযুক্তিৰ ব্যৱহাৰৰ জৰিয়তে তৎক্ষণাত তথ্য সংগ্ৰহৰ যুগত কিতাপ পঢ়াৰ অভ্যাস গঢ়ি তোলা উচিত।"
শিশুসকলক কিতাপ পঢ়াৰ বাবে উৎসাহিত কৰিব বুলি উল্লেখ কৰি তেওঁ কয় যে, ব্যস্ততাৰ মাজতো শিশুসকলৰ মাজত কিতাপ পঢ়াৰ প্ৰতি আগ্ৰহ বৃদ্ধিৰ বাবে অভিভাৱকসকলে উদ্যোগ ল’ব লাগে। শিক্ষামন্ত্ৰীগৰাকীৰ মতে, মানসিক শক্তি প্ৰদান কৰিবলৈ কিতাপৰ বিকল্প একো নাই।
তেওঁ গ্ৰন্থ আন্দোলন আৰম্ভ কৰাৰ কথা কয় কাৰণ গ্ৰন্থইহে মানুহৰ মাজত বিবেক আৰু মূল্যবোধৰ সৃষ্টি কৰিব পাৰে। তেওঁ গ্ৰন্থ আন্দোলনৰ জৰিয়তে কিতাপ কিনা, কিতাপ পঢ়া আৰু কিতাপ উপহাৰ দিয়াৰ কথা উল্লেখ কৰিছে।
অসম প্ৰকাশন পৰিষদৰ সম্পাদক প্ৰমোদ কলিতাই কয় যে, পৰিষদে ২০২৩ চনত প্ৰথমবাৰৰ বাবে শিলচৰত এখন গ্ৰন্থমেলাৰ আয়োজন কৰিছিল। চলিত বৰ্ষৰ এই গ্ৰন্থমেলাত ৩১ গৰাকী প্ৰকাশক আৰু গ্ৰন্থ বিক্ৰেতাই অংশগ্ৰহণ কৰিছে। গ্ৰন্থমেলাখন ১ ডিচেম্বৰৰ পৰা হৈছে আৰু ১০ ডিচেম্বৰত অন্ত পৰিব।
উল্লেখযোগ্য যে, অসম চৰকাৰে চলিত বৰ্ষটোক 'গ্ৰন্থ বছৰ' হিচাপে ঘোষণা কৰিছে আৰু সেই অনুসৰি ৰাজ্যৰ ৮ টাকৈ স্থানত গ্ৰন্থমেলা অনুষ্ঠিত কৰা হ'ব। শিলচৰৰ উপৰিও আন ৭ খন জিলা হৈছে লখিমপুৰ, নলবাৰী, গুৱাহাটী, যোৰহাট, তিনিচুকীয়া, বঙাইগাঁও আৰু মংগলদৈ।
